ক্ৰিকেটৰ পথাৰৰ পৰা ৰাজনীতিৰ মঞ্চলৈ; বিজেপিৰ নতুন দায়িত্বত তাৰকা স্পীনাৰ যুজবেন্দ্ৰ চাহাল

Story by  atv | Posted by  [email protected] • 20 m ago
বিজেপিৰ নতুন দায়িত্বত তাৰকা স্পীনাৰ যুজবেন্দ্ৰ চাহাল
বিজেপিৰ নতুন দায়িত্বত তাৰকা স্পীনাৰ যুজবেন্দ্ৰ চাহাল
 
নতুন দিল্লী
 
ভাৰতীয় ক্ৰিকেট জগতৰ অন্যতম পৰিচিত আৰু জনপ্ৰিয় মুখ, তাৰকা স্পীনাৰ যুজবেন্দ্ৰ চাহালে নিজৰ জীৱনৰ আন এক নতুন ইনিংছ আৰম্ভ কৰিছে। ক্ৰিকেটৰ পথাৰত নিজৰ যাদু দেখুওৱাৰ সমান্তৰালকৈ এইবাৰ ৰাজনীতিৰ মঞ্চলৈও খোজ আগবঢ়াইছে খেলুৱৈগৰাকীয়ে। ক্ৰিকেট কেৰিয়াৰ সক্ৰিয় হৈ থকাৰ মাজতেই তেওঁ ভাৰতীয় জনতা পাৰ্টিৰ সৈতে আনুষ্ঠানিকভাৱে জড়িত হৈ পৰিছে।
 
ভাৰতীয় জনতা পাৰ্টিৰ ৰাষ্ট্ৰীয় অ’বিচি মৰ্চাৰ নতুন কাৰ্যনিৰ্বাহক সমিতিখন শেহতীয়াকৈ ঘোষণা কৰা হৈছে। দেশৰ বিভিন্ন ৰাজ্যৰ কেইবাগৰাকীও ব্যক্তিক স্থান আৰু পৃথক দায়িত্ব প্ৰদান কৰা এই তালিকাত যুজবেন্দ্ৰ চাহালক এক বিশেষ স্থান দিয়া হৈছে। প্ৰকাশিত তালিকা অনুসৰি, দিল্লী প্ৰদেশৰ পৰা তেওঁক ৰাষ্ট্ৰীয় অ’বিচি মৰ্চাৰ 'বিশেষ আমন্ত্ৰিত সদস্য' হিচাপে অন্তৰ্ভুক্ত কৰা হৈছে। বিজেপিৰ নেতা নীতিন নবীনে চাহালক এই নিযুক্তি প্ৰদান কৰিছে।
 
উল্লেখযোগ্য যে, বিশেষ আমন্ত্ৰিত সদস্যৰ পদটো দলৰ আন নিয়মীয়া বিষয়ববীয়াৰ পদতকৈ কিছু পৃথক। এই পদত অধিষ্ঠিত ব্যক্তিসকল দলৰ নিয়মীয়া কাৰ্যকৰী সদস্য নহ’লেও, তেওঁলোকে দলৰ কাৰ্যনিৰ্বাহক সমিতিৰ গুৰুত্বপূৰ্ণ বৈঠক আৰু বিভিন্ন সাংগঠনিক কাৰ্যসূচীত অংশগ্ৰহণ কৰাৰ বাবে আমন্ত্ৰণ লাভ কৰে। অৱশ্যে, চাহালে কিমান দিনৰ বাবে এই দায়িত্বত থাকিব বা দলৰ ভৱিষ্যতৰ সাংগঠনিক কাম-কাজত তেওঁৰ প্ৰকৃত ভূমিকা কি হ’ব, সেই সন্দৰ্ভত এতিয়ালৈকে কোনো বিস্তাৰিত তথ্য প্ৰকাশ পোৱা নাই।
 
ৰাজনৈতিক জীৱনৰ এই নতুন যাত্ৰা আৰম্ভ কৰিলেও, চাহালে ক্ৰিকেটৰ পথাৰখন এৰি দিয়া নাই। কিছুদিন পূৰ্বে তেওঁ টেষ্ট ক্ৰিকেটৰ পৰা অৱসৰ গ্ৰহণ কৰাৰ কথা ঘোষণা কৰিছিল যদিও, এদিনীয়া আৰু টি-২০ ফৰ্মেটত পুনৰ ভাৰতীয় ৰাষ্ট্ৰীয় দললৈ উভতি অহাৰ আশাত তেওঁ এতিয়াও অটল হৈ আছে। মন কৰিবলগীয়া যে, ২০২৩ চনৰ আগষ্ট মাহৰ পিছৰে পৰা তেওঁ ভাৰতৰ হৈ কোনো আন্তঃৰাষ্ট্ৰীয় মেচত অৱতীৰ্ণ হোৱা নাই।
 
চাহালৰ ক্ৰিকেট কেৰিয়াৰৰ পৰিসংখ্যা যথেষ্ট চমকপ্ৰদ। বৰ্তমানলৈকে তেওঁ ১৫২খন আন্তঃৰাষ্ট্ৰীয় মেচ খেলি মুঠ ২১৭টা উইকেট দখল কৰিবলৈ সক্ষম হৈছে। আনহাতে, ইণ্ডিয়ান প্ৰীমিয়াৰ লীগৰ ১৮৮খন মেচত অংশগ্ৰহণ কৰি তেওঁ নিজৰ নামত ২৩৩টা উইকেট লিপিবদ্ধ কৰিছে।
 
ক্ৰিকেটৰ দৰে এক সক্ৰিয় কেৰিয়াৰ অব্যাহত থকাৰ সময়তেই বিজেপিৰ দৰে এক বৃহৎ ৰাজনৈতিক দলৰ দায়িত্ব গ্ৰহণ কৰা কাৰ্যই এতিয়া সকলোৰে মাজত ব্যাপক চৰ্চাৰ সৃষ্টি কৰিছে। চাহালৰ এই নতুন যাত্ৰাই আগন্তুক দিনত কেনে ৰূপ লয়, সেয়া সকলোৰে বাবে লক্ষণীয় হ'ব।


শেহতীয়া খবৰ