গুৱাহাটী
ৰাজ্যত শীঘ্ৰেই কাৰ্যকৰী হ’বলৈ গৈ আছে বহুচৰ্চিত সমৰূপ নাগৰিক সংহিতা বা ইউচিচি। এই ঐতিহাসিক আইনখন সুচাৰুৰূপে বলৱৎ কৰাৰ দিশত অসম চৰকাৰে এক গুৰুত্বপূৰ্ণ পদক্ষেপ গ্ৰহণ কৰিছে। চৰকাৰী সূত্ৰই প্ৰকাশ কৰা অনুসৰি, ইউনিফৰ্ম চিভিল কোড বিধেয়কৰ প্ৰয়োজনীয় নিয়মাৱলী আৰু নীতি-নিৰ্দেশনা নিৰ্ধাৰণ কৰিবলৈ ৰাজ্য চৰকাৰে এখন আঠ জনীয়া উচ্চস্তৰীয় সমিতি গঠন কৰি দিছে। অসম চৰকাৰৰ ৰাজনৈতিক বিভাগে জাৰি কৰা এক আনুষ্ঠানিক অধিসূচনা অনুসৰি, এই সমিতিখনে অহা এমাহৰ ভিতৰত চৰকাৰৰ ওচৰত খচৰা নিয়মাৱলী দাখিল কৰিব।
গৃহ আৰু ৰাজনৈতিক বিভাগৰ সচিব দেৱপ্ৰসাদ মিশ্ৰক এই খচৰা নিয়মাৱলী প্ৰস্তুতকাৰী সমিতিখনৰ অধ্যক্ষ হিচাপে নিযুক্তি দিয়া হৈছে। সমিতিখনৰ আন বিশিষ্ট সদস্যসকলৰ ভিতৰত আছে— বিত্ত বিভাগৰ বিশেষ আয়ুক্ত তথা সচিব পাৰ্থ প্ৰতিম মজুমদাৰ, বিধানসভাৰ সচিব গীতাঞ্জলি ডি শইকীয়া, সংখ্যালঘু কল্যাণ আৰু উন্নয়ন বিভাগৰ সচিব ফৰিদা ছামছুল আৰু গৃহ আৰু ৰাজনৈতিক বিভাগৰ অতিৰিক্ত সচিব মৃদুল কুমাৰ দাস।
স্মৰ্তব্য যে, যোৱা ২৭ মে’ত অসম বিধানসভাত ‘সমৰূপ নাগৰিক সংহিতা, অসম, ২০২৬’ সৰ্বসন্মতিক্ৰমে গৃহীত হৈছিল। এই বিধেয়কখন গৃহীত হোৱাৰ লগে লগে উত্তৰাখণ্ড আৰু গুজৰাটৰ পাছতে অসম সমৰূপ নাগৰিক সংহিতা বিধেয়ক গৃহীত কৰা দেশৰ তৃতীয়খন ৰাজ্য হিচাপে পৰিগণিত হয়। গৃহ আৰু ৰাজনৈতিক বিভাগৰ অতিৰিক্ত মুখ্য সচিব অজয় তিৱাৰীয়ে বৃহস্পতিবাৰে সংবাদ মাধ্যমক জানিবলৈ দিয়া মতে, যোৱা ১৩ অক্টোবৰত এই বিধেয়কখন মাননীয় ৰাষ্ট্ৰপতিৰ চূড়ান্ত অনুমোদনৰ বাবে কেন্দ্ৰীয় চৰকাৰলৈ প্ৰেৰণ কৰা হৈছে।
উক্ত আইনখনৰ মূল লক্ষ্য হৈছে ধৰ্ম-বৰ্ণ নিৰ্বিশেষে সকলোৰে বাবে বিবাহ, বিবাহ বিচ্ছেদ, উত্তৰাধিকাৰ আৰু একত্ৰবাস বা লিভ-ইন সম্পৰ্ক নিয়ন্ত্ৰণৰ বাবে এক উমৈহতীয়া আৰু সুশৃংখল আইনী ব্যৱস্থা প্ৰৱৰ্তন কৰা। অসম চৰকাৰে এই বিধেয়কখনৰ জৰিয়তে ৰাজ্যত বহুবিবাহ প্ৰথা সম্পূৰ্ণৰূপে নিষিদ্ধ কৰাৰ লগতে লিভ-ইন সম্পৰ্কৰ পঞ্জীয়ন বাধ্যতামূলক কৰাৰ ওপৰত বিশেষ গুৰুত্ব আৰোপ কৰিছে।
আইনখন কঠোৰভাৱে বলৱৎ কৰিবলৈ ইয়াত কেইবাটাও শাস্তিমূলক ব্যৱস্থাৰো প্ৰস্তাৱ ৰখা হৈছে। নিয়ম উলংঘা কৰি বহুবিবাহ কৰিলে ৭ বছৰ পৰ্যন্ত কাৰাদণ্ড আৰু লিভ-ইন সম্পৰ্কৰ পঞ্জীয়ন নকৰিলে ৩ মাহৰ কাৰাদণ্ড বিহাৰ ব্যৱস্থা কৰা হৈছে। অৱশ্যে, এই বিধেয়কখনৰ পৰা অসমত বসবাস কৰা অনুসূচিত জনজাতি শ্ৰেণীৰ লোকসকলক ৰেহাই দিয়া হৈছে, অৰ্থাৎ তেওঁলোকৰ ক্ষেত্ৰত এই আইন প্ৰযোজ্য নহ’ব।
