সুদীপ শৰ্মা চৌধুৰী / গুৱাহাটী
অসম আৰু অসমীয়াৰ হিয়াৰ আমঠু মহান শিল্পী জুবিন গাৰ্গৰ আকস্মিক মৃত্যুৱে সমগ্ৰ অসমবাসীক গভীৰ শোকৰ সাগৰত ডুবাইছে। প্ৰজন্মৰ পিছত প্ৰজন্ম তেওঁৰ মায়াৱী সুৰত মুগ্ধ হৈ আহিছে। তেওঁৰ সংগীত আৰু সৃষ্টিৰ জৰিয়তে অসমীয়া সংস্কৃতি প্ৰাণ পাই উঠিছে। সেয়েহে তেওঁৰ মৃত্যুৰ লগে লগে সমগ্ৰ সাংস্কৃতিক ক্ষেত্ৰখন স্তব্ধ হৈ পৰিছে। তথাপিও জীৱন সদায় এনেকৈ থমকি নৰয়।
শোকৰ পৰিৱেশৰ মাজতে সমগ্ৰ মহানগৰীত মা দূৰ্গাৰ আগমনৰ প্ৰস্তুতি আৰম্ভ হৈছে। বিভিন্ন সামাজিক বাৰ্তা আৰু অভিনৱ বিষয়বস্তুৰে বিভিন্ন পূজা উদযাপন সমিতিসমূহ সাজু হৈ উঠিছে।
মহানগৰীৰ পাণ্ডু পূজাৰ এক দৃশ্য
ক’ৰবাত যদি পৰিৱেশ অনুকূল মণ্ডপ দেখা যায়, আন ক’ৰবাত মূৰ্তি সজ্জাত প্ৰযুক্তিৰ স্পৰ্শ দেখা গৈছে। কিছুমান পূজা সমিতিয়ে শিশু শিক্ষাৰ ওপৰত গুৰুত্ব আৰোপ কৰিছে। আন কিছুমানে মহিলাৰ সুৰক্ষাৰ বিষয়বস্তুৰ ওপৰত আলোকপাত কৰিছে। মুঠৰ ওপৰত জুবিনৰ মৃত্যুৰ শোকৰ ছাঁৰ মাজতো দেৱী দুৰ্গাৰ আগমনৰ লগে লগে মহানগৰখন সজীৱ হৈ উঠিছে।
শিল্পীগৰাকীক শ্ৰদ্ধাঞ্জলি জনোৱাৰ উদ্দেশ্যে কেইবাখনো পূজা সমিতিয়ে মণ্ডপৰ এটা স্থানত জুবিন গাৰ্গৰ ছবি ৰাখিব আৰু তেওঁৰ সুৰীয়া কণ্ঠৰ গীতসমূহ পূজা মণ্ডপত বজোৱাৰ সিদ্ধান্ত লৈছে। শোক আৰু আনন্দৰ এই সংমিশ্ৰিত পৰিবেশত গুৱাহাটীৰ দুৰ্গা উৎসৱে এক নতুন মাত্ৰা লাভ কৰিছে - য'ত শিল্পীগৰাকীৰ মৃত্যুৰ শোক দেৱী দুৰ্গাৰ উদযাপনত দেখিবলৈ পোৱা যাব।
গুৱাহাটী মহানগৰীৰ এখন পূজা মণ্ডপ
গুৱাহাটীৰ আটাইতকৈ পুৰণি দুৰ্গা উৎসৱসমূহৰ ভিতৰত অন্যতম হৈছে পাণ্ডুৰ আজাদ হিন্দ দুৰ্গা পূজা এইবাৰ ৭৩ বছৰত ভৰি দিছে। এই পূজাভাগৰ এইবাৰৰ বিষয়বস্তু অতি তাৎপৰ্যপূৰ্ণ। সেয়া হৈছে--মহিলা আৰু শিশুৰ ওপৰত হোৱা হিংসা, বিশেষকৈ শিশু সৰবৰাহৰ বিৰুদ্ধে সজাগতা বিয়পোৱা।
মণ্ডপৰ আলোকসজ্জাত মহিলাসকলে শিশুৰ বিৰুদ্ধে অপৰাধৰ বিৰুদ্ধে যুঁজি প্ৰতিবাদ কৰা ছবি চিত্ৰিত কৰা হৈছে। মা দূৰ্গাৰ মূৰ্তিৰ চাৰিওফালে শিল্পকৰ্ম আৰু তথ্যচিত্ৰ স্থাপন কৰা হৈছে, য’ত শিশু সৰবৰাহৰ আৰু নাৰীৰ ওপৰত হোৱা হিংসাৰ ভয়ানক দিশসমূহ দেখুওৱা হৈছে। পোহৰ আৰু মিউৰেলৰ জৰিয়তে প্ৰেৰণ কৰা একমাত্ৰ বাৰ্তাটো হ'ল--"দেৱী দুৰ্গাৰ শক্তি আমাৰ প্ৰত্যেকৰে ভিতৰত আছে, গতিকে অন্যায়ৰ বিৰুদ্ধে মাত মতাটোৱেই হৈছে প্ৰকৃত পূজা।"
গুৱাহাটী মহানগৰীৰ এখন পূজা মণ্ডপ
৭৩ বছৰীয়া পৰম্পৰাৰ লগত জড়িত এই সামাজিক দায়বদ্ধতাই নিঃসন্দেহে আজাদ হিন্দ দুৰ্গা পূজাক আন পূজাতকৈ বেলেগ মাত্ৰা প্ৰদান কৰিছে। পাণ্ডুৰ একাউণ্টছ কলনীৰ দুৰ্গা পূজাত কৃত্ৰিম বুদ্ধিমত্তাৰ স্পৰ্শৰ লগতে এইবাৰ তেওঁলোকৰ বিষয়বস্তু হৈছে "এ আই-ভৱিষ্যতৰ স্পৰ্শ"।
এইভাগ পূজাই পৰম্পৰাগত দুৰ্গা পূজালৈ আধুনিক প্ৰযুক্তিৰ এক অনন্য সংমিশ্ৰণ আনিছে। ইয়াৰ মণ্ডপৰ সজ্জাৰ ভিতৰত আছে ৰবটিক লাইটিং, ডিজিটেল ডিছপ্লে আৰু কৃত্ৰিম বুদ্ধিমত্তাৰ বিভিন্ন উপস্থাপন। কেৱল সেয়াই নহয়, দুৰ্গা পূজাৰ বিষয়বস্তুত দেশৰ প্ৰতিৰক্ষাৰ শক্তিশালী ভাবমূৰ্তিও প্ৰতিফলিত হৈছে।
