নতুন দিল্লী
ভাৰতত থলুৱাভাৱে নিৰ্মিত প্ৰথমখন চি-২৯৫ সামৰিক পৰিবহণ বিমানে বুধবাৰে সফলতাৰে নিজৰ প্ৰথমটো পৰীক্ষামূলক উৰণ সম্পন্ন কৰিছে বুলি ভাৰতীয় বায়ুসেনাই আনুষ্ঠানিকভাৱে প্ৰকাশ কৰিছে। ভাৰতীয় প্ৰতিৰক্ষা খণ্ডক অধিক আত্মনিৰ্ভৰশীল কৰাৰ দিশত গ্ৰহণ কৰা পদক্ষেপৰ অংশ হিচাপে এই সফলতা অৰ্জন কৰা হৈছে।
ভাৰতীয় বায়ুসেনাই প্ৰায় ২১,৯৩৫ কোটি টকা ব্যয় সাপেক্ষে মুঠ ৫৬খন চি-২৯৫ পৰিবহণ বিমান ক্ৰয় কৰাৰ প্ৰক্ৰিয়া হাতত লৈছে। এই চুক্তিৰ অধীনত ৪০খন বিমান প্ৰতিৰক্ষা খণ্ডৰ আগশাৰীৰ প্ৰতিষ্ঠান টাটা এডভান্সড ছিষ্টেমছ লিমিটেডে এয়াৰবাছৰ সহযোগত গুজৰাটৰ ভদোদৰাত থকা উৎপাদন কেন্দ্ৰত সংযোজন কৰিব।
ভাৰতত নিৰ্মিত এই প্ৰথমখন চি-২৯৫ বিমানৰ সফল উৰণৰ আঁৰত থকা সমগ্ৰ দলটোক ভাৰতীয় বায়ুসেনাই অভিনন্দন জ্ঞাপন কৰিছে। যোৱা ১০ জুন তাৰিখে প্ৰকাশ কৰা এক বিবৃতিত বায়ুসেনাই উল্লেখ কৰে যে এই সাফল্যই ভাৰতৰ ক্ৰমবৰ্ধমান বিমান আৰু মহাকাশ প্ৰযুক্তিৰ সামৰ্থ্যক সুদৃঢ় কৰিছে আৰু আত্মনিৰ্ভৰ ভাৰতৰ দৃষ্টিভংগীৰ অধীনত থলুৱা প্ৰতিৰক্ষা সামৰ্থ্য গঢ়ি তোলাৰ ক্ষেত্ৰত ভাৰতীয় বায়ুসেনাৰ দায়বদ্ধতাক স্পষ্টকৈ প্ৰতিফলিত কৰিছে।
উল্লেখযোগ্য যে, বৰ্তমান এই বিমানখনৰ পৰৱৰ্তী কাৰিকৰী পৰীক্ষণসমূহৰ লগতে ভদোদৰাত থকা প্ৰকল্পটোত বাকী থকা বিমানসমূহৰ উৎপাদন আৰু সংযোজন প্ৰক্ৰিয়া নিৰ্ধাৰিত পৰিকল্পনা অনুসৰি আগবাঢ়িছে, যিয়ে ভৱিষ্যতে ভাৰতীয় প্ৰতিৰক্ষা ব্যৱস্থাক অধিক শক্তিশালী কৰি তুলিব।
.webp "প্ৰাক্তন ক্ৰিকেটাৰ তথা টিএমচি সাংসদ ইউছুফ পাঠান, অভিনেতা-ৰাজনীতিবিদ শত্ৰুঘ্ন সিনহা আৰু ছায়নী ঘোষ")
