নতুন দিল্লী
বেলজিয়ামৰ প্ৰধানমন্ত্ৰী বাৰ্ট ডি ৱেভাৰে ভাৰতৰ প্ৰধানমন্ত্ৰী নৰেন্দ্ৰ মোদীৰ সুদূৰপ্ৰসাৰী চিন্তাধাৰা আৰু বিচক্ষণ সিদ্ধান্ত গ্ৰহণ প্ৰক্ৰিয়াক ভূয়সী প্ৰশংসা কৰি তেওঁক বিশ্বৰ ‘অন্যতম অনুপ্ৰেৰণাদায়ী নেতা’ হিচাপে অভিহিত কৰিছে। শুকুৰবাৰে মুম্বাইত ভাৰত আৰু ইউৰোপীয় সংঘৰ মুক্ত বাণিজ্য চুক্তি সন্দৰ্ভত আয়োজিত এখন উচ্চপৰ্যায়ৰ আলোচনাত অংশগ্ৰহণ কৰি বেলজিয়ামৰ প্ৰধানমন্ত্ৰীগৰাকীয়ে এই তাৎপৰ্যপূৰ্ণ মন্তব্য কৰে।
ক’ভিড মহামাৰীৰ বাবে পূৰ্বৰ ভাৰত ভ্ৰমণ বাতিল কৰিবলগীয়া হোৱাৰ কথা স্মৰণ কৰি তেওঁ কয় যে অৱশেষত ভাৰতত উপস্থিত হ’বলৈ পোৱাটো তেওঁৰ বাবে এক গৌৰৱৰ বিষয় আৰু নতুন দিল্লীত প্ৰধানমন্ত্ৰী মোদীৰ সৈতে হোৱা সাক্ষাৎ তেওঁৰ বাবে এক অসাধাৰণ সন্মান।
বিশ্বৰ সাম্প্ৰতিক ৰাজনৈতিক প্ৰেক্ষাপটৰ কথা উল্লেখ কৰি বাৰ্ট ডি ৱেভাৰে কয় যে বৰ্তমান সময়ত বিশ্বৰ বহু আগশাৰীৰ নেতাৰ ভাষণত কেৱল ভাবুকি, ভয় আৰু অস্বস্তিৰ সুৰহে প্ৰতিফলিত হয়। ইয়াৰ সম্পূৰ্ণ বিপৰীতে প্ৰধানমন্ত্ৰী মোদীৰ বক্তব্যত এক গভীৰ অনুপ্ৰেৰণা আৰু ইতিবাচক দিকনিৰ্দেশনা বিচাৰি পোৱা যায়।
মোদীৰ বলিষ্ঠ নেতৃত্বৰ প্ৰতি আস্থা প্ৰকাশ কৰি তেওঁ কয়, "মোদীয়ে যেতিয়া কথা কয়, তেতিয়া স্বতঃস্ফূৰ্তভাৱে অনুভৱ হয় যে তেওঁ যি কৈছে, আমিও সেইটোৱেই কৰা উচিত। তেওঁ সঁচাকৈয়ে এগৰাকী বিচক্ষণ আৰু দূৰদৰ্শী নেতা।"
একেখন মঞ্চতে ভাষণ প্ৰদান কৰি বেলজিয়ামৰ প্ৰধানমন্ত্ৰীগৰাকীয়ে মাৰ্কিন ৰাষ্ট্ৰপতি ড’নাল্ড ট্ৰাম্পৰ ‘খামখেয়ালি’ শুল্ক নীতি আৰু সঘনাই সলনি হৈ থকা বাণিজ্য নীতিকো পৰোক্ষভাৱে কঠোৰ সমালোচনা কৰে। মুক্ত বজাৰ আৰু সুদৃঢ় অৰ্থনৈতিক অংশীদাৰিত্বৰ সপক্ষে মত পোষণ কৰি তেওঁ কয় যে বৰ্তমান বিশ্বত এনে কিছুমান কণ্ঠস্বৰ বৃদ্ধি পাইছে যিসকলে কেৱল বাণিজ্যৰ পথত হেঙাৰ সৃষ্টি কৰা, বজাৰ বন্ধ কৰা আৰু নতুন শুল্ক জাপি দিয়াৰহে পোষকতা কৰে। কোনো কোনো নেতাই সম্পূৰ্ণ খামখেয়ালিভাৱে সোমবাৰে এটা সিদ্ধান্ত গ্ৰহণ কৰি বুধবাৰে সেয়া প্ৰত্যাহাৰ কৰে আৰু শনিবাৰে পুনৰ একেটা সিদ্ধান্তকে জাপি দিয়ে বুলি তেওঁ ক্ষোভ প্ৰকাশ কৰে।
উল্লেখযোগ্য যে, ২০২৫ চনৰ ফেব্ৰুৱাৰী মাহত বেলজিয়ামৰ প্ৰধানমন্ত্ৰী হিচাপে কাৰ্যভাৰ গ্ৰহণ কৰাৰ পাছত এয়াই আছিল বাৰ্ট ডি ৱেভাৰৰ প্ৰথমটো চৰকাৰী ভাৰত ভ্ৰমণ। যোৱা ২ ছেপ্টেম্বৰত বেলজিয়ামৰ প্ৰতিৰক্ষা তথা বৈদেশিক বাণিজ্য মন্ত্ৰী থিও ফ্ৰাংকেন আৰু এটা গুৰুত্বপূৰ্ণ উচ্চপৰ্যায়ৰ প্ৰতিনিধি দলৰ সৈতে তেওঁ নতুন দিল্লীত উপস্থিত হৈছিল। এই ভ্ৰমণ দুয়োখন দেশৰ ভৱিষ্যতৰ অৰ্থনৈতিক আৰু কূটনৈতিক সম্পৰ্কৰ দিশৰ পৰা অতিশয় গুৰুত্বপূৰ্ণ হিচাপে বিবেচিত হৈছে।
দুয়োখন দেশৰ ৰাষ্ট্ৰপ্ৰধানৰ মাজত অনুষ্ঠিত হোৱা এই দ্বিপাক্ষিক আলোচনাত ভাৰত আৰু বেলজিয়ামে অনাগত পাঁচ বছৰৰ ভিতৰত পাৰস্পৰিক বাণিজ্য দুগুণলৈ বৃদ্ধি কৰাৰ এক অভিলাষী লক্ষ্য নিৰ্ধাৰণ কৰে। ইয়াৰ সমান্তৰালভাৱে প্ৰতিৰক্ষা খণ্ডৰ সহযোগিতা সুদৃঢ় কৰাৰ উদ্দেশ্যে দুয়োখন দেশে এখন ‘লেটাৰ অৱ ইনটেণ্ট’ত স্বাক্ষৰ কৰাৰ লগতে বেলজিয়ান ছিকিউৰিটি এণ্ড ডিফেন্স ইণ্ডাষ্ট্ৰি এছ’চিয়েচন আৰু ছ’চাইটী অৱ ইণ্ডিয়ান ডিফেন্স মেনুফেকচাৰ্ছৰ মাজতো এখন সুকীয়া বুজাবুজিৰ চুক্তি স্বাক্ষৰিত হয়।
বৰ্তমানৰ ক্ৰমান্বয়ে অস্থিৰ হৈ পৰা ভূ-ৰাজনৈতিক পৰিস্থিতিৰ মাজত বাণিজ্যিক অংশীদাৰিত্বত বৈচিত্ৰ্য অনাৰ যি ৰণনীতি ভাৰতে গ্ৰহণ কৰিছে, বেলজিয়ামৰ সৈতে হোৱা এই চুক্তিসমূহ তাৰেই এক সফল প্ৰতিফলন। ইয়াৰ জৰিয়তে দুয়োখন দেশৰ মাজত প্ৰতিৰক্ষা সহযোগিতা আৰু দ্বিপাক্ষিক সম্পৰ্ক অধিক শক্তিশালী হোৱাৰ পথ প্ৰশস্ত হৈছে।
.webp "নৱৰাত্ৰি উপলক্ষে দেৱী শৈলপুত্ৰীক প্ৰণাম জনাই দেশবাসীক শুভেচ্ছা প্ৰধানমন্ত্ৰী মোদীৰ")
