ডিজিটেল যুগত গৰমৰ বন্ধঃ ৰাজ্যৰ 'ভাগিন'সকললৈ মুখ্যমন্ত্ৰী হিমন্ত বিশ্ব শৰ্মাৰ আন্তৰিকতাপূৰ্ণ চিঠি
নিকুঞ্জ নাথ / গুৱাহাটী
গৰমৰ বন্ধ - ছাত্ৰ-ছাত্ৰীৰ বাবে বছৰটোৰ আটাইতকৈ আনন্দদায়ক, স্বাধীন আৰু সুমধুৰ সময়। কিতাপৰ বোজা আৰু নীতি-নিয়মৰ গণ্ডীৰ পৰা ওলাই আহি মুকলি আকাশৰ তলত উশাহ লোৱাৰ এই বিশেষ সময়ছোৱালৈ প্ৰতিগৰাকী শিক্ষার্থীয়েই অধীৰ আগ্ৰহেৰে বাট চাই থাকে। পিছে, সময়ৰ সোঁতত আৰু বৰ্তমানৰ যান্ত্ৰিক ডিজিটেল যুগত গৰমৰ বন্ধৰ এই চিৰাচৰিত সংজ্ঞাও যেন ক্ৰমান্বয়ে সলনি হ'বলৈ ধৰিছে।
মুকলি পথাৰৰ ধূলি-বালিৰ সলনি আজিৰ নৱপ্ৰজন্ম আৱদ্ধ হৈ পৰিছে ম'বাইল, লেপটপ বা কম্পিউটাৰৰ মায়াময় স্ক্ৰীনত। এনে এক প্ৰেক্ষাপটত, ছাত্ৰ-ছাত্ৰীসকলক ভাৰ্ছুৱেল পৃথিৱীৰ পৰা উলিয়াই আনি বাস্তৱ পৃথিৱীৰ অপৰূপ সৌন্দৰ্যৰ সৈতে পুনৰ চিনাকি কৰাই দিয়াৰ এক অনন্য তথা প্ৰশংসনীয় প্ৰয়াস হাতত লৈছে অসমৰ মুখ্যমন্ত্ৰী ড০ হিমন্ত বিশ্ব শৰ্মাই। ৰাজ্যৰ মৰমৰ ছাত্ৰ-ছাত্ৰীসকলক 'ভাগিন' বুলি সম্বোধন কৰি মুখ্যমন্ত্ৰীগৰাকীয়ে লিখিছে এখন বিশেষ আন্তৰিকতাপূৰ্ণ চিঠি। এই চিঠিত তেওঁ গৰমৰ বন্ধৰ সঠিক সদ্ব্যৱহাৰ আৰু এক সুন্দৰ জীৱন গঢ়াৰ কেতবোৰ অমূল্য দিহা-পৰামৰ্শ আগবঢ়াইছে।
চিঠিখনৰ আৰম্ভণিতে মুখ্যমন্ত্ৰীগৰাকীয়ে নষ্টালজিক হৈ নিজৰ শৈশৱৰ দিনবোৰলৈ উভতি গৈছে। তেওঁ উল্লেখ কৰিছে যে বৰ্তমানৰ ছাত্ৰ-ছাত্ৰীসকলৰ দৰেই তেৱোঁ সৰুতে গৰমৰ বন্ধলৈ অতি আগ্ৰহেৰে অপেক্ষা কৰিছিল। তেওঁৰ মতে, গৰমৰ বন্ধ কেৱল বিদ্যালয়ৰ দৈনন্দিন পাঠদানৰ পৰা পোৱা সাময়িক জিৰণিয়েই নাছিল; ই আছিল বিদ্যালয়ৰ চৌহদৰ বাহিৰৰ সেই বিশাল পৃথিৱীখনৰ সৈতে একাত্ম হোৱাৰ এক সোণালী সুযোগ।
মুখ্যমন্ত্ৰীয়ে তেওঁৰ স্মৃতি ৰোমন্থন কৰি কয় যে তেওঁলোকৰ দিনত গৰমৰ বন্ধ মানেই আছিল মামাৰ ঘৰলৈ যোৱাৰ এক নিৰ্মল আনন্দ, নতুন ঠাই ভ্ৰমণ কৰা আৰু আত্মীয়-স্বজন, যেনে খুৰা-খুৰী, ককা-আইতা তথা ককাই-ভনীৰ সৈতে একেলগে বহি হাঁহি-ধেমালিৰে এসাঁজ খোৱা আৰু সময় কটোৱা। বিশেষকৈ গাঁৱত শৈশৱ অতিবাহিত কৰাসকলৰ বাবে এই সময়খিনি আছিল সঁচাকৈয়ে যাদুকৰী আৰু ৰোমাঞ্চকৰ। গছৰ ডালৰ পৰা পকি থকা বতৰৰ ফল নিজ হাতেৰে ছিঙি খোৱা, পুখুৰীৰ পৰিষ্কাৰ পানীত মাছ ধৰাৰ আনন্দ, মুকলি পথাৰত ধূলি-বোকামাটি সানি খেলা-ধূলা কৰা আৰু সন্ধিয়া পৰত ক্ৰিকেট বা ফুটবল খেলি ভাগৰে-জোগৰে ঘৰলৈ উভতি অহা- এইবোৰ আছিল গাঁৱলীয়া শৈশৱৰ একোটা অবিচ্ছেদ্য অংগ। মুখ্যমন্ত্ৰীগৰাকীয়ে অত্যন্ত আৱেগিক হৈ প্ৰকাশ কৰিছে যে আজিও সেই স্মৃতিবোৰে তেওঁৰ মনত এক অনাবিল আনন্দ দিয়ে।
AI-ৰ সহায়ত সৃষ্টি কৰা প্ৰতীকি ফটো
সময়ৰ লগে লগে মানৱ সমাজ বহুদূৰ আগুৱাই গৈছে আৰু ইয়াৰ প্ৰত্যক্ষ প্ৰভাৱ পৰিছে আজিৰ শৈশৱৰ ওপৰতো। মুখ্যমন্ত্ৰীয়ে স্বীকাৰ কৰিছে যে ম'বাইল ফোন, ইণ্টাৰনেট আৰু অত্যাধুনিক প্ৰযুক্তিবিদ্যাই আমাৰ জীৱনধাৰণৰ প্ৰণালী বহুখিনি সহজ, খৰতকীয়া আৰু আৰামদায়ক কৰি তুলিছে। কিন্তু একে সময়তে তেওঁ এক অতি গুৰুত্বপূৰ্ণ কথা সোঁৱৰাই দিছে যে জীৱনৰ কিছুমান অমূল্য আৰু বাস্তৱ অভিজ্ঞতা কোনো ডিজিটেল স্ক্ৰীনে কেতিয়াও প্ৰদান কৰিব নোৱাৰে। প্ৰযুক্তিৰ ব্যৱহাৰ যুগান্তকাৰী আৰু প্ৰয়োজনীয় যদিও, প্ৰকৃতিৰ নিৰ্মল বতাহ আৰু মানুহৰ নিবিড় সান্নিধ্যত পোৱা অভিজ্ঞতাইহে এজন ব্যক্তিক পূৰ্ণাংগ ৰূপত আৰু মানৱীয় প্ৰমূল্যবোধেৰে গঢ়ি তোলে।
এই বাস্তৱ উপলব্ধিক সাৰোগত কৰিয়েই মুখ্যমন্ত্ৰীয়ে ছাত্ৰ-ছাত্ৰীসকললৈ কেতবোৰ বিশেষ অনুৰোধ আৰু পৰামৰ্শ আগবঢ়াইছে, যাতে তেওঁলোকে এই গৰমৰ বন্ধটি অৰ্থপূৰ্ণভাৱে কটাব পাৰে। সুবিধা পালেই এবাৰ নিজৰ মামাৰ ঘৰলৈ গৈ আত্মীয়ৰ সৈতে সময় কটাবলৈ মুখ্যমন্ত্ৰীগৰাকীয়ে ছাত্ৰ-ছাত্ৰীসকলক আহ্বান জনাইছে। আইতা-ককাৰ কাষত বহি অতীতৰ সাধু কথা শুনা আৰু বন্ধু-বান্ধৱীৰ সৈতে বাহিৰলৈ গৈ খেলা-ধূলা কৰাৰ ওপৰত তেওঁ গুৰুত্ব আৰোপ কৰিছে। তদুপৰি, যদিহে ছাত্ৰ-ছাত্ৰীসকলৰ পিতৃ-মাতৃয়ে ক'ৰবালৈ ফুৰিবলৈ যোৱাৰ পৰিকল্পনা কৰিছে, তেন্তে অসমৰ চহকী ঐতিহ্যমণ্ডিত স্থানসমূহ দৰ্শন কৰিবলৈ মুখ্যমন্ত্ৰীয়ে আহ্বান জনাইছে। ইয়াৰ ভিতৰত গুৱাহাটীৰ ছাইন্স চিটী, শ্বহীদ স্মাৰক আৰু যোৰহাটৰ লাচিত বৰফুকনৰ মৈদামৰ দৰে ঐতিহাসিক তথা শৈক্ষিক স্থান ভ্ৰমণ কৰি নতুন অভিজ্ঞতা বুটলিিবলৈ তেওঁ উপদেশ দিছে।
AI-ৰ সহায়ত সৃষ্টি কৰা প্ৰতীকি ফটো
মুখ্যমন্ত্ৰীৰ আটাইতকৈ সুন্দৰ আৰু ব্যতিক্ৰমী পৰামৰ্শটো হৈছে- চিঠি লিখা। তেওঁ অনুৰোধ কৰিছে যে ছাত্ৰ-ছাত্ৰীসকলে নিজৰ বন্ধু-বান্ধৱী, শ্ৰদ্ধাৰ শিক্ষক-শিক্ষয়িত্ৰী, আত্মীয়-স্বজন বা সমাজৰ যিকোনো প্ৰিয় ব্যক্তিলৈ এখন হ'লেও চিঠি লিখা উচিত। আজিৰ ডিজিটেল যুগত চিঠি লিখাৰ অভ্যাস প্ৰায় নোহোৱা হৈ আহিছে যদিও, চিঠিয়ে মনৰ গভীৰ অনুভৱ প্ৰকাশ কৰাত যিদৰে সহায় কৰে আৰু মানুহক যিদৰে সৃষ্টিশীল কৰি তোলে, সেয়া আন কোনো যান্ত্ৰিক মাধ্যমেই কৰিব নোৱাৰে।
কেৱল এগৰাকী প্ৰশাসক বা ৰাজনীতিবিদ হিচাপে নহয়, সমাজৰ এগৰাকী অভিভাৱকৰ দৰে মুখ্যমন্ত্ৰী ড০ শৰ্মাই এই চিঠিখনৰ সামৰণি মাৰিছে। তেওঁ গভীৰ আশা প্ৰকাশ কৰিছে যে এইবাৰৰ গৰমৰ বন্ধত ৰাজ্যৰ ছাত্ৰ-ছাত্ৰীসকলে ম'বাইলৰ আৱেষ্টনীৰ পৰা ওলাই আহি নতুন অভিজ্ঞতা, নতুন চিন্তা আৰু নতুন স্মৃতিৰে নিজৰ জীৱনটোক সমৃদ্ধ কৰি তুলিব। প্ৰত্যেককে কুশলে থকাৰ কামনাৰে মুখ্যমন্ত্ৰী হিমন্ত বিশ্ব শৰ্মাই এই বাৰ্তাটিৰ জৰিয়তে উঠি অহা প্ৰজন্মক এক সুস্থ, সবল আৰু মানৱীয় প্ৰমূল্যবোধ সম্পন্ন জীৱন গঢ়াৰ পথ প্ৰদৰ্শন কৰিছে। যান্ত্ৰিকতাৰ ধামখুমীয়াত হেৰাই যাব ধৰা শৈশৱক উদ্ধাৰ কৰাৰ স্বাৰ্থত লিখা এই আন্তৰিকতাপূৰ্ণ চিঠিয়ে নিশ্চিতভাৱে ছাত্ৰ-ছাত্ৰী তথা অভিভাৱকসকলকো এক নতুন গঠনমূলক দিশ প্ৰদান কৰিবলৈ সক্ষম হ'ব।
