নতুন দিল্লী
ভাৰতত থকা আমেৰিকাৰ দূতাবাসে শনিবাৰে ভিছাধাৰীসকলৰ বাবে এক পৰামৰ্শ জাৰি কৰি কয় যে ভিছা প্ৰদানৰ পিছতো আমেৰিকাৰ ভিছা স্ক্ৰীনিং অব্যাহত থাকে আৰু নিয়ম উলংঘা হ’লে বাতিল কৰিব পাৰে।
এই বিবৃতিটোৱে ৰাষ্ট্ৰপতি ড’নাল্ড ট্ৰাম্পৰ নেতৃত্বত আমেৰিকা প্ৰশাসনে নিজৰ অভিবাসন আইনসমূহ মানি চলাটো নিশ্চিত কৰাৰ বাবে চলি থকা প্ৰচেষ্টাৰ সৈতে মিল ৰাখিছে আৰু ভিছাধাৰীসকলে থকাৰ সময়ছোৱাত সকলো আইনী প্ৰয়োজনীয়তা কঠোৰভাৱে মানি চলিব লাগিব বুলি আৰু অধিক শক্তিশালী কৰিছে।
এক্সত আমেৰিকাৰ দূতাবাসে প্ৰকাশ কৰা এটা পোষ্টত কয় যে, "ভিছা জাৰি কৰাৰ পিছতো আমেৰিকাৰ ভিছা স্ক্ৰীনিং বন্ধ নহয়। আমি ভিছাধাৰীসকলক অহৰহ পৰীক্ষা কৰি চাওঁ যাতে তেওঁলোকে আমেৰিকাৰ সকলো আইন আৰু ইমিগ্ৰেচন নিয়ম মানি চলে - আৰু আমি তেওঁলোকৰ ভিছা বাতিল কৰি বিতাড়িত কৰিব পাৰু যদি তেওঁলোকে নিয়ম উলংঘা কৰে।"
ভাৰতত থকা আমেৰিকাৰ দূতাবাসে বিগত কেইসপ্তাহমানৰ ভিতৰত ভিছা আৰু প্ৰব্ৰজন সম্পৰ্কে ধাৰাবাহিকভাৱে বিবৃতি প্ৰকাশ কৰিছে।
২৮ জুনত ভাৰতত থকা আমেৰিকাৰ দূতাবাসে এক পৰামৰ্শৰ জৰিয়তে কৈছিল যে যিসকল ব্যক্তিয়ে অবৈধভাৱে আমেৰিকাত থাকে বা ভিছা জালিয়াতি কৰিছে তেওঁলোকক জগৰীয়া কৰা হ’ব।
এক্সত আমেৰিকাৰ দূতাবাসে কৈছিল যে যদি কোনোবাই আমেৰিকাৰ আইন ভংগ কৰে তেন্তে তেওঁলোকক “উল্লেখযোগ্য অপৰাধমূলক শাস্তি” প্ৰদান কৰা হ’ব।
দূতাবাসে নিজৰ পোষ্টত কয় যে, "যিসকলে অবৈধভাৱে আমেৰিকাত আছে বা ভিছা জালিয়াতি কৰে তেওঁলোকক দায়ী কৰা হ’ব। যদি আপুনি আমেৰিকাৰ আইন ভংগ কৰে তেন্তে আপোনাক উল্লেখযোগ্য অপৰাধমূলক শাস্তি প্ৰদান কৰা হ’ব।"
শেহতীয়াকৈ কেলিফৰ্ণিয়াৰ লছ এঞ্জেলছত ট্ৰাম্প প্ৰশাসনে অনুপ্ৰৱেশ দমন চলোৱাৰ পটভূমিত দূতাবাসৰ এই বিবৃতি প্ৰকাশ পাইছে।
ইয়াৰ পূৰ্বে ১৯ জুনত দূতাবাসে কৈছিল যে আমেৰিকাৰ ভিছা “এটা বিশেষাধিকাৰ, অধিকাৰ নহয়” আৰু ভিছা জাৰি হোৱাৰ পিছত ইয়াৰ স্ক্ৰীনিং বন্ধ নহয় আৰু কোনোবাই আইন ভংগ কৰিলে কৰ্তৃপক্ষই ইয়াক বাতিল কৰিব পাৰে।
২৬ জুনত আমেৰিকাই আবেদনকাৰীসকলক যোৱা পাঁচ বছৰত ব্যৱহাৰ কৰা প্ৰতিটো প্লেটফৰ্মৰ সামাজিক মাধ্যমৰ ইউজাৰনেম বা হেণ্ডেল শ্বেয়াৰ কৰিবলৈ কয়।
এক্সত প্ৰকাশ পোৱা এক বিবৃতিত কোৱা হৈছে যে, "ভিছা আবেদনকাৰীয়ে যোৱা ৫ বছৰৰ পৰা ব্যৱহাৰ কৰা প্ৰতিটো প্লেটফৰ্মৰ সকলো সামাজিক মাধ্যমৰ ইউজাৰনেম বা হেণ্ডেল ডি এছ-১৬০ ভিছা আবেদন প্ৰপত্ৰত তালিকাভুক্ত কৰিব লাগিব। আবেদনকাৰীয়ে স্বাক্ষৰ আৰু জমা দিয়াৰ আগতে তেওঁলোকৰ ভিছা আবেদনত থকা তথ্য সঁচা আৰু শুদ্ধ বুলি প্ৰমাণিত কৰিব লাগিব।"
ইয়াত লগতে কোৱা হৈছে যে সামাজিক মাধ্যমৰ তথ্য বাদ দিলে ভিছা অস্বীকাৰ আৰু ভৱিষ্যতে ভিছাৰ বাবে অযোগ্যতা হ’ব পাৰে।
