অপৰ্ণা দাস
সম্পূৰ্ণ বছৰটোত মানুহে জীৱনত সুখ আৰু দুখ, সফলতা আৰু বিফলতা, উত্থান-পতন আদিৰ দৰে বহু অভিজ্ঞতাৰ সন্মুখীন হয়। বছৰটোৰ শেষত, মগজুৱে অসংখ্য আবেগ, ভাল আৰু বেয়াৰ সংমিশ্ৰিত স্মৃতি বহন কৰে। এই মুহূৰ্তত, এক গুৰুত্বপূৰ্ণ উৎসৱ আমাৰ দুৱাৰ-দলিত উপস্থিত হয়। সেইয়া হৈছে বৰদিন। এই উৎসৱে মানুহক কিছু সময়ৰ বাবে থমকি ৰ'বলৈ, অতীতৰ দুখ-কষ্ট পাহৰিবলৈ আৰু আনন্দক আকোঁৱালি ল'বলৈ শিকায়।
এই আনন্দৰ মুহূৰ্তবোৰক মধুৰ আৰু উষ্ণ কৰি তুলিবলৈ সমগ্ৰ বিশ্বজুৰি টাৰ্কি, কেক, কুকিজ আৰু পুডিং আদি বিভিন্ন খাদ্য প্ৰস্তুত কৰা হয়। এই আটাইবোৰ প্ৰকাৰৰ ভিতৰত এটা বস্তুয়ে প্ৰায় সকলো ঠাইতে বিশেষ স্থান লাভ কৰি আহিছে আৰু সেয়া হৈছে চকলেট। প্ৰেমৰ প্ৰতীক আৰু সুখৰ সোৱাদ। চকলেট কেৱল বৰদিনৰ সময়ত খোৱা বস্তু হৈ নাথাকে, বৰঞ্চ ই নতুন বছৰ অহাৰ পূৰ্বে আনন্দ আৰু আশাৰ এক মিঠা উপহাৰ হৈ পৰে।
প্ৰতিনিধিত্বমূলক ছবি
ডিচেম্বৰৰ শীতল বতাহ আৰু চাৰিওফালে ৰঙীন পোহৰেৰে সজাই তোলা পৰিৱেশৰ সৈতে বৰদিনৰ চকলেটৰ মাজৰ সম্পৰ্ক এক বেলেগ ধৰণৰ উন্মাদনা দেখা যায়। বৰদিনৰ সময়ত চহৰৰ বতাহত কেকৰ সুগন্ধিৰে ভৰি থাকে, গীৰ্জা আৰু শ্বপিং মলসমূহ উৎসৱমুখৰ ৰঙীন লাইটেৰে সজাই তোলা হয় আৰু সেই একে সময়তে চকলেটৰ চাহিদাও দ্ৰুতগতিত বৃদ্ধি পায়। আজিৰ সময়ত ছান্টা ক্ল'জ বা খ্ৰীষ্টমাছ গছেই নহয়, চকলেটো এই উৎসৱৰ অন্যতম প্ৰধান উৎস হৈ পৰিছে। এই সময়ছোৱাত শিশুৰ পৰা প্ৰাপ্তবয়স্কলৈকে সকলোৱে "চকলেটৰ মেজাজ"ত থাকে।
বৰদিনৰ সময়ত চকলেটৰ বিশেষ গুৰুত্ব কেৱল এটা আধুনিক অভ্যাস বা বজাৰৰ ধাৰা নহয়। ইয়াৰ মূল ইতিহাস, ধৰ্মীয় চিন্তাধাৰা আৰু শৈশৱৰ স্মৃতিত নিহিত হৈ আছে। খ্ৰীষ্টান ধৰ্মত যীচু খ্ৰীষ্টৰ জন্মদিন উপলক্ষে বৰদিন উদযাপন কৰা হয়। যিয়ে প্ৰেম, উদাৰতা আৰু আনন্দ ভাগ বতৰা কৰাৰ বাৰ্তা বহন কৰে।
প্ৰতিনিধিত্বমূলক ছবি
ইউৰোপত, এই সময়ছোৱাত মিঠা খাদ্য উপহাৰ দিয়াৰ পৰম্পৰা প্ৰাচীন কালৰে পৰা মানুহৰ মাজত সুখ বিয়পোৱাৰ বাবে বিদ্যমান হৈ আছিল। পিছলৈ যেতিয়া ক'ক' আৰু চকলেট জনপ্ৰিয় হৈ পৰিছিল, তেতিয়া ই লাহে লাহে বৰদিনৰ মূল মিঠাই লৈ পৰিণত হৈছিল। বহু পৰম্পৰাগত মিঠাইৰ তুলনাত চকলেটত সাধাৰণতে কম চেনী আৰু অধিক ক'ক'ও থাকে। ইয়াৰ ফলত শিশুসকলক উপহাৰ প্ৰদান কৰা ছাণ্টা ক্ল'জৰ পৰম্পৰাত চকলেট অন্তৰ্ভুক্ত কৰাটো সহজ হৈ পৰিছিল, কিয়নো ইয়াক সহজে ভাগ-বতৰা কৰিব পৰা যায় আৰু শিশুসকলৰ বাবে তুলনামূলকভাৱে সহ্যযোগ্য।
যদিও চকলেট এটা ধৰ্মীয় ৰীতি নহয়, তথাপিও ই প্ৰেম আৰু উদাৰতাৰ মূল বৰদিনৰ মূল্যবোধক সুন্দৰভাৱে প্ৰকাশ কৰে, আৰু ইয়াক উৎসৱৰ এক অবিচ্ছেদ্য অংশ হিচাপে গঢ়ি তোলা হৈছে। বৰদিনত চকলেটৰ জনপ্ৰিয়তাৰ আঁৰত বতৰ আৰু আৱেগ দুয়োটাই গুৰুত্বপূৰ্ণ ভূমিকা পালন কৰে। শীতকালত শৰীৰক অধিক শক্তিৰ প্ৰয়োজন হয় আৰু চকলেটে দ্ৰুত কেলৰি প্ৰদান কৰে। ইয়াৰ লগতে চকলেট খোৱাটোও সুখৰ অনুভূতিৰ সৈতে জড়িত।
প্ৰতিনিধিত্বমূলক ছবি
বৈজ্ঞানিকভাৱে এইটো প্ৰমাণিত হৈছে যে ফ্লেভ'নয়ড, এন্টিঅক্সিডেন্ট বিশেষকৈ ডাৰ্ক চকলেটত পোৱা যায়, যি হৃদৰোগৰ বাবে ভাল। ই ৰক্তচাপ নিয়ন্ত্ৰণ কৰাত সহায় কৰে আৰু ভাল কলেষ্টেৰল বৃদ্ধি কৰে। চকলেটত মেংগানিজ, ফছফৰাছ, জিংক আৰু ছেলেনিয়ামৰ দৰে খনিজ পদাৰ্থও থাকে, যিয়ে ৰোগ প্ৰতিৰোধ ক্ষমতা শক্তিশালী কৰাত সহায় কৰে। তদুপৰি, থিঅ'ব্ৰ'মিন আৰু ফেনাইলাইথিলামিনে মগজুত ছেৰ'ট'নিন আৰু ড'পামিনৰ নিঃসৰণ বৃদ্ধি কৰে, যি মানসিক চাপ হ্ৰাস কৰাত সহায় কৰে আৰু সুখৰ অনুভূতি সৃষ্টি কৰে।
সকলো বস্তুৰ দৰে চকলেটৰো ইতিবাচক আৰু নেতিবাচক দুয়োটা দিশ আছে। চকলেটৰ উপকাৰিতা আছে যদিও অধিক শৰ্কৰা আৰু চৰ্বিযুক্ত চকলেট অত্যধিক খালে ওজন বৃদ্ধি হয়, ডায়েবেটিছ আৰু দাঁতৰ সমস্যাও সৃষ্টি হ’ব পাৰে। বিশেষকৈ উৎসৱৰ সময়ছোৱাত অনিয়ন্ত্ৰিতভাৱে চকলেট খোৱা প্ৰৱণতা পিছলৈ এটা অভ্যাসত পৰিণত হ’ব পাৰে, যি দীৰ্ঘকালীনভাৱে স্বাস্থ্যৰ বাবে ক্ষতিকাৰক হ'ব পাৰে।
প্ৰতিনিধিত্বমূলক ছবি
আজিৰ প্ৰজন্মৰ মাজত চকলেটৰ প্ৰতি আকৰ্ষণ এক নতুন স্তৰত উপনীত হৈছে। ছ'চিয়েল মিডিয়াৰ ভাইৰেল ভিডিঅ', চকলেটৰ থিমযুক্ত কেফে, হস্তনিৰ্মিত আৰু চেনিবিহীন চকলেটবোৰে চকলেটক কেৱল খাদ্যত পৰিণত কৰা নাই, ই এতিয়া জীৱনশৈলীৰ এক বিবৃতি হৈ পৰিছে। যুৱক-যুৱতীসকলৰ বাবে চকলেট হ'ল আত্ম-উপহাৰ, চাপৰ পৰা মুক্তি বা বন্ধুত্বৰ প্ৰতীক। শিশুসকলৰ মাজত এটা জনপ্ৰিয় বিশ্বাস আৰু আনন্দদায়ক পৰম্পৰা হ'ল যে, ছান্তা ক্ল'জে ভাল আচৰণ কৰা শিশুসকলৰ বাবে চকলেট ভৰা বেগ লৈ আহে। গতিকে বৰদিনৰ সময়ত চকলেট ক্ৰয় কৰা বা উপহাৰ দিয়া এক শক্তিশালী প্ৰৱণতা হৈ পৰিছে।
শেষত ক’ব পাৰি যে, চকলেটৰ এই বিশেষ যাত্ৰা হৈছে বৰদিনৰ ৰঙীন মুহূৰ্তবোৰক অধিক মধুৰ কৰি তোলাৰ এক যাত্ৰা। আনন্দ, শৈশৱৰ স্মৃতি, আধুনিক জীৱনশৈলী আৰু বিজ্ঞানৰ এক সংমিশ্ৰণে চকলেটক উৎসৱৰ খাদ্য তালিকাত এক বিশেষ স্থান প্ৰদান কৰিছে। অৱশ্যে মন কৰিবলগীয়া যে, উৎসৱৰ প্ৰকৃত সৌন্দৰ্য হ'ল আনন্দৰ সমন্বয়েৰে পৰিপূৰ্ণ, তথাপিও সজাগতাৰ দ্বাৰা পৰিচালিত।
