নতুন দিল্লী
ৰাজধানী দিল্লীত শেহতীয়াকৈ ইটোৰ পাছত সিটোকৈ অট্টালিকা খহি পৰাৰ ঘটনাই ব্যাপক চাঞ্চল্যৰ সৃষ্টি কৰি অহাৰ সময়তে পুনৰ এক অনুৰূপ অঘটনৰ খবৰ পোহৰলৈ আহিছে। সংবাদ সংস্থা পি টি আইৰ সূত্ৰই প্ৰকাশ কৰা অনুসৰি, বৃহস্পতিবাৰে পুৱাৰ ভাগত পুৰণি দিল্লীৰ ব্যস্ততাপূৰ্ণ চাৱৰী বজাৰৰ সমীপৰ পাভালন অঞ্চলত এটা নিৰ্মাণৰত তিনি মহলীয়া অট্টালিকা ভয়ংকৰ শব্দৰে খহি পৰে।
জানিব পৰা মতে, চাৱৰী বজাৰ মেট্ৰ’ ষ্টেচনৰ ঠিক বিপৰীতে অৱস্থিত শ্বীশ মহল গালী সত্তাৰাত পুৱা প্ৰায় ১০:১৫ বজাত এই শোকাৱহ ঘটনাটো সংঘটিত হয়। হঠাতে হোৱা এই দুৰ্ঘটনাই সমগ্ৰ অঞ্চলটোত তীব্ৰ আতংকৰ সৃষ্টি কৰে।
প্ৰাপ্ত তথ্য অনুসৰি, এই ভয়ংকৰ অঘটনটোত এতিয়ালৈকে দুজন লোকৰ কৰুণ মৃত্যু হোৱা বুলি নিশ্চিত কৰা হৈছে। আনহাতে, খহি পৰা অট্টালিকাটোৰ বিশাল ধ্বংসাৱশেষৰ তলত এতিয়াও কেইবাজনো লোক আবদ্ধ হৈ থকাৰ প্ৰবল আশংকা কৰা হৈছে।
ঘটনাৰ খবৰ পোৱা মাত্ৰকে দিল্লী অগ্নিনিৰ্বাপক বাহিনী আৰু প্ৰশাসনৰ লোক তৎপৰ হৈ পৰে। অগ্নিনিৰ্বাপক বাহিনীৰ বিষয়াসকলে জানিবলৈ দিয়া মতে, পৰিস্থিতিৰ সৈতে মোকাবিলা কৰিবলৈ দুৰ্ঘটনাস্থলীলৈ তৎকালীনভাৱে ছটাকৈ জৰুৰীকালীন ইউনিট প্ৰেৰণ কৰা হৈছে। ইয়াৰ ভিতৰত তিনিটা পানীৰ টেংকাৰ, এখন দ্ৰুত সঁহাৰি বাহন আৰু এটা বিশেষ ইনচিডেণ্ট ৰেচপন্স টিম অন্তৰ্ভুক্ত আছে। ইতিমধ্যে পৰিস্থিতি তদাৰক কৰিবলৈ কেইবাজনো জ্যেষ্ঠ বিষয়া ঘটনাস্থলীত উপস্থিত থাকি উদ্ধাৰ অভিযানৰ নেতৃত্ব দি আছে।
এই দুৰ্ঘটনা সন্দৰ্ভত ডি কে ৰয়ে নামৰ এগৰাকী জ্যেষ্ঠ বিষয়াই সংবাদ মাধ্যমৰ আগত প্ৰকাশ কৰে, ‘‘নিৰ্মাণৰত তিনি মহলীয়া অট্টালিকাটো হঠাতে খহি পৰাৰ ফলত সম্ভৱতঃ কেইবাজনো লোক ইয়াৰ ধ্বংসাৱশেষৰ মাজত আৱদ্ধ হৈ আছে। বৰ্তমান আমাৰ প্ৰধান লক্ষ্য হৈছে আৱদ্ধ লোকসকলক সুৰক্ষিতভাৱে উদ্ধাৰ কৰা। ইয়াৰ বাবে যুদ্ধকালীন তৎপৰতাৰে উদ্ধাৰ অভিযান চলাই থকা হৈছে।’’
প্ৰশাসন আৰু উদ্ধাৰকাৰী দলে বৰ্তমান ধ্বংসাৱশেষৰ মাজত আৱদ্ধ হৈ থকা লোকসকলক জীৱিত অৱস্থাত উদ্ধাৰ কৰাৰ বাবে অহৰ্নিশে প্ৰচেষ্টা অব্যাহত ৰাখিছে।
.webp)
