নতুন দিল্লী
আমেৰিকা আৰু ইউৰোপৰ একাধিক চহৰত সোনম ৱাংচুকৰ সমৰ্থনত প্ৰতিবাদ সাব্যস্ত কৰা হৈছে। মানৱ অধিকাৰ সংগঠন ‘হিন্দুজ ফৰ হিউমেন ৰাইটছ’ৰ কৰ্মীসকলে নিউয়ৰ্ক আৰু ছান হ’জেত একত্ৰিত হৈ ৱাংচুকৰ সৈতে সংহতি প্ৰকাশ কৰাৰ লগতে ভাৰত চৰকাৰৰ বিৰুদ্ধে শ্লোগান দিয়ে আৰু কেন্দ্ৰীয় শিক্ষা মন্ত্ৰী ধৰ্মেন্দ্ৰ প্ৰধানৰ পদত্যাগ দাবী জনায়।
সোমবাৰে সন্ধিয়া নিউয়ৰ্ক চহৰৰ ইউনিয়ন স্কোৱেৰ আৰু কেলিফৰ্ণিয়াৰ ছান হ’জেত মহাত্মা গান্ধীৰ প্ৰতিমূৰ্তিৰ সন্মুখত প্ৰতিবাদকাৰীসকল একত্ৰিত হয়। প্ৰতিবাদকাৰীৰ হাতত থকা প্লেকাৰ্ডসমূহত সোনম ৱাংচুকৰ সমৰ্থনত বিভিন্ন শ্লোগান লিখা আছিল।
মঙলবাৰে প্ৰকাশ কৰা এক বিবৃতিত সংগঠনটোৱে জনায় যে, লণ্ডনত অৱস্থিত ভাৰতীয় উচ্চায়োগ আৰু আয়াৰলেণ্ডৰ ডাবলিনস্থিত ভাৰতীয় দূতাবাসৰ সন্মুখতো একেধৰণৰ প্ৰতিবাদ কাৰ্যসূচী ৰূপায়ণ কৰা হয়।
বিবৃতিটোত কোৱা হয়, “আমাৰ প্ৰতিবাদে স্পষ্ট বাৰ্তা প্ৰেৰণ কৰিছে যে নিউয়ৰ্ক হওক, লণ্ডন হওক, ছান হ’জে হওক বা ডাবলিন হওক, ভাৰতৰ শিক্ষাৰ্থীসকলৰ সৈতে ন্যায়সঙ্গত আৰু সন্মানজনক ব্যৱহাৰ হ’ব লাগিব।” ইয়াৰ উপৰি ‘হিন্দুজ ফৰ হিউমেন ৰাইটছ’ আৰু ‘আজাদি প্ৰজেক্ট’ আদি আন্তঃৰাষ্ট্ৰীয় সংগঠনৰ উদ্যোগত ইউৰোপৰ কেইবাখনো দেশত ভাৰতীয় উচ্চায়োগ আৰু দূতাবাসৰ সন্মুখত ৱাংচুকৰ সমৰ্থনত প্ৰতিবাদ সাব্যস্ত কৰা হয়।
উল্লেখযোগ্য যে, ‘হিন্দুজ ফৰ হিউমেন ৰাইটছ’-এ এই সপ্তাহৰ আৰম্ভণিতে ভাৰত চৰকাৰক সোনম ৱাংচুক আৰু নীট পৰীক্ষাত অনিয়মৰ অভিযোগ উত্থাপন কৰি অনশনত বহা আন প্ৰতিবাদকাৰীৰ সৈতে আলোচনাত বহিবলৈ আহ্বান জনাই আহিছিল।
.webp "প্ৰতিনিধিত্বমূলক ছবি")
