গুৱাহাটী
অসম তথা উত্তৰ-পূৰ্বাঞ্চলৰ বাসিন্দাসকলে অতি সোনকালে দিল্লী বা মুম্বাইলৈ যাত্ৰা নকৰাকৈ ভিছা আবেদনৰ বাবে বায়’মেট্ৰিক তথ্য দাখিল কৰিব পাৰিব। গুৱাহাটীত এক বিশেষ ভিছা সুবিধা কেন্দ্ৰ স্থাপনৰ বাবে VFS গ্ল’বেলে চুক্তি সম্পাদন কৰাৰ পিছতে এই সুবিধা উপলব্ধ হ’ব৷
মুখ্যমন্ত্ৰী হিমন্ত বিশ্ব শৰ্মাই ২০ নৱেম্বৰত ছ’চিয়েল মিডিয়াযোগে এই কথা ঘোষণা কৰি অঞ্চলটোৰ লোকসকলৰ বাবে ই এক উল্লেখযোগ্য সকাহ বুলি অভিহিত কৰে৷ যিসকলে ভিছা সেৱা লাভৰ বাবে দীঘলীয়া যাত্ৰাৰ সন্মুখীন হৈ আহিছিল, তেওঁলোক উপকৃত হ’ব৷
এই কেন্দ্ৰটোৱে ৬০ খনতকৈও অধিক দেশৰ বাবে ভিছা প্ৰক্ৰিয়াকৰণ সেৱা আগবঢ়াব৷ আনহাতে, কেন্দ্ৰটোৱে কোনবোৰ দেশক সামৰি ল'ব আৰু কেন্দ্ৰটো কেতিয়া কাৰ্যকৰী হ'ব সেই সম্পৰ্কে বিতং তথ্য বৰ্তমানো প্ৰকাশ কৰা হোৱা নাই।
বিশ্বজুৰি ভিছা আবেদন কেন্দ্ৰ পৰিচালনা কৰা VFS গ্ল’বেলে নীতিগতভাৱে এই প্ৰস্তাৱত সন্মতি প্ৰকাশ কৰিছে। কেন্দ্ৰটোৱে সামৰি লোৱা দেশৰ তালিকা আৰু কেন্দ্ৰটো উদ্বোধন সম্পৰ্কীয় অধিক তথ্য পৰৱৰ্তী সময়ত আগবঢ়োৱা হ’ব বুলি মুখ্যমন্ত্ৰীয়ে জানিবলৈ দিয়ে। এই পদক্ষেপে উত্তৰ-পূৰ্বাঞ্চলৰ ৰাজ্যসমূহৰ আবেদনকাৰীৰ বাবে ভ্ৰমণ ব্যয় আৰু সময় যথেষ্ট হ্ৰাস কৰিব বুলি আশা কৰা হৈছে৷
