শ্ৰীলথা এম
ছাত্ৰ-ছাত্ৰীসকলক ধৰ্মৰ এক সংহত পাঠ্যক্ৰম আগবঢ়োৱা এটা অনন্য প্ৰতিষ্ঠানৰ নেতৃত্ব দিয়া এগৰাকী সাহসী ব্যক্তিৰ নাম হৈছে ওনাম্পিলি মহম্মদ ফাইজী। কেৰালাৰ থ্ৰিছুৰত অৱস্থিত তেওঁৰ একাডেমী অৱ শ্বৰিয়ত এণ্ড এডভান্সড ষ্টাডিজত কেৱল ইছলামিক গ্ৰন্থই নহয়, সংস্কৃত আৰু বেদান্ত গ্ৰন্থও শিকোৱা হয়।
একাডেমীখনৰ অধ্যক্ষ ওনাম্পিলি মহম্মদ ফাইজীয়ে নিজেই কালাডীৰ শ্ৰীশংকৰ বিশ্ববিদ্যালয়ৰ সংস্কৃত পণ্ডিত আৰু তেওঁৰ সপোন আছিল সংস্কৃত গ্ৰন্থৰ ওপৰত গৱেষণা কৰা, যিটো সপোন তেওঁ পূৰণ কৰিব নোৱাৰিলে।
ছাত্ৰ-ছাত্ৰীক সম্বোধন কৰি থকা মুহূৰ্তত ওনাম্পিলি মহম্মদ ফাইজী
চুফী চুন্নী মুছলমান পণ্ডিতৰ এটা সংগঠন সমস্থ (Samastha)ৰ বিষয়েও একাডেমীয়ে বহু কথা কয়। প্ৰায় দহ বছৰ আগতে তেওঁলোকে এই একাডেমীখন আৰম্ভ কৰিছিল। পিছলৈ ওনাম্পিলি মহম্মদ ফাইজীয়ে পাঠ্যক্ৰমৰ নতুন ৰূপ ধাৰণ কৰে। অধ্যক্ষই কেইবছৰমান আগতে সংস্কৃত ভাষা-সাহিত্যক বাধ্যতামূলক বিষয় কৰি তুলিছিল। দশম শ্ৰেণীৰ পিছত ছাত্ৰ-ছাত্ৰীয়ে প্ৰৱেশ পৰীক্ষাৰ জৰিয়তে একাডেমীত যোগদান কৰে।
ইছলামিক অধ্যয়নত মধ্যম, ডিগ্ৰী, আৰু স্নাতকোত্তৰ শিক্ষা গ্ৰহণ কৰে। তেওঁলোকৰ এটা বিষয় হৈছে সংস্কৃত। ওনাম্পিলি মহম্মদ ফাইজীয়ে কয় যে তেওঁ বিচাৰে যাতে ছাত্ৰ-ছাত্ৰীসকলে সকলো কথা শিকে আৰু তেওঁলোকে যাতে সংকীৰ্ণ দৃষ্টিভংগীৰে জীয়াই থাকিব নালাগে।
থ্ৰিছুৰত অৱস্থিত 'একাডেমী অৱ শ্বৰিয়ত এণ্ড এডভান্সড ষ্টাডিজ'
ওনাম্পিলিয়ে কোৰাণ আৰু উপনিষদ দুয়োটা বিষয়ৰ ওপৰত বক্তৃতা দিয়ে। তেওঁৰ মতে আধুনিক বিদ্যালয়ত মূল্যভিত্তিক শিক্ষা দিয়া উচিত আৰু ধৰ্মই কি শিকায় সেই বিষয়ে কথা কোৱাৰ পৰা বিৰত থকা উচিত। মূল্যবোধ নথকা শিক্ষা শূন্য বুলিও তেওঁ কয়। জ্ঞানৰ সকলো উৎসৰ পৰা শিকিবলৈ ওনাম্পিলি সদায় মুকলি হৈ থাকে। তেওঁ বিভিন্ন ধৰ্মৰ লোকক একেখন মঞ্চত একত্ৰিত কৰাৰো কাম কৰে।
তেওঁ কেৰালাত চিচিচিৰ অন্যতম প্ৰতিষ্ঠাপক, যাৰ অৰ্থ হ’ল কাউন্সিল ফৰ কমিউনিটি ক’অপাৰেশ্যন। এই পৰিষদত বিভিন্ন ধৰ্মৰ লোক আছে, যেনে- দালাই লামা, শশী থাৰুৰ, ওনাম্পিলি মহম্মদ ফাইজী, স্বামী হৰিপ্ৰসাদ, হিন্দু নেতা ৰামচন্দ্ৰন, বিচপ এণ্টনি বদক্কেকাৰ, আৰু বহুতো।
ছাত্ৰ-ছাত্ৰীক সম্বোধন কৰি থকা মুহূৰ্তত ওনাম্পিলি মহম্মদ ফাইজী
বৰ্তমান কেৰালাত চিচিচিৰ মাত্ৰ দুটা কেন্দ্ৰ আছে যদিও অতি সোনকালে সকলো জিলালৈ ই সম্প্ৰসাৰিত হ’ব। ওনাম্পিলিয়ে কয় যে তেওঁৰ লক্ষ্য হৈছে সকলো সম্প্ৰদায়ৰ বাবে এক উমৈহতীয়া মঞ্চ সৃষ্টি কৰা যাতে কোনেও নিজকে বিচ্ছিন্ন অনুভৱ নকৰে।
বৰ্তমান কাউন্সিল ফৰ কমিউনিটি ক’অপাৰেশ্যনৰ আগন্তুক বাৰ্ষিক সভাৰ বাবে ব্যস্ত ওনাম্পিলিয়ে কয় যে ধৰ্মক ৰাজনৈতিক আৰু ন্যস্ত স্বাৰ্থৰ লোকে নিজৰ উদ্দেশ্য পূৰণৰ আহিলা হিচাপে ব্যৱহাৰ কৰিছে। আজি প্ৰতিটো প্ৰতিষ্ঠানক লৈ প্ৰশ্ন উত্থাপন হৈছে আৰু ইয়াৰ বাবে তেওঁ ধৰ্মক নহয়, ৰাজনীতিক দোষাৰোপ কৰে। মানুহে ধৰ্মক লৈ ৰাজনীতি কৰি আছে যাতে তেওঁলোকৰ স্বাৰ্থ পূৰণ হয়।
