ইপিনে ৰহস্যজনকভাৱে মদিনাৰ ইমাম আনি শুকুৰবৰীয়া নামাজ অনুষ্ঠিত কৰিবলৈ জুৰীয়াৰ ধিং তালিমূল কোৰাআন হাফিজীয়া আৰু  ইছলামীয়া মিছন মাদ্ৰাছা নামৰ এটা অখ্যাত অনুষ্ঠানে প্রথমে স্থানীয় দগাঁও খেলপথাৰত স্থান নিৰ্ধাৰণ কৰিছিল, যদিও স্থানীয় ৰাইজে বাধা দিয়াত জুৰীয়াৰ একাংশ নেতাৰ শৰণাপন্ন হৈ জুৰীয়াত অনুষ্ঠানটো আয়োজন কৰাৰ সিদ্ধান্ত লৈছিল।

ইতিমধ্যে উদ্যোক্তা সমিতিৰ অন্যতম সদস্য ৰফিকুল ইছলামক আৰক্ষীয়ে আটক কৰি মাৰাথন জেৰা অব্যাহত ৰাখিছে। ইপিনে জুম্মাৰ নামাজ অনুষ্ঠান আয়োজন কৰাৰ বাবে উদ্যোক্তা সমিতিয়ে প্ৰকাশ কৰা আমন্ত্ৰণীপত্ৰত ধিঙৰ বিধায়ক আমিনুল ইছলামৰ নাম পৃষ্ঠপোষকৰ তালিকাত অন্তৰ্ভুক্ত কৰাৰ বাবে উদ্যোক্তা সমিতিৰ বিৰুদ্ধে তেওঁ জুৰীয়া আৰক্ষী থানাত এখন এজাহাৰ দাখিল কৰিছে। বিধায়কগৰাকীক নজনোৱাকৈয়ে তেওঁৰ নাম আমন্ত্ৰণীপত্ৰত পৃষ্ঠপোষক হিচাপে অন্তৰ্ভুক্ত কৰাৰ অভিযোগ কৰিছে।