বৈদ্যুতিক বাহন ক্ৰয়ৰ ক্ষেত্ৰত ২ শতাংশ কৰ ৰেহাইৰ সিদ্ধান্ত অসম চৰকাৰৰ

Story by  atv | Posted by  [email protected] • 3 Months ago
অসমৰ মুখ্যমন্ত্ৰী হিমন্ত বিশ্ব শৰ্মা
অসমৰ মুখ্যমন্ত্ৰী হিমন্ত বিশ্ব শৰ্মা
 
গুৱাহাটী

ৰাজ্যিক কেবিনেটে ২০২৫ চনৰ ৩১ মাৰ্চলৈকে ইলেক্ট্ৰনিক বাহন ক্ৰয়ৰ ক্ষেত্ৰত ২ শতাংশ কৰ হ্ৰাসৰ সিদ্ধান্ত গ্ৰহণ কৰিছে। ইয়াৰ ফলত ১০-২০ লাখ টকাৰ ভিতৰৰ ইলেক্ট্ৰনিক বাহনৰ ওপৰত এতিয়া প্ৰচলিত ১০ শতাংশ কৰৰ পৰিৱৰ্তে ৮ শতাংশ হ’ব।
 
এই পদক্ষেপে বহুতকে ইলেক্ট্ৰনিক বাহন ক্ৰয়ৰ বাবে উৎসাহিত কৰিব আৰু লগতে এখন সেউজ অসম গঢ়াৰ দিশতো যথেষ্ট অৰিহণা যোগাব। বৃহস্পতিবাৰে অনুষ্ঠিত হোৱা সাপ্তাহিক কেবিনেট বৈঠকত এই সিদ্ধান্ত লোৱা হয়।
 
ইয়াৰ পূৰ্বে ২০২৩ চনৰ অক্টোবৰ মাহত অসম চৰকাৰে টাটা পাৱাৰ গ্ৰুপৰ সহযোগী প্ৰতিষ্ঠান টাটা পাৱাৰ ইভি চাৰ্জিং ছলিউচনছ লিমিটেড (টিপিইভিচিএছএল)ৰ সৈতে বুজাবুজিৰ চুক্তিত স্বাক্ষৰ কৰিছিল আৰু ইয়াৰ প্ৰধান উদ্দেশ্য আছিল অঞ্চলটোৰ বৈদ্যুতিক বাহন (ইভি) পৰিৱেশ তন্ত্ৰ বৃদ্ধি কৰা। 
 
এই চুক্তিৰ অধীনত গুৱাহাটীত সুবিধাজনক আৰু শক্তিশালী ইভি চাৰ্জিং আন্তঃগাঁথনিৰ প্ৰৱৰ্তন কৰা হ’ব। টাটা পাৱাৰে এই পদক্ষেপৰ আৰম্ভণি কৰিব সমগ্ৰ চহৰখনৰ কৌশলগত স্থানত পাইলট প্ৰকল্পৰ অংশ হিচাপে ১০টা উন্নত ইভি চাৰ্জাৰৰ নেটৱৰ্ক স্থাপন কৰিব। দিছপুৰৰ দৰে অধিক যান-জঁট সৃষ্টি হোৱা অঞ্চলত কৌশলগতভাৱে মূল ইভি চাৰ্জাৰ কেন্দ্ৰ স্থাপন কৰা হ’ব।