গুৱাহাটী
শুকুৰবাৰে অসমৰ মুখ্যমন্ত্ৰী হিমন্ত বিশ্ব শৰ্মাই ৰাজ্যখনৰ লাইভ মনোৰঞ্জন উদ্যোগৰ দ্ৰুত বিকাশৰ কথা উল্লেখ কৰি কয় যে অসম এতিয়া কনচাৰ্ট আৰু লাইভ ইভেণ্ট সমূহৰ বাবে এক প্ৰধান আকৰ্ষণৰ কেন্দ্ৰবিন্দু হৈ পৰিছে।
ছ’চিয়েল মিডিয়া প্লেটফৰ্ম এক্স (X)-ত তথ্য শ্বেয়াৰ কৰি মুখ্যমন্ত্ৰীগৰাকীয়ে উল্লেখ কৰে যে ২০২৫ চনত অসমত ৫৫ টা লাইভ টিকটযুক্ত শ্ব’ অনুষ্ঠিত হৈছিল। ইয়াৰ ফলত পূৰ্বৰ বছৰবোৰৰ তুলনাত অনুষ্ঠানৰ সংখ্যা ২২২ শতাংশ বৃদ্ধি পাইছে আৰু দৰ্শকৰ উপস্থিতি ১৮৮ শতাংশ বৃদ্ধি পাইছে।
মুখ্যমন্ত্ৰী শৰ্মাই মন্তব্য কৰে যে মাত্ৰ কেইবছৰমান আগতে ডাঙৰ ডাঙৰ কনচাৰ্টৰ তালিকাত অসমৰ নাম প্ৰায় নাছিলেই, কিন্তু এতিয়া অসম শিল্পী আৰু অনুষ্ঠানৰ আয়োজকসকলৰ বাবে ক্ৰমান্বয়ে এক আকৰ্ষণীয় স্থান হৈ পৰিছে।
মুখ্যমন্ত্ৰীগৰাকীয়ে কয় যে এই বিকাশে ৰাজ্যখনৰ পৰিৱৰ্তিত সাংস্কৃতিক পৰিৱেশ, অনুষ্ঠানসমূহৰ বাবে উন্নত আন্তঃগাঁথনি আৰু লাইভ মনোৰঞ্জনৰ ক্ষেত্ৰত জনসাধাৰণৰ বৰ্ধিত অংশগ্ৰহণকে প্ৰতিফলিত কৰে।
কনচাৰ্ট আৰু এনে ধৰণৰ ডাঙৰ ডাঙৰ অনুষ্ঠানৰ এই বৃদ্ধিক অসমৰ পৰ্যটন, আতিথ্য আৰু সৃষ্টিশীল অৰ্থনীতি খণ্ডৰ বাবে এক ডাঙৰ উদগনি হিচাপে গণ্য কৰা হৈছে। ইয়াৰ লগতে এই কথাই উত্তৰ-পূৰ্বাঞ্চলৰ এক প্ৰধান সাংস্কৃতিক কেন্দ্ৰ হিচাপে অসমৰ স্থানক অধিক শক্তিশালী কৰি তুলিছে।
