কলকাতা / চেন্নাই
পশ্চিমবংগ আৰু তামিলনাডুত বৃহস্পতিবাৰে স্বাধীনতাৰ পিছত সৰ্বাধিক ভোটদানৰ অভিলেষ স্থাপন হ’ল। মুখ্য নিৰ্বাচনী আয়ুক্ত জ্ঞানেশ কুমাৰে জনোৱা মতে, পশ্চিমবংগত ৯২.২৫ শতাংশ আৰু তামিলনাডুত ৮৫.০৩ শতাংশ ভোটদান নথিভুক্ত হৈছে। পশ্চিমবংগত কিছুমান স্থানত বিচ্ছিন্ন হিংসাৰ ঘটনা ঘটিলেও আৰু তামিলনাডুত বহু-পক্ষীয় কঠিন প্ৰতিদ্বন্দ্বিতা চলিলেও দুয়োখন ৰাজ্যতে ভোটাৰসকলৰ ব্যাপক অংশগ্ৰহণ লক্ষ্য কৰা গৈছে।
পশ্চিমবংগত বিধানসভা নিৰ্বাচনৰ প্ৰথম পৰ্যায় সন্ধিয়া ৬ বজাত সমাপ্ত হয়। এই সময়ছোৱাত বিভিন্ন স্থানত তৃণমূল কংগ্ৰেছ আৰু বিজেপি কৰ্মীৰ মাজত সংঘৰ্ষৰ খবৰ পোৱা যায়। মুৰ্শিদাবাদত হুমায়ুন কবীৰৰ আম জনতা উন্নয়ন পাৰ্টি (AJUP) সমৰ্থক আৰু তৃণমূল কৰ্মীৰ মাজত সংঘাত হয়। দক্ষিণ দিনাজপুৰত এজন বিজেপি প্ৰাৰ্থীক আক্রমণ কৰাৰ অভিযোগ উঠিছে।
তামিলনাডুত একমাত্ৰ পৰ্যায়ত অনুষ্ঠিত হোৱা নিৰ্বাচনত দিনটোত অবিৰত ভোটদান চলি আছিল। সন্ধিয়া ৭ বজালৈকে প্ৰায় ৫.৬৭ কোটি যোগ্য ভোটাৰৰ মাজত ৮৫.০৩ শতাংশ ভোটদান নথিভুক্ত হয়। ৰাজ্যখনত শাসক ডিএমকে, এআইএডিএমকে-বিজেপি জোঁট আৰু অভিনেতা বিজয়ৰ টিভিকেৰ মাজত ত্ৰিমুখী প্ৰতিদ্বন্দ্বিতা চলিছে। মুখ্য নিৰ্বাচনী আয়ুক্ত জ্ঞানেশ কুমাৰে এই ভোটদানৰ পৰিসৰক ১৯৪৭ চনৰ পিছত এক ঐতিহাসিক উচ্চতা বুলি বৰ্ণনা কৰি ইয়াক ভোটাৰৰ সক্ৰিয় অংশগ্ৰহণৰ স্পষ্ট প্ৰমাণ বুলি কয়।
জ্ঞানেশ কুমাৰে ভাৰতীয় গণতন্ত্ৰৰ বাবে এইটো এক গুৰুত্বপূৰ্ণ মুহূৰ্ত বুলি উল্লেখ কৰি তেওঁ কয় — “স্বাধীনতাৰ পিছত পশ্চিমবংগ আৰু তামিলনাডুত সৰ্বাধিক ভোটদানৰ হাৰ — নিৰ্বাচন আয়োগে দুয়োখন ৰাজ্যৰ প্ৰতিজন ভোটাৰক ধন্যবাদ জনাইছে।”
পশ্চিমবংগত একাধিক কেন্দ্ৰত সংঘৰ্ষ, ভোটাৰৰ ওপৰত ভয় দেখুওৱা আৰু প্ৰাৰ্থীৰ ওপৰত আক্রমণৰ অভিযোগ উত্থাপিত হৈছে। ইয়াৰ ভিতৰত দুজন বিজেপি প্ৰাৰ্থীও আছে। এইবোৰৰ মাজতো নিৰ্বাচন আয়োগে কয় যে ভোটদান “মুঠতে শান্তিপূৰ্ণভাৱে” সম্পন্ন হৈছে আৰু ঘটনাবোৰৰ ওপৰত বিশদ প্ৰতিবেদন বিচৰা হৈছে।
পশ্চিমবংগৰ মুখ্যমন্ত্ৰী মমতা বেনাৰ্জীয়ে কয় যে প্ৰথম পৰ্যায়ৰ ভোটদানৰ ধৰণেৰে তৃণমূল কংগ্ৰেছ ইতিমধ্যে জয়ৰ পথত আগবাঢ়িছে। তেওঁ কয়, “মানুহৰ মনোভাৱৰ পৰা মই বুজিছোঁ যে আজি হোৱা ভোটদানৰ ভিত্তিত আমি ইতিমধ্যে জয়ৰ স্থিতিত আছোঁ।”
প্ৰধানমন্ত্ৰী নৰেন্দ্ৰ মোদীয়ে কৃষ্ণনগৰত এখন সভাত ভাষণ দি পশ্চিমবংগত উচ্চ ভোটদানৰ বাবে ভোটাৰসকলক অভিনন্দন জনায় আৰু ইয়াক “পৰিবৰ্তনৰ বাবে ব্যাপক জনসমৰ্থন” বুলি বৰ্ণনা কৰে। তেওঁ লগতে কয়, “যোৱা ৫০ বছৰৰ নিৰ্বাচনী ইতিহাসত এইটো প্ৰথমবাৰ য’ত হিংসাৰ ঘটনা সৰ্বনিম্ন আছিল। এই অভিলেষ ভোটদানে স্পষ্ট কৰি দিয়ে যে পশ্চিমবংগৰ ভোটাৰসকলে ইতিমধ্যে পৰিবৰ্তনৰ সিদ্ধান্ত লৈছে।”
মুৰ্শিদাবাদত হুমায়ুন কবীৰৰ AJUP আৰু তৃণমূল কংগ্ৰেছ সমৰ্থকৰ মাজত সংঘৰ্ষ তীব্ৰ ৰূপ লয়, যাৰ ফলত আৰক্ষী আৰু কেন্দ্ৰীয় বাহিনীয়ে লাঠিচাৰ্জ কৰি ভিৰ ছত্রভঙ্গ দিয়াবলগীয়া হয়। এই হিংসাত কেইবাখনো যানবাহন ক্ষতিগ্ৰস্ত হয়।
দক্ষিণ দিনাজপুৰৰ কুমাৰগঞ্জ বিধানসভা সমষ্টিৰ বিজেপি প্ৰাৰ্থী সুবেন্দু সৰকাৰে বুথ জ্যামিংৰ অভিযোগ উত্থাপন কৰি এটা ভোটগ্ৰহণ কেন্দ্ৰলৈ যোৱাৰ পাছত তৃণমূল কৰ্মীৰ দ্বাৰা আক্রমণৰ শিকাৰ হোৱা বুলি অভিযোগ কৰে।
তামিলনাডুত চেন্নাইত সন্ধিয়া ৭ বজালৈকে ৮৩.০৯ শতাংশ ভোটদান হয়, মাদুৰাইত ৮০.১৫ শতাংশ, কোইম্বাটুৰত ৮৪.৪০ শতাংশ আৰু তিৰুচিৰাপল্লী জিলাত ৮৫.০৪ শতাংশ ভোটদান নথিভুক্ত হয়। চেন্নাইৰ কোলাথুৰ সমষ্টিত, য’ত মুখ্যমন্ত্ৰী এম কে ষ্টালিনে প্ৰতিদ্বন্দ্বিতা কৰিছে, সন্ধিয়া ৬ বজালৈকে ৮৫.৬৩ শতাংশ ভোটদান হয়।
চেলেমৰ এডাপ্পাডি সমষ্টিত ৯১.৬১ শতাংশ ভোটদান হয়। এআইএডিএমকে সাধাৰণ সম্পাদক তথা প্ৰাক্তন মুখ্যমন্ত্ৰী এডাপ্পাডি কে পালানিস্বামীয়ে নিজৰ শক্তিশালী গঢ়ত প্ৰতিদ্বন্দ্বিতা কৰিছে, য’ত তেওঁ ডিএমকেৰ পৰা কঠিন প্ৰত্যাহ্বানৰ সন্মুখীন হৈছে। অভিনেতা বিজয়ৰ টিভিকেৰ প্ৰাৰ্থীৰ নথি-পত্ৰৰ কাৰিকৰী কাৰণত বাতিল হোৱাৰ পাছত দলটোৱে এজন নিৰ্দলীয় প্ৰাৰ্থীক সমৰ্থন আগবঢ়াইছে।
প্ৰাক্তন তামিলনাডু বিজেপি সভাপতি কে আন্নামালাইয়ে নিৰ্বাচনত ব্যাপক অনিয়মৰ অভিযোগ উত্থাপন কৰি ভোটাৰৰ বাবে যথেষ্ট যাতায়াত ব্যৱস্থা নকৰাৰ বাবে নিৰ্বাচন আয়োগক সমালোচনা কৰে। তেওঁ অভিযোগ কৰে যে ভোটৰ বিনিময়ত টকা আৰু সোন বিতৰণ কৰা হৈছে।
তামিলনাডুৰ কিছুমান ভোটগ্ৰহণ কেন্দ্ৰতো বিচ্ছিন্ন হিংসাৰ ঘটনা ঘটিছে। মাদুৰাইৰ কিজাভাসল আৰু তিৰুভন্নামালাইৰ কালাসাপাক্কামত বুথ এজেণ্টসকলৰ মাজত সংঘৰ্ষ হয়। এটা ঘটনাত এজন নিৰ্দলীয় প্ৰাৰ্থীৰ এজেণ্টে কন্ট্ৰোল ইউনিট ক্ষতিগ্ৰস্ত কৰাৰ অভিযোগ উঠিছে, যাক পিছত সলনি কৰা হয়।
তিৰুপট্টুৰত এজন টিভিকে সমৰ্থকে নিজে ইভিএমত ভোট দিয়াৰ ভিডিঅ’ ৰেকৰ্ড কৰি সামাজিক মাধ্যমত প্ৰচাৰ কৰে, যাৰ বাবে পিছত আৰক্ষীয়ে তেওঁক গ্ৰেপ্তাৰ কৰে।
ইফালে চেন্নাই, কাঞ্চিপুৰম, নামাক্কাল আৰু কৃষ্ণগিৰি আদি বহু নগৰ আৰু চহৰত নতুনকৈ বিবাহিত দম্পতীয়ে বিবাহৰ পোছাক পৰিধান কৰি ভোটদান কেন্দ্ৰত উপস্থিত হৈ নিজৰ ভোটাধিকাৰ সাব্যস্ত কৰে।
