জামদানী হৈছে কপাহী সূতাৰে তৈয়াৰ কৰা এক প্ৰকাৰৰ অতি সুন্দৰ শাৰী। এই শাৰীয়ে বৰ্তমান সমগ্ৰ বিশ্বৰ লোকৰে দৃষ্টি আকৰ্ষিত কৰিবলৈ সক্ষম হৈছে। শেহতীয়াকৈ গুৱাহাটী মহানগৰীৰ আই এছ বি টিৰ মণিৰাম দেৱান ট্ৰেড চেণ্টাৰত অনুষ্ঠিত আন্তঃৰাষ্ট্ৰীয় গুৱাহাটী বাণিজ্য মেলাত বাংলাদেশৰ পুৰুষ শিপিনী নুৰ ভাইয়ে দেশখনৰ পৰম্পৰাগত জামদানী শাৰীৰ সম্ভাৰ লৈ অহা দেখা গৈছিল। তেওঁৰ ভিন্নৰঙী শাৰীয়ে বাণিজ্য মেলালৈ অহা প্ৰতিগৰাকী গ্ৰাহকৰ দৃষ্টি আকৰ্ষণ কৰিবলৈ সক্ষম হয়।
জামদানী শাৰীৰ বয়ন পদ্ধতি অন্য বস্ত্ৰৰ বয়ন পদ্ধতিতকৈ যথেষ্ট সুকীয়া। জামদানী বস্ত্ৰ বোৱাৰ সময়ত ডিজাইনবোৰ প্ৰতি তৃতীয়ডাল সূতাৰে টানি আনি কৰা হয়। সাধাৰণতে মছলিন বস্ত্ৰ বয়নৰ বাবে ৩০০ ডাল গণনা সূতা ব্যৱহাৰ কৰা হয়, যদিও জামদানী শাৰীৰ বয়নত সাধাৰণতে ২৬-৮০-৮৪ ডাল সূতা ব্যৱহাৰ কৰা হয়। জামদানী শাৰী বোৱাৰ এই অনন্য পদ্ধতিক ইউনেস্কোৰ দ্বাৰা সাংস্কৃতিক ঐতিহ্য হিচাপে স্বীকৃতি দিয়া হৈছে।
‘আৱাজ-দ্য ভইচ’ৰ সৈতে হোৱা এক সাক্ষাৎকাৰত বাংলাদেশৰ ব্যৱসায়ী নুৰ ভাইয়ে কয়, "জামদানী শাৰীবোৰ মিহি তথা মসৃণ হোৱাৰ বাবে প্ৰাচীনকালৰে পৰা বেংগলী মহিলাসকলৰ মাজত এই শাৰীৰ যথেষ্ট সমাদৰ আছে। জামদানী কাপোৰ মছলিনৰ ওপৰত ডিজাইন কৰি তৈয়াৰ কৰা হয়।
বৰ্তমান জামদানী শাৰী বিভিন্ন ঠাইত প্ৰস্তুত কৰা হয়, যদিও ঢাকাক জামদানী শাৰীৰ জন্মস্থান বুলি গণ্য কৰা হয়। বিশ্বৰ বিভিন্ন দেশৰ লগতে ভাৰততো জামদানী শাৰীৰ যথেষ্ট চাহিদা আছে। অসমতো যথেষ্ট সংখ্যক লোকে জামদানী শাৰী ক্ৰয় কৰা দেখা গৈছে।
যিহেতু এই শাৰীৰ বয়ন পদ্ধতি অন্য শাৰীৰ তুলনা সুকীয়া। সেয়েহে এই শাৰীৰ মূল্য অন্য শাৰীৰ তুলনাত কিছু পৰিমানে বেছি। কিন্তু এই শাৰীবোৰৰ মূল্য বেছি হোৱা সত্ত্বেও অসমৰ সৰহ সংখ্যক লোকে এই শাৰীৰ প্ৰতি আকৰ্ষিত হৈ ক্ৰয় কৰা দেখা গৈছে।
হাতে নিৰ্মিত ঢাকাই জামদানী শাৰীৰ দেখুৱাই আছে ব্যৱসায়ী নুৰ ভাইয়ে