গুৱাহাটী
পাঁচদিন অতিক্ৰম কৰাৰ পিছতো অসমৰ বান পৰিস্থিতি অপৰিৱৰ্তিত হৈ আছে। মধ্য আৰু নামনি অসমৰ প্ৰায় ৩২খন জিলাত সৃষ্টি হোৱা ভয়ংকৰ বানপানীৰ ফলত ৰাজ্যবাসীয়ে সন্মুখীন হোৱা দুৰ্দশা আজিও অন্ত পৰা নাই।
অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ তথ্য অনুসৰি, অসমত বানপানীৰ ফলত ৫১ জন আৰু ভূমিস্খলনত ১১ জন লোকে এই পৰ্যন্ত মৃত্যুমুখত পৰিছে। ৩২ খন জিলাৰ প্ৰায় ৩১ লাখ লোক এই প্ৰলয়ংকৰী বানপানীত প্ৰভাৱিত হৈছে।
বজালী, বাকছা, বৰপেটা, বিশ্বনাথ, বঙাইগাঁও, কাছাৰ, দৰং, ধেমাজি, ধুবুৰী, ডিব্ৰুগড়, ডিমা হাচাও, গোৱালপাৰা, হোজাই, কামৰূপ, কামৰূপ (মেট্ৰ'), কাৰ্বি আংলং পশ্চিম, কৰিমগঞ্জ, কোকৰাঝাৰ, লখিমপুৰ, মাজুলী, মৰিগাঁও, নগাঁও, নলবাৰী, শিৱসাগৰ, শোণিতপুৰ, শিৱসাগৰ, দক্ষিণ শালমাৰা, তামুলপুৰ, তিনিচুকীয়া, উদালগুৰি জিলা বানপানীৰ দ্বিতীয়টো ঢৌত সৰ্বাধিক ক্ষতিগ্ৰস্ত হৈছে।
কেৱল বৰপেটা জিলাতে ৭.৩১ লাখতকৈ অধিক লোক আক্ৰান্ত হৈছে। তাৰ পিছতে দৰং জিলাত ৩.৫৪ লাখ, বজালীত ৩.৫২ লাখ, নগাঁৱত ২.৪১ লাখ, গোৱালপাৰাত ২.২১ লাখ, কামৰূপত ২.১৮ লাখ, নলবাৰীত ১.৬৫ লাখ, লখিমপুৰত ১.১৪ লাখ, হোজাইত ১.২৫ লাখ আৰু বঙাইগাঁৱত ১.১৩ লাখ বানত আক্ৰান্ত হৈছে।
অসম, মেঘালয়, অৰুণাচল প্ৰদেশ আৰু চুবুৰীয়া দেশ ভূটানত হোৱা ধাৰাসাৰ বৰষুণৰ ফলত ৰাজ্যখনৰ সকলো প্ৰধান নদীৰ জলপৃষ্ঠ বৃদ্ধি পোৱাৰ লগতে কেইবাঠাইতো বহু নৈ বিপদ সীমাৰ ওপৰেৰে বৈ গৈছে। বানাক্ৰান্ত জিলাকেইখনৰ প্ৰশাসনে ৫১৪টা সাহায্য শিবিৰ আৰু ৩০২টা সাহায্য বিতৰণ কেন্দ্ৰ স্থাপন কৰাৰ লগতে বৰ্তমান ১,৫৬,৩৬৫ জন লোক সাহায্য শিবিৰত আশ্ৰয় লৈ আছে।
উল্লেখ্য যে, যোৱা ২৪ ঘণ্টাত অসমত বানপানীত ডুবি ৮ জন লোকৰ মৃত্যু হৈছে। বৰপেটা আৰু কৰিমগঞ্জ জিলাত দুজনকৈ, দৰং, হাইলাকান্দি, নলবাৰী আৰু শোণিতপুৰ জিলাত এজনকৈ লোকৰ মৃত্যু হোৱাৰ লগতে এতিয়াও সন্ধানহীন হৈ আছে ৮ জন লোক।
ইফালে, প্ৰবল বৃষ্টিপাতৰ ফলত অসমৰ মুখ্য চহৰ গুৱাহাটীত সৃষ্টি হোৱা ভয়াবহ কৃত্ৰিম বান আৰু ভূমিস্খলন কিছু কমিছে যদিও মহানগৰবাসীৰ দূৰ্ভোগ এতিয়াও অব্যাহত আছে। পানী কমা স্থানসমূহ বোকা আৰু আৱৰ্জনাৰে ভৰি পৰাত গুৱাহাটীৰ বাসিন্দাসকল চৰম হাৰাশাস্তিৰ সন্মুখীন হৈছে।
কৃত্ৰিম বানপানীৰ ফলত জনসাধাৰণৰ সা-সম্পত্তিৰ ক্ষতিসাধন হোৱাৰ লগতে জনসাধাৰণৰ ক্ষয়-ক্ষতি হোৱাৰ প্ৰতি লক্ষ্য ৰাখি কামৰূপ জিলা প্ৰশাসনে বিদ্যালয়সমূহৰ বাবে এক পৰামৰ্শ জাৰি কৰিছে।
বানপানীত ক্ষতিগ্ৰস্ত ব্যক্তিগত আৰু চৰকাৰী বিদ্যালয়সমূহক তেওঁলোকৰ পৰীক্ষাসমূহ স্থগিত বা পুনৰ নিৰ্ধাৰণ কৰাৰ ক্ষেত্ৰত বিবেচনা কৰিবলৈ প্ৰশাসনে দেওবাৰে এক পৰামৰ্শ জাৰি কৰিছে।
তদুপৰি, প্ৰশাসনে জাৰি কৰা বিবৃতিত এইটোও কোৱা হৈছে যে যদি বিদ্যালয়ৰ ওচৰৰ অঞ্চলসমূহত পানী জমা হৈছে বা বিদ্যুতৰ সমস্যাৰ সন্মুখীন হৈছে বা বিদ্যুৎ আন্তঃগাঁথনিৰ ক্ষতি হৈছে, তেন্তে এনে পৰিস্থিতিত পৰীক্ষাসমূহ পিছুৱাই দিয়া অথবা পুনৰ নিৰ্ধাৰণ কৰা উচিত।
.webp "অসমৰ বান পৰিস্থিতি অপৰিৱৰ্তিত, অন্ত পৰা নাই ৰাজ্যবাসীৰ দূৰ্ভোগ")
