এক নতুন কূটনৈতিক যুগৰ সূচনাঃ ছৌদি আৰৱত প্ৰথমগৰাকী অ-মুছলমান ৰাষ্ট্ৰদূত নিযুক্তি ভাৰতৰ
নতুন দিল্লী
আন্তঃৰাষ্ট্ৰীয় কূটনীতিৰ ক্ষেত্ৰখনত ভাৰত শেহতীয়াকৈ এক নতুন ইতিহাস ৰচনাৰ দিশত অগ্ৰসৰ হৈছে। প্ৰধানমন্ত্ৰী নৰেন্দ্ৰ মোদীয়ে ভাৰতৰ আটাইতকৈ দীৰ্ঘদিনীয়া নিৰ্বাচিত চৰকাৰৰ মুৰব্বী হিচাপে পৰিগণিত হোৱাৰ লগতে কেইবাখনো ঘৰুৱা আৰু আন্তঃৰাষ্ট্ৰীয় নীতিলৈ নতুন দিশ প্ৰদান কৰা বুলি প্ৰশংসিত হৈ থকাৰ সময়তে, তেওঁৰ চৰকাৰে ছৌদি আৰৱত প্ৰথমগৰাকী অ-মুছলমান ৰাষ্ট্ৰদূত নিযুক্তি দিছে।
ৰিয়াধত ৰাষ্ট্ৰদূত হিচাপে বিপুলৰ এই নিযুক্তি ভাৰতৰ সুচিন্তিত ৰণনীতিৰ এক ঐতিহাসিক পৰিৱৰ্তন। ই ১৯৪৮ চনৰ পৰা সেই দেশলৈ কেৱল মুছলমান ৰাষ্ট্ৰদূত প্ৰেৰণ কৰাৰ প্ৰতিষ্ঠিত পৰম্পৰাক ভংগ কৰিছে। এই দিশৰ পৰা চাবলৈ গ'লে, ছৌদি আৰৱত বিপুলেই হৈছে প্ৰথমগৰাকী অ-মুছলমান ভাৰতীয় কূটনীতিবিদ।
তেওঁৰ এই নিযুক্তি কেৱল ভূ-ৰাজনৈতিক দৃষ্টিকোণৰ পৰাই গুৰুত্বপূৰ্ণ নহয়, বৰং ইয়াৰ আঁৰত থকা বিশেষ বাৰ্তাৰ বাবেও তাৎপৰ্যপূৰ্ণ। তেওঁ ড০ ছুহেল আজাজ খানৰ পৰা এই দায়িত্ব গ্ৰহণ কৰিব।
ভূ-ৰাজনৈতিকভাৱে, কেৱল তেল আৰু প্ৰবাসী শ্ৰমিকৰ পৰম্পৰাগত দৃষ্টিকোণৰ বাহিৰেও আন বহু কাৰণত ভাৰতৰ বাবে ছৌদি আৰৱ অতিকৈ গুৰুত্বপূৰ্ণ।
মিষ্টাৰ বিপুলে কাইৰো, কলম্বো, জেনেভা আৰু ডুবাইত ভাৰতীয় মিছনত সেৱা আগবঢ়াইছে
বৰ্তমান ভাৰতৰ কূটনৈতিক প্ৰেক্ষাপটত ৰিয়াধে অন্যতম গুৰুত্বপূৰ্ণ স্থান অধিকাৰ কৰি আছে। ই এক নিৰ্ভৰযোগ্য শক্তি-অংশীদাৰ, উপসাগৰীয় অঞ্চলৰ এক আগশাৰীৰ ৰাজনৈতিক শক্তি, ইছলাম ধৰ্মৰ দুখন অতি পৱিত্ৰ তীৰ্থস্থানৰ তত্ত্বাৱধায়ক আৰু ক্ৰমবৰ্ধমান প্ৰভাৱশালী অৰ্থনৈতিক কেন্দ্ৰ।
নিজৰ 'ভিজন ২০৩০' ৰূপান্তৰ কাৰ্যসূচীৰ অধীনত, ছৌদি আৰৱ বৰ্তমান এনে এক কেন্দ্ৰ হিচাপে আত্মপ্ৰকাশ কৰিছে য'ত বিনিয়োগ, প্ৰযুক্তি, আন্তঃগাঁথনি, সংস্কৃতি আৰু ভূ-ৰাজনীতিৰ মিলন ঘটিছে। ই ভাৰতৰ দৰে দেশৰ বাবে নতুন সুযোগ আৰু কৌশলগত সম্ভাৱনাৰ দুৱাৰ মুকলি কৰিছে।
বিপুল হৈছে ভাৰতীয় বৈদেশিক সেৱাৰ ১৯৯৮ বৰ্ষৰ এগৰাকী পেছাদাৰী কূটনীতিবিদ। কাইৰো, কলম্বো, জেনেভা আৰু ডুবাইত সেৱা আগবঢ়াই অহা বিপুলৰ উপসাগৰীয় অঞ্চলত কাম কৰাৰ বিস্তৃত অভিজ্ঞতা আছে। তেওঁৰ শেহতীয়া নিযুক্তি আছিল কাটাৰত ভাৰতৰ ৰাষ্ট্ৰদূত হিচাপে।
বিপুলে ১৯৯৮ চনত ভাৰতীয় বৈদেশিক সেৱাত যোগদান কৰিছিল। তেওঁ কাইৰো, কলম্বো, জেনেভা আৰু ডুবাইৰ ভাৰতীয় মিছনসমূহত সেৱা আগবঢ়াইছে। নিজৰ কূটনৈতিক কৰ্মজীৱনত তেওঁ ৰাজনৈতিক আৰু বাণিজ্যিক সম্পৰ্ক, উন্নয়ন, নিৰস্ত্ৰকৰণ, আন্তঃৰাষ্ট্ৰীয় নিৰাপত্তা আৰু সংবাদ মাধ্যমকে ধৰি বিভিন্ন বৈচিত্ৰ্যপূৰ্ণ ক্ষেত্ৰ পৰিচালনা কৰিছে।
ছৌদি আৰৱৰ ৰিয়াধস্থিত ভাৰতীয় ৰাষ্ট্ৰদূতৰ কাৰ্যালয়
২০১৪ চনৰ পৰা ২০১৭ চনলৈকে বিপুলে ভাৰতৰ বৈদেশিক পৰিক্ৰমা মন্ত্ৰীৰ সৈতে সঞ্চালক/যুটীয়া সচিব হিচাপে কাৰ্যনিৰ্বাহ কৰিছিল। পৰৱৰ্তী সময়ত, তেওঁ ২০১৭ চনৰ পৰা ২০২০ চনলৈকে ডুবাইত ভাৰতৰ Consul General হিচাপে কাৰ্যনিৰ্বাহ কৰে।
২০২০ চনৰ পৰা ২০২৩ চনলৈ তেওঁ বৈদেশিক পৰিক্ৰমা মন্ত্ৰ্যালয়ত যুটীয়া সচিব (উপসাগৰীয়) হিচাপে কৰ্মৰত আছিল। ২০২৩ চনৰ আগষ্ট মাহৰ পৰা তেওঁ কাটাৰত ভাৰতৰ ৰাষ্ট্ৰদূত হিচাপে কাৰ্যনিৰ্বাহ কৰি আহিছে।
ক্ৰীড়াপ্ৰেমী বিপুলে ১৯৯৪ চনত দিল্লীৰ ভাৰতীয় প্ৰযুক্তিবিদ্যা প্ৰতিষ্ঠানৰ পৰা মেকানিকেল ইঞ্জিনিয়াৰিং বিষয়ত স্নাতক ডিগ্ৰী লাভ কৰে। ইয়াৰ উপৰি তেওঁ হায়দৰাবাদৰ ইণ্ডিয়ান স্কুল অৱ বিজনেছ (ISB)ৰ পৰা MBA ডিগ্ৰীও অৰ্জন কৰে। বিপুলৰ দৰে এগৰাকী তীক্ষ্ণ বুদ্ধিসম্পন্ন আৰু উপসাগৰীয় অঞ্চলৰ বিস্তৃত অভিজ্ঞতাপুষ্ট কূটনীতিবিদক ছৌদি আৰৱৰ দৰে গুৰুত্বপূৰ্ণ ৰাষ্ট্ৰ এখনৰ ৰাষ্ট্ৰদূত হিচাপে নিযুক্তি দিয়াটো ভাৰতৰ বৈদেশিক নীতিৰ এক বলিষ্ঠ আৰু সুদূৰপ্ৰসাৰী পদক্ষেপ।
