কেন্দ্ৰীয় গৃহমন্ত্ৰী অমিত শ্বাহে সোমবাৰে অসমৰ মুখ্যমন্ত্ৰী হিমন্ত বিশ্ব শৰ্মাৰ সৈতে হোৱা এক টেলিফোনীক বাৰ্তালাপ কৰি ধেমাজি জিলাৰ বান পৰিস্থিতিৰ বুজ লয়। ৰাজ্যখনে বানপীড়িত অঞ্চলসমূহত সাহায্য আৰু পুনৰ্সংস্থাপনৰ প্ৰচেষ্টা অব্যাহত ৰখাৰ সময়তে গৃহমন্ত্ৰীগৰাকীয়ে কেন্দ্ৰৰ পৰা সম্ভৱপৰ সকলো সহায়ৰ আশ্বাস প্ৰদান কৰে।
এই বিষয়ে 'এক্স'ত শ্বেয়াৰ কৰি মুখ্যমন্ত্ৰী হিমন্ত বিশ্ব শৰ্মাই কয় যে তেওঁ ধেমাজিত বৰ্তমান চলি থকা সাহায্য আৰু পুনৰ্সংস্থাপনমূলক পদক্ষেপসমূহৰ বিষয়ে গৃহমন্ত্ৰীক অৱগত কৰিছে।
মুখ্যমন্ত্ৰীগৰাকীয়ে কয়, "মাননীয় গৃহমন্ত্ৰী শ্ৰী অমিত শ্বাহ ডাঙৰীয়াই ফোন কৰি ধেমাজিৰ বান পৰিস্থিতিৰ বুজ লোৱাৰ বাবে মই তেওঁক ধন্যবাদ জনাইছো। মই তেওঁক বৰ্তমান চলি থকা সাহায্য আৰু পুনৰ্সংস্থাপনৰ কাম-কাজৰ বিষয়ে চমু আভাস দিছো। তেওঁ এই পৰিস্থিতিৰ মোকাবিলা কৰিবলৈ ভাৰত চৰকাৰৰ তৰফৰ পৰা আমাক সকলো ধৰণৰ সম্ভৱপৰ সহযোগিতা আৰু সাহায্যৰ আশ্বাস দিছে।"
অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ তথ্য অনুসৰি, ধেমাজিৰ চাৰিটা ৰাজহ চক্ৰৰ অধীনৰ ৬৯ খন গাঁৱৰ প্ৰায় ১৬,০০০ লোক বানৰ কবলত পৰিছে আৰু মুখ্যমন্ত্ৰীয়ে জিলাখনৰ এই বান পৰিস্থিতি নিৰন্তৰ পৰ্যবেক্ষণ কৰি আছে।
মুখ্যমন্ত্ৰী শৰ্মাই কয় যে বান প্ৰভাৱিত বাসিন্দাসকলৰ জৰুৰী সুৰক্ষা সুনিশ্চিত কৰিবলৈ আৰু তেওঁলোকৰ দীৰ্ঘম্যাদী পুনৰ্সংস্থাপনত সহায় কৰিবলৈ ৰাজ্য চৰকাৰে উপলব্ধ সকলো সম্পদ ব্যৱহাৰ কৰিছে।
তেওঁ লগতে কয় যে জলসম্পদ মন্ত্ৰী সুশান্ত বৰগোহাঁই আৰু ৰাজহ তথা দুৰ্যোগ ব্যৱস্থাপনা মন্ত্ৰী কেশৱ মহন্তক সাহায্য আৰু পুনৰ্সংস্থাপন কাৰ্যসূচীৰ তদাৰক কৰিবলৈ ধেমাজিতে বাহৰ পাতি থাকিবলৈ নিৰ্দেশ দিয়া হৈছে।
ইফালে, ধাৰাসাৰ বানপানী আৰু নদীৰ গৰাখহনীয়াৰ বাবে আৰ্চিপথাৰ আৰু চিমেন চাপৰি ষ্টেচনৰ মাজত থকা এখন ৰে’ল দলং ক্ষতিগ্ৰস্ত হোৱাৰ পিছত অঞ্চলটোৰ ৰে’ল যোগাযোগ ব্যাহত হৈ পৰিছে।
অবিৰত বৰষুণৰ ফলত হোৱা তীব্ৰ খহনীয়াৰ বাবে দলংখনৰ এটা খুঁটা অসুৰক্ষিত হৈ পৰাৰ পিছত উত্তৰ-পূব সীমান্ত ৰে’লৱেই পৰৱৰ্তী জাননী নিদিয়া পৰ্যন্ত মূৰ্কংচেলেক-চিলেপথৰ পথত ৰে’ল চলাচল বন্ধ কৰি দিছে।
উত্তৰ-পূব সীমান্ত ৰে’লৱেই জনোৱা মতে, নদীৰ পানী বাঢ়ি অহাৰ বাবে আগতীয়াকৈ ৰে’ল সেৱা বন্ধ কৰি থোৱা হৈছিল, যাৰ বাবে কোনো ৰে’লৰ ক্ষতি হোৱা নাই বা কোনো যাত্ৰী আহত হোৱা নাই। এই পথৰ ৰে’লসমূহ এতিয়া চিলাপথাৰৰ পৰাই চলিব আৰু চিলাপথাৰতে যাত্ৰা অন্ত কৰিব। ইফালে, মূৰ্কংচেলেক আৰু চিলাপথাৰৰ মাজত যাত্ৰীসকলক অনা-নিয়া কৰিবলৈ বাছৰ ব্যৱস্থা কৰা হৈছে।
আৱদ্ধ হৈ পৰা যাত্ৰীসকলক সহায় কৰিবলৈ ধেমাজি, চিলাপথাৰ আৰু মূৰ্কংচেলেক ৰে’লৱে ষ্টেচনত সাহায্য কেন্দ্ৰও খোলা হৈছে। আনহাতে জিলা প্ৰশাসন আৰু অসম চৰকাৰৰ সৈতে সহযোগিতা কৰি ৰে’ল কৰ্তৃপক্ষই পৰিস্থিতিৰ ওপৰত তীক্ষ্ণ নজৰ ৰাখিছে।
