গুৱাহাটী
ভাৰতৰ নিৰ্বাচন আয়োগে সোমবাৰে অসমৰ নগাঁও লোকসভা সমষ্টিকে ধৰি দেশৰ মুঠ ৫ টা লোকসভা সমষ্টিৰ উপ-নিৰ্বাচনৰ দিন আনুষ্ঠানিকভাৱে ঘোষণা কৰিছে। নিৰ্বাচনৰ দিন ঘোষণাৰ লগে লগে সংশ্লিষ্ট জিলাসমূহত তাৎক্ষণিকভাৱে কাৰ্যকৰী হোৱাকৈ নিৰ্বাচনী আচৰণ বিধি বলবৎ কৰা হৈছে। নগাঁৱৰ উপৰিও পশ্চিমবংগ, তামিলনাডু আৰু পুডুচেৰীৰ আন চাৰিটা লোকসভা সমষ্টিতো একেখন সূচী অনুসৰিয়েই নিৰ্বাচন অনুষ্ঠিত হ'ব।
নিৰ্বাচন আয়োগৰ সূচী অনুসৰি, আগন্তুক ১৬ ছেপ্টেম্বৰত মনোনয়ন দাখিলৰ অন্তিম দিন নিৰ্ধাৰণ কৰা হৈছে আৰু ১৭ ছেপ্টেম্বৰত মনোনয়ন পত্ৰসমূহ পৰীক্ষা কৰা হ'ব। প্ৰাৰ্থীসকলে ১৯ ছেপ্টেম্বৰলৈকে নিজৰ মনোনয়ন প্ৰত্যাহাৰ কৰিব পাৰিব। ইয়াৰ পিছত ৬ অক্টোবৰত আটাইকেইটা সমষ্টিতে ভোটগ্ৰহণ অনুষ্ঠিত হ'ব আৰু ৯ অক্টোবৰত ভোটগণনা কৰা হ'ব।
উল্লেখযোগ্য যে, বিগত ২০২৪ চনৰ নিৰ্বাচনত নগাঁও লোকসভা সমষ্টিৰ পৰা ৰাষ্ট্ৰীয় কংগ্ৰেছৰ প্ৰাৰ্থী প্ৰদ্যুৎ বৰদলৈয়ে প্ৰতিদ্বন্দ্বিতা কৰি জয়লাভ কৰিছিল। কিন্তু পৰৱৰ্তী সময়ত, অৰ্থাৎ ২০২৬ চনৰ ১০ ফেব্ৰুৱাৰীত তেওঁ সাংসদ পদ ত্যাগ কৰে। ইয়াৰ পিছত ১৮ মাৰ্চত তেওঁ আনুষ্ঠানিকভাৱে বিজেপি দলত যোগদান কৰে আৰু দিছপুৰ বিধানসভা সমষ্টিৰ পৰা নিৰ্বাচনত অৱতীৰ্ণ হৈ বিধায়ক হিচাপে আসনখন দখল কৰিবলৈ সক্ষম হয়। প্ৰদ্যুৎ বৰদলৈৰ পদত্যাগৰ পিছৰে পৰাই নগাঁৱৰ এই লোকসভা আসনখন খালী হৈ আছিল আৰু এতিয়া সেই স্থানতেই উপ-নিৰ্বাচন অনুষ্ঠিত হ'বলৈ গৈ আছে।
ইফালে, দেশৰ আন দুখন খালী হৈ থকা লোকসভা আসন মেঘালয়ৰ শ্বিলং আৰু পশ্চিমবংগৰ বাছিৰহাটৰ বাবে আয়োগে এতিয়াও ভোটগ্ৰহণৰ দিন ধাৰ্য কৰা নাই। চলিত বৰ্ষৰ ফেব্ৰুৱাৰী মাহত ভইচ অৱ দ্য পিপল পাৰ্টিৰ সাংসদ ৰিকি এন্দ্ৰু জে চিংকনৰ মৃত্যুৰ ফলত শ্বিলঙৰ আসনখন খালী হৈ পৰিছিল। আনহাতে, বিগত ২০২৪ চনৰ ছেপ্টেম্বৰ মাহত তৃণমূল কংগ্ৰেছৰ সাংসদ হাজী শ্বেখ নুৰুল ইছলামৰ মৃত্যুৰ পিছৰে পৰা পশ্চিমবংগৰ বাছিৰহাটৰ সমষ্টিটো খালী হৈ আছে।
