গুৱাহাটী
আগষ্ট মাহৰ আৰম্ভণিৰে পৰা এয়াৰ ইণ্ডিয়া এক্সপ্ৰেছে আগষ্ট মাহৰ গুৱাহাটীৰ পৰা ডুবাই আৰু আবুধাবিলৈ পোনপটীয়া বিমান সেৱা আৰম্ভ হ'ব। এই কথা বুধবাৰে ঘোষণা কৰে অসম চৰকাৰে। ইয়াৰ ফলত উত্তৰ-পূব ভাৰতৰ পৰা আন্তঃৰাষ্ট্ৰীয় বিমান সংযোগৰ এক বৃহৎ সম্প্ৰসাৰণ ঘটিব।
এই ঘোষণাটো এয়াৰলাইন কোম্পানীটোৰ চৰকাৰী যোগাযোগৰ পিছত কৰা হৈছে, য’ত সংযুক্ত আৰৱ আমিৰশ্বাহীৰ এই দুটা প্ৰধান গন্তব্যস্থানৰ সৈতে গুৱাহাটীক সংযোগ কৰা পোনপটীয়া বিমান সেৱা আৰম্ভ কৰাৰ কথা নিশ্চিত কৰা হৈছে। ইয়াৰ দ্বাৰা এই অঞ্চলৰ যাত্ৰীসকলে প্ৰথমবাৰৰ বাবে উপসাগৰীয় দেশলৈ পোনপটীয়াকৈ যোৱাৰ সুবিধা লাভ কৰিব।
সময়সূচী অনুসৰি, গুৱাহাটী-ডুবাই বিমান সেৱা ৪ আগষ্টৰ পৰা আৰম্ভ হ’ব আৰু গুৱাহাটী-আবুধাবি পথৰ বিমান সেৱা ৭ আগষ্টৰ পৰা আৰম্ভ হ’ব। দুয়োটা পথৰে বিমান সেৱা পোনপটীয়া হ’ব, যাৰ ফলত মহানগৰীসমূহৰ বিমান বন্দৰত ট্ৰেনজিট কৰাৰ প্ৰয়োজন নোহোৱা হ’ব আৰু ভ্ৰমণৰ সময় বহু পৰিমাণে হ্ৰাস পাব।
এই নতুন বিমান পথসমূহে অসম তথা সমগ্ৰ উত্তৰ-পূবৰ আন্তঃৰাষ্ট্ৰীয় সংযোগ ব্যৱস্থাক এক ডাঙৰ গতি প্ৰদান কৰিব বুলি আশা কৰা হৈছে, কাৰণ এই অঞ্চলৰ যাত্ৰীসকলে উপসাগৰীয় দেশসমূহলৈ ভ্ৰমণ কৰিবৰ বাবে পৰম্পৰাগতভাৱে দিল্লী, কলকাতা বা মুম্বাইৰ দৰে চহৰসমূহৰ সংযোগকাৰী বিমানৰ ওপৰত নিৰ্ভৰ কৰিবলগীয়া হৈছিল।
এই পোনপটীয়া বিমান সেৱাৰ দ্বাৰা পৰ্যটক, ব্যৱসায়ী, শিক্ষাৰ্থী আৰু সংযুক্ত আৰৱ আমিৰশ্বাহীত বসবাস কৰা প্ৰৱাসী ভাৰতীয়সকলকে ধৰি বিভিন্ন শ্ৰেণীৰ যাত্ৰী উপকৃত হ’ব বুলি আশা কৰা হৈছে। উত্তৰ-পূবৰ লোকসকলৰ বাবে কৰ্মসংস্থাপন, বাণিজ্য আৰু ব্যৱসায়ৰ বাবে এই উপসাগৰীয় দেশখন অন্যতম প্ৰিয় গন্তব্যস্থান হৈ আহিছে।
এয়াৰ ইণ্ডিয়া এক্সপ্ৰেছে এই সেৱাৰ আৰম্ভণি পৰ্যায়ৰ বাবে বিশেষ ৰেহাই মূল্যৰ টিকটৰ কথাও ঘোষণা কৰিছে। গুৱাহাটী-ডুবাই পথৰ টিকট ২১,১৮৮ টকাৰ পৰা উপলব্ধ হ’ব আৰু গুৱাহাটী-আবুধাবি সেৱাৰ টিকট ১৯,৭৫৯ টকাৰ পৰা আৰম্ভ হ’ব।
এই পোনপটীয়া বিমান সেৱাৰ আৰম্ভণিয়ে উত্তৰ-পূব ভাৰত আৰু সংযুক্ত আৰৱ আমিৰশ্বাহীৰ মাজত পৰ্যটন, বাণিজ্য আৰু বিনিয়োগৰ সম্ভাৱনাক শক্তিশালী কৰাৰ লগতে সাংস্কৃতিক আৰু পাৰস্পৰিক সম্পৰ্ক অধিক দৃঢ় কৰিব বুলি আশা কৰা হৈছে। উন্নত বিমান সংযোগে ব্যৱসায়িক যাতায়াত সহজ কৰাৰ লগতে দুয়োটা অঞ্চলৰ মাজত যাত্ৰী আৰু কাৰ্গো পৰিবহণ অধিক সূচল কৰি তুলিব বুলি সম্ভাৱনা আছে।
উল্লেখযোগ্য যে, প্ৰাৰম্ভিক দিনকেইটাত যাত্ৰা কৰিব বিচৰা যাত্ৰীসকলক এই বিশেষ ৰেহাই মূল্যৰ সুবিধা ল’বলৈ আৰু নতুন পথসমূহত নিজৰ আসন সুৰক্ষিত কৰিবলৈ আগতীয়াকৈ টিকট বুকিং কৰিবলৈ পৰামৰ্শ দিয়া হৈছে।
.webp)