দেশৰ সুৰক্ষা আৰু সাৰ্বভৌমত্বৰ স্বাৰ্থত নিজৰ প্ৰাণকো তুচ্ছ জ্ঞান কৰা এজন বীৰৰ কাহিনী এয়া। ভাৰতৰ নিৰাপত্তা আৰু জাতীয় স্বাৰ্থ ৰক্ষাত আগবঢ়োৱা অসাধাৰণ সাহস, বীৰত্ব আৰু কৰ্তব্যনিষ্ঠাৰ স্বীকৃতিস্বৰূপ ভাৰতীয় বায়ুসেনাৰ স্কোৱাড্ৰন লিডাৰ ৰিজৱান মালিকক মৰ্যাদাপূৰ্ণ 'বীৰ চক্ৰ' প্ৰদান কৰা হৈছে। যুদ্ধকালীন পৰিস্থিতিত শত্ৰুৰ সন্মুখীন হৈ অনন্য সাহসিকতাৰ পৰিচয় দিয়া সেনাসদস্যক এই সন্মানেৰে বিভূষিত কৰা হয়। ৰিজৱান মালিকৰ এই অৰ্জন আজি সমগ্ৰ দেশৰ বাবেই গৌৰৱৰ বিষয় হৈ পৰিছে, লগতে মণিপুৰৰ জনসাধাৰণৰ বাবে ই কঢ়িয়াই আনিছে এক বিশেষ আনন্দ আৰু গৌৰৱৰ মুহূৰ্ত।
মণিপুৰৰ প্ৰাক্তন মুখ্যমন্ত্ৰী এন. বীৰেন সিঙেও তেওঁক অভিনন্দন জনাই কয় যে, নিজৰ নিষ্ঠা, সাহস আৰু দেশসেৱাৰ জৰিয়তে ৰাজ্যখনৰ এজন সন্তানে দেশৰ অন্যতম সৰ্বোচ্চ যুদ্ধকালীন বীৰত্বৰ সন্মান অৰ্জন কৰা দেখিবলৈ পোৱাটো সমগ্ৰ ৰাজ্যবাসীৰ বাবেই এক অত্যন্ত গৌৰৱ আৰু আনন্দৰ বিষয়।
মৃত্যুক প্ৰত্যাহ্বান জনোৱা এক অভিযান
সেই ৰাতি আছিল ঘোৰ অন্ধকাৰ। আকাশত সক্ৰিয় হৈ আছিল শত্ৰুপক্ষৰ ড্ৰোন আৰু তলত মোতায়েন কৰা আছিল অত্যাধুনিক এয়াৰ ডিফেন্স ব্যৱস্থা। এনে এক জটিল পৰিস্থিতিত যিকোনো যুদ্ধবিমানৰ বাবেই কোনো অভিযান সফলতাৰে সম্পন্ন কৰাটো অত্যন্ত কঠিন বুলি গণ্য কৰা হয়। কিন্তু স্কোৱাড্ৰন লিডাৰ ৰিজৱান মালিকে বিপদৰ প্ৰতি কোনো ভ্ৰূক্ষেপ নকৰি নিজৰ সুখয় Su-30MKI যুদ্ধবিমান লৈ অভিযানৰ বাবে উৰা মাৰে। শত্ৰুৰ চোকা নজৰ, ৰাডাৰ লক, ড্ৰোনৰ জাক আৰু এয়াৰ ডিফেন্স নেটৱৰ্কৰ মাজেৰেও তেওঁ নিজৰ বিমানখন নিৰাপদে লক্ষ্যস্থানত উপনীত কৰায় আৰু পাকিস্তানত অৱস্থিত সন্ত্ৰাসবাদীৰ ঘাটিসমূহৰ ওপৰত নিৰ্ভুলভাৱে ক্ষেপণাস্ত্ৰ নিক্ষেপ কৰে। তেওঁৰ এই অসাধাৰণ সাহসিকতা আৰু পেছাদাৰী দক্ষতাৰ স্বীকৃতিস্বৰূপেই তেওঁক 'বীৰ চক্ৰ'ৰে সন্মানিত কৰা হৈছে।
মণিপুৰৰ এখন সৰু গাঁৱৰ পৰা ভাৰতীয় বায়ুসেনালৈ যাত্ৰা
স্কোৱাড্ৰন লিডাৰ ৰিজৱান মালিকৰ জন্ম ১৯৯৫ চনত মণিপুৰৰ এটা সাধাৰণ পৰিয়ালত হৈছিল। তেওঁৰ পৈতৃক গাঁওখনৰ নাম আছিল কেইখু, যিখন ইম্ফল ইষ্ট জিলাত অৱস্থিত। মণিপুৰৰ এখন স্থানীয় বিদ্যালয়তে তেওঁৰ প্ৰাথমিক শিক্ষা সম্পন্ন হৈছিল। সৰুৰে পৰাই অনুশাসন আৰু দেশসেৱাৰ প্ৰতি তেওঁৰ বিশেষ আগ্ৰহ আছিল। তেওঁৰ মেধা আৰু যোগ্যতালৈ লক্ষ্য ৰাখি তেওঁক সৈনিক স্কুলত নামভৰ্তি কৰোৱা হৈছিল, য’ৰ পৰা তেওঁ পৰৱৰ্তী শিক্ষা গ্ৰহণ কৰে।
ইয়াৰ পিছত তেওঁ দেশৰ মৰ্যাদাপূৰ্ণ ৰাষ্ট্ৰীয় প্ৰতিৰক্ষা একাডেমী চমুকৈ NDA-লৈ নিৰ্বাচিত হয়। NDA-ত প্ৰশিক্ষণ সমাপ্ত কৰাৰ পিছত ২০১৫ চনৰ ২০ জুন তাৰিখে তেওঁক ভাৰতীয় বায়ুসেনাৰ ফ্লাইং ব্ৰাঞ্চত Su-30MKI ফাইটাৰ পাইলট হিচাপে কমিচন প্ৰদান কৰা হয়। তেওঁ ভাৰতীয় বায়ুসেনাৰ ১৯৫ তম ফ্লাইং কোৰ্চৰ সদস্য আছিল। অসাধাৰণ কৰ্মদক্ষতা আৰু নেতৃত্বগুণৰ বাবেই ২০২১ চনত তেওঁ স্কোৱাড্ৰন লিডাৰ পদলৈ পদোন্নতি লাভ কৰে।
ভাৰতীয় বায়ুসেনাৰ স্কোয়াড্ৰন লিডাৰ ৰিজৱান মালিক
মেইটেই পাংগল সম্প্ৰদায়ৰ সন্তান ৰিজৱান মালিক
ৰিজৱান মালিক মণিপুৰৰ মেইটেই পাংগল সম্প্ৰদায়ৰ অন্তৰ্গত। এই সম্প্ৰদায়টোক মুছলমান মেইটেই সম্প্ৰদায় বুলিও জনা যায়। মণিপুৰৰ সামাজিক আৰু সাংস্কৃতিক জীৱনত এই সম্প্ৰদায়ৰ গুৰুত্বপূৰ্ণ ভূমিকা আছে। তেওঁৰ এই সফলতা কেৱল ব্যক্তিগত অৰ্জনতেই আৱদ্ধ থকা নাই, বৰঞ্চ সমগ্ৰ মেইটেই পাংগল সম্প্ৰদায়ৰ বাবেও ই এক গৌৰৱৰ বিষয় হৈ পৰিছে। ৰাজ্যখনৰ যুৱপ্ৰজন্মৰ বাবে তেওঁ এক নতুন অনুপ্ৰেৰণাৰ উৎস হিচাপে থিয় দিছে।
২০২৫ চনৰ ৭ মে’ত পহেলগামত সংঘটিত সন্ত্ৰাসবাদীৰ আক্ৰমণত ২৬ জন নিৰীহ নাগৰিক নিহত হৈছিল। এই জঘন্য ঘটনাৰ পিছত ভাৰতে সন্ত্ৰাসবাদৰ বিৰুদ্ধে কঠোৰ উত্তৰ দিয়াৰ সিদ্ধান্ত গ্ৰহণ কৰে। সেই প্ৰেক্ষাপটতেই আৰম্ভ হয় 'অপাৰেচন সেন্দূৰ', যাৰ অধীনত ভাৰতীয় সেনাবাহিনী আৰু বায়ুসেনাই পাকিস্তান আৰু পাকিস্তান অধিকৃত কাশ্মীৰ (PoK)ত অৱস্থিত সন্ত্ৰাসবাদীৰ আন্তঃগাঁথনিসমূহক লক্ষ্য কৰি লয়।
