নতুন দিল্লী
২০২০ চনৰ উত্তৰ-পূব দিল্লী সংঘৰ্ষৰ আঁৰৰ কথিত বৃহত্তৰ ষড়যন্ত্ৰৰ সৈতে জড়িত ইউ এ পি এ গোচৰৰ জামিন বিচাৰি শনিবাৰে জে এন ইউৰ প্ৰাক্তন ছাত্ৰ শ্বাৰ্জিল ইমামে উচ্চতম ন্যায়ালয়ৰ কাষ চাপিছে। তেওঁ দিল্লী উচ্চ ন্যায়ালয়ৰ ন্যায়াধীশ নবীন চাওলা আৰু শলিন্দৰ কৌৰৰ বিভাগীয় বিচাৰপীঠে তেওঁক জামিনৰ পৰা বঞ্চিত কৰা ২ ছেপ্টেম্বৰৰ আদেশক প্ৰত্যাহ্বান জনাইছে।
উচ্চতম ন্যায়ালয়ত শুনানিৰ বাবে গোচৰটো তালিকাভুক্ত হোৱা নাই। ২০২০ চনৰ ২৮ জানুৱাৰীত ইমামক গ্ৰেপ্তাৰ কৰা হৈছিল।
মঙলবাৰে দিল্লী উচ্চ ন্যায়ালয়ে সহ-অভিযুক্ত উমৰ খালিদ, অথৰ খান, খালিদ ছাইফী, মহম্মদ ছালিম খান, শ্বিফা-উৰ-ৰহমান, মীৰণ হাইদৰ, গুলফিছা ফাতিমা আৰু ছাদাব আহমেদৰও জামিন অস্বীকাৰ কৰিছিল। ২০২০ চনৰ জানুৱাৰীৰ পৰা আগষ্টৰ ভিতৰত গ্ৰেপ্তাৰ হোৱাৰ পিছৰে পৰা পাঁচ বছৰৰ ভিতৰত ৯ জনেই জিম্মাত আছে।
আদালতে নিজৰ আদেশত লক্ষ্য কৰিছিল যে, প্ৰথম দৃষ্টিত, কথিত ষড়যন্ত্ৰত ইমাম আৰু উমৰ খালিদৰ ভূমিকা “গুৰুতৰ” যেন দেখা গৈছে, লক্ষ্য কৰিছিল যে দুয়োজনে মুছলমান সম্প্ৰদায়ৰ সদস্যসকলক সংগঠিত কৰাৰ লক্ষ্যৰে সাম্প্ৰদায়িক দিশত ভাষণ দিছিল।
আৰক্ষীৰ অভিযোগ যে ২০১৯-২০ চনত সমগ্ৰ দিল্লীত CAA বিৰোধী প্ৰতিবাদৰ আয়োজন কৰি সন্ত্ৰাসবাদী কাৰ্য্য সংঘটিত কৰাৰ বৃহত্তৰ ষড়যন্ত্ৰৰ অংশ আছিল অভিযুক্তসকল। বিচাৰ বিভাগে দাবী কৰে যে এই পৰিকল্পনাত প্ৰতিবাদস্থলী স্থাপন কৰা, ছাত্ৰ-ছাত্ৰী আৰু বাসিন্দাসকলক সংগঠিত কৰা, মুছলমান সংখ্যাগৰিষ্ঠ অঞ্চলত পেমফ্লেট বিতৰণ কৰা, দেশজুৰি ভাষণ প্ৰদান কৰা, ধন সংগ্ৰহ কৰা আৰু হিংসাৰ উচটনি দিবলৈ সামগ্ৰী মজুত কৰা আদিত তেওঁলোক জতড়িত আছিল।
এই এফ আই আৰত ইউ এ পি এ, আই পি চি, অস্ত্ৰ আইন, আৰু ৰাজহুৱা সম্পত্তি আইন অনুসৰি ষড়যন্ত্ৰ, উচটনি, পুঁজি সংগ্ৰহ, সংঘৰ্ষ, ৰাজহুৱা কৰ্মচাৰীক আক্ৰমণ আৰু চৰকাৰী সম্পত্তিৰ ক্ষতি কৰাৰ অভিযোগ অন্তৰ্ভুক্ত কৰা হৈছে।
উচ্চ ন্যায়ালয়ে জোৰ দি কয় যে ইউ এ পি এৰ ৪৩ডি(৫) ধাৰাত জামিনত বাধা আৰোপ কৰা হৈছে। আদালতে কয় যে অভিযোগসমূহ প্ৰাইমা ফেচি সঁচা যেন লাগিলে জামিন প্ৰদান কৰিব নোৱাৰি। ইয়াৰ উপৰিও উল্লেখ কৰা হৈছে যে সাক্ষীৰ সাক্ষ্য এতিয়াও চলি আছে আৰু সাক্ষীৰ ওপৰত চাপ দিয়াৰ আশংকা এতিয়াও আছে।
দীৰ্ঘদিনীয়া কাৰাদণ্ডৰ ওপৰত ভিত্তি কৰি দিয়া যুক্তি নাকচ কৰা হয়, আদালতে কয় যে ইউ এ পি এৰ গোচৰত জামিনৰ বাবে কেৱল দীৰ্ঘদিনীয়া জিম্মাত থকাটোৱেই যথেষ্ট নহয়, বিশেষকৈ তদন্তৰ জটিলতাক লক্ষ্য কৰিলে, য’ত ৩,০০০ পৃষ্ঠাতকৈ অধিক চাৰ্জ শ্বীট, ৩০,০০০ পৃষ্ঠাৰ ডিজিটেল প্ৰমাণ, চাৰিটা পৰিপূৰক চাৰ্জ শ্বীট আৰু ৫৮জন সাক্ষী অন্তৰ্ভুক্ত কৰা হৈছে।
আদালতে এইটোও লক্ষ্য কৰে যে বিচাৰ প্ৰক্ৰিয়াটো স্বাভাৱিক গতিৰে আগবাঢ়িব লাগে, কিয়নো ইয়াক খৰখেদা কৰিলে অভিযুক্ত আৰু ৰাষ্ট্ৰ উভয়ৰে ক্ষতি হ’ব পাৰে। উচ্চ ন্যায়ালয়ে এই সিদ্ধান্তত উপনীত হয় যে “সামগ্ৰিকভাৱে সমাজৰ স্বাৰ্থ আৰু সুৰক্ষা”ক অভিযুক্তৰ অধিকাৰৰ বিপৰীতে তুলনা কৰিব লাগিব।
