গুৱাহাটী
অসমৰ কিংবদন্তি আহোম সেনাপতি লাচিত বৰফুকনক লৈ পাৰ্থসাৰথি মহন্তৰ ৰচনা আৰু পৰিচালিত ‘লাচিত – দ্য ৱাৰিয়ৰ’ শীৰ্ষক এনিমেটেড তথ্যচিত্ৰখন সোমবাৰে লাচিত দিৱসৰ লগত সংগতি ৰাখি প্ৰডাকচন হাউচ পাই মিডিয়াৰ সকলো ছ’চিয়েল মিডিয়া প্লেটফৰ্মত আনুষ্ঠানিকভাৱে মুক্তি লাভ কৰে।
ছবিখনত কিংবদন্তি সেনাপতিগৰাকীক অসমীয়া সাহস, অনুশাসন, দেশপ্ৰেমৰ প্ৰতীক হিচাপে চিত্ৰিত কৰা হৈছে বুলি মহন্তই কয়।
তেওঁ লগতে কয় যে এই শুভ দিনটোত ছবিখন মুক্তি পোৱাটো সেই সেনাপতিজনৰ প্ৰতি আন্তৰিক শ্ৰদ্ধাঞ্জলি, যাৰ অমৰ কথা আৰু অতুলনীয় ত্যাগৰ ইতিহাসৰ মাজেৰে প্ৰতিধ্বনিত হৈয়েই আছে।
ভাৰতীয় ৫৪ সংখ্যক আন্তঃৰাষ্ট্ৰীয় চলচ্চিত্ৰ মহোৎসৱ (আই এফ এফ আই), গোৱা, নিউয়ৰ্ক লিফ্ট অফ চলচ্চিত্ৰ মহোৎসৱ, মিলান চুটি ছবি মহোৎসৱ, নৱজাতক চুটি ছবি মহোৎসৱ বাৰ্লিন, আৰু বিশ্বব্যাপী বিখ্যাত কান – মাৰ্চে ডু ফিল্ম আদিকে ধৰি ৫০ টা আন্তঃৰাষ্ট্ৰীয় মহোৎসৱত ছবিখন প্ৰদৰ্শিত হৈছে।
ইয়াৰ উপৰিও ছবিখনে ১৯টা শ্ৰেষ্ঠ তথ্যচিত্ৰ বঁটা, ৫টা শ্ৰেষ্ঠ এনিমেটেড চুটি ছবিৰ বঁটা, এটাকৈ শ্ৰেষ্ঠ চুটি ছবিৰ বঁটা, উৎকৃষ্টতাৰ বঁটা, এটা প্ৰশংসা বঁটা আৰু তিনিটা বিশেষ উল্লেখ লাভ কৰিছে বুলিও তেওঁ কয়।
মহন্তই কয় যে ছবিখনে যুৱ মনক অনুপ্ৰাণিত কৰিব আৰু সকলো অসমীয়া মানুহৰ মাজত সাংস্কৃতিক গৌৰৱৰ মনোভাৱক শক্তিশালী কৰিব বুলি তেওঁলোকে আশা কৰিছে।
ব্ৰহ্মপুত্ৰ নদীৰ শৰাইঘাটৰ যুদ্ধত আহোম সেনাক নেতৃত্ব দিয়া লাচিত বৰফুকনৰ বীৰত্বৰ স্মৃতিত প্ৰতি বছৰে ২৪ নৱেম্বৰত অসমত ৰাজ্যজুৰি লাচিত দিৱস উদযাপন কৰা হয়।
