এই সন্দৰ্ভত কথা পাতি আবৰাৰে 'আৱাজ - দ্য ভইচ'ৰ আগত নিজৰ প্ৰতিক্ৰিয়া প্ৰকাশ কৰে। তেওঁ কয়, "সৰুৰে পৰাই মই ঠিক কৰি লৈছিলো যে মই চাৰ্টাৰ্ড একাউণ্টেণ্ট (Chartered Accountant) হ'ম। সাধাৰণতে সপ্তম-অষ্টম শ্ৰেণীত পঢ়ি থাকোঁতেই এই ধাৰণাটো মোৰ মনলৈ আহিছিল। সেই সময়ত মোৰ সম্পৰ্কীয় ককায়েকে চি এ পঢ়ি আছিল আৰু তেওঁৰ পৰা অনুপ্ৰেৰণা লৈ ময়ো এই পথ বাছি লোৱাৰ সিদ্ধান্ত লৈছিলো।"
পৰীক্ষাৰ প্ৰস্তুতিৰ পৰা সফলতালৈ...
আবৰাৰৰ প্ৰাথমিক শিক্ষা পুণে জিলাৰ ৱালচান্দনগৰৰ ভাৰত চিলড্ৰেন একাডেমীত হৈছিল। তাৰ পিছত একাদশ আৰু দ্বাদশ শ্ৰেণীৰ বাণিজ্য শাখাৰ শিক্ষা পুণে চহৰৰ BMCC মহাবিদ্যালয়ত গ্ৰহণ কৰে। আনহাতে B.Com পুণেৰ MMCC মহাবিদ্যালয়ৰ পৰা সম্পূৰ্ণ কৰে।
তেওঁ ২০২০ চনৰ নৱেম্বৰ মাহত CA ফাউণ্ডেচন পৰীক্ষাত উত্তীৰ্ণ হয়। ইয়াৰ পিছত ২০২২ চনৰ মে' মাহত ইণ্টাৰমিডিয়েট পৰীক্ষাত উত্তীৰ্ণ হয়। পৰৱৰ্তী সময়ত ২০২৫ চনত CA ফাইনেলৰ প্ৰথম গ্ৰুপ আৰু ২০২৬ চনৰ জানুৱাৰী মাহত দ্বিতীয় গ্ৰুপত উত্তীৰ্ণ হৈ অৱশেষত চাৰ্টাৰ্ড একাউণ্টেণ্ট হোৱাৰ নিজৰ সপোন পূৰণ কৰে।
সফলতাৰ পিছত পৰীক্ষাৰ প্ৰস্তুতিৰ বিষয়ে আভাস দি আবৰাৰে কয়, "দ্বাদশ শ্ৰেণীৰ ব'ৰ্ড পৰীক্ষা শেষ হোৱাৰ লগে লগেই মই CA ফাউণ্ডেচনৰ বাবে ক্লাছ আৰম্ভ কৰিছিলো আৰু প্ৰস্তুতিত লাগি গৈছিলো। সেই সময়ত ক'ভিড মহামাৰীৰ বাবে মই ঘৰৰ পৰাই পঢ়া-শুনা কৰি আছিলো আৰু মোৰ পৰীক্ষা ২০২০ চনৰ ডিচেম্বৰ মাহত আছিল। মই প্ৰথম প্ৰেচেষ্টাতেই ৪০০ ৰ ভিতৰত ২৫৭ নম্বৰ লাভ কৰি CA ফাউণ্ডেচনত উত্তীৰ্ণ হৈছিলো।"
প্ৰতিনিধিত্বমূলক ছবি
তেওঁ লগতে কয়, "ইয়াৰ পিছত দুসপ্তাহ জিৰণি লোৱাৰ অন্তত মই পুণেত CA ইণ্টাৰমিডিয়েটৰ বাবে ক্লাছ আৰম্ভ কৰিছিলো। কিন্তু ২০২১ চনত ক'ভিডৰ দ্বিতীয় ঢৌ অহাৰ ফলত ক্লাছবোৰ পুনৰ অনলাইন হৈ পৰে আৰু মই ঘৰলৈ উভতি গৈ প্ৰস্তুতি চলাও যদিও সেইবাৰ মই সফলতা লাভ কৰিব নোৱাৰিলো। তাৰ পিছত মই ফলাফললৈ অপেক্ষা নকৰি পুনৰ পঢ়া আৰম্ভ কৰো। এই পৰিশ্ৰমৰ ফল মই ২০২২ চনৰ মে' মাহত পাওঁ, যেতিয়া মই CA ইণ্টাৰমিডিয়েটৰ দুয়োটা গ্ৰুপতে ৮০০ ৰ ভিতৰত ৪১১ নম্বৰ লাভ কৰি উত্তীৰ্ণ হওঁ।"
পৰিয়ালৰ সমৰ্থন
আবৰাৰে জনায় যে তেওঁৰ এই সফলতাত পিতৃ-মাতৃ, ভাতৃ-ভগ্নী, শিক্ষক-শিক্ষয়িত্ৰী আৰু বন্ধুবৰ্গৰ মূল্যৱান সহায়ৰ বাবেহে তেওঁ সফলতা লাভ কৰিবলৈ সক্ষম হৈছে। ইয়াৰ লগতে তেওঁ এই কথাও জনায় যে 'দ্য ইনষ্টিটিউট অৱ চাৰ্টাৰ্ড একাউণ্টেণ্টছ অৱ ইণ্ডিয়া' (ICAI)ৰ পুণে শাখাৰ জৰিয়তে ছাত্ৰ-ছাত্ৰীসকলক কম্পিউটাৰ, বাৰ্তালাপৰ দক্ষতা, দক্ষতা বিকাশৰ দৰে বহুতো প্ৰশিক্ষণৰ সুবিধা আৰু বিশেষজ্ঞসকলৰ মাৰ্গদৰ্শন লাভ কৰাৰ ফলত তেওঁ বহুত লাভৱান হৈছিল।
আবৰাৰে কয়, "CA ইণ্টাৰমিডিয়েট উত্তীৰ্ণ হোৱাৰ পিছত মই তিনি বছৰ ধৰি CA ক্ষেত্ৰখনৰ সকলো গুৰুত্বপূৰ্ণ বিভাগতে প্ৰকৃত কামৰ অভিজ্ঞতা অৰ্জন কৰিছিলো। মোৰ CAৰ শেষৰ প্ৰচেষ্টাটো ২০২৫ চনৰ মে' মাহত আছিল। সেয়েহে মই ২০২৪ চনৰ ডিচেম্বৰ মাহত অফিচৰ পৰা পঢ়াৰ বাবে ছুটী লৈ প্ৰস্তুতি আৰম্ভ কৰি দিছিলো। সেই সময়ত মোৰ পঢ়া-শুনাত সহায় কৰিবলৈ মোৰ মা আৰু ভনীয়েকে পুণেত আহি থকাৰ সিদ্ধান্ত লৈছিল, যাতে মই ঘৰৰ আখলৰ সোৱাদ আৰু আৱেগিক সমৰ্থন লাভ কৰিব পাৰো। মোৰ দেউতা নিজৰ কামৰ বাবে পুণেলৈ আহিব নোৱাৰিলে, কিন্তু তেওঁ মাজে মাজে আমাক লগ কৰিবলৈ আহিছিল। সেই সময়ছোৱাত তেওঁ অকলে আছিল আৰু আমি তিনিও পুণেত আছিলো।"
দেশৰ আটাইতকৈ কঠিন বুলি গণ্য কৰা চাৰ্টাৰ্ড একাউণ্টেণ্ট পৰীক্ষাৰ ফলাফল ২০২৬ চনৰ ১ মাৰ্চত ঘোষণা কৰা হয়। এই ফলাফলত আবৰাৰ আলন্দে বৃহৎ সফলতা অৰ্জন কৰে। আবৰাৰে কয়, "যি সময়ত ফলাফল ঘোষণা কৰা হৈছিল, মোৰ ককায়েক ৱাচিম আলন্দৰ ফোন আহিছিল আৰু তেওঁ আনন্দৰে কৈছিল যে হেল্ল' CA আবৰাৰ আয়ুব আলন্দ, তুমি পাছ কৰিলা! সেই সময়ত মোৰ যি আনন্দ অনুভৱ হৈছিল সেয়া ভাষাৰে প্ৰকাশ কৰিব নোৱাৰি।"
আবৰাৰ আলন্দক অভিনন্দন জনোৱা এক দৃশ্য
সেই বিশেষ দিনটোৰ কথা উল্লেখ কৰি আবৰাৰে কয়, "ফলাফল ঘোষণা কৰা দিনটোত ৰমজান চলি আছিল, সেয়েহে আমি সকলোৱে ৰোজা ৰাখিছিলো আৰু ফলাফল সন্ধিয়া প্ৰায় ৬.৩০ বজাত, অৰ্থাৎ ইফটাৰৰ সময়ৰ ওচৰা-উচৰিকৈ ওলাইছিল। আনন্দ ইমানেই বেছি আছিল যে মোৰ ঘৰৰ মানুহ আৰু আত্মীয়-স্বজনে চাৰিওফালে মোৰ সফলতাৰ খবৰ বিয়পাবলৈ আৰম্ভ কৰিছিল। সেই আনন্দত তেওঁলোকে ইফটাৰ সম্পূৰ্ণ কৰিবলৈকো পাহৰি গৈছিল, কাৰণ মোৰ সফলতাৰ আনন্দতে তেওঁলোকৰ আধা পিয়াহ আৰু ভোক গুচি গৈছিল।"
পৰিয়ালত সফলতাৰ পৰম্পৰা অব্যাহত
আবৰাৰ আলন্দৰ পৰিয়ালত শিক্ষা আৰু প্ৰতিযোগিতামূলক পৰীক্ষাত সফলতা লাভ কৰাৰ এক পৰম্পৰা আছে। তেওঁৰ সম্পৰ্কীয় ককায়েক ৱাচিম আলন্দও এজন চাৰ্টাৰ্ড একাউণ্টেণ্ট। আনহাতে, আন এজন ককায়েক আজম আলন্দে আৰক্ষী উপ-পৰিদৰ্শক (PSI) হিচাপে কৰ্মৰত। আবৰাৰেও এই ধাৰাবাহিকতা আগুৱাই নি পৰিয়ালৰ এই পৰম্পৰা অব্যাহত ৰাখিছে।
একেবাৰে সাধাৰণ পৰিয়ালৰ পৰা অহা আবৰাৰ আলন্দৰ এই সফলতাই মুছলমান সমাজৰ নৱপ্ৰজন্মৰ আগত শিক্ষাৰ জৰিয়তে উন্নতি কৰাৰ এক উৎকৃষ্ট নিদৰ্শন দাঙি ধৰিছে। অৰ্থৰ অভাৱ আৰু কঠিন পৰিস্থিতি থকাৰ পিছতো একাগ্ৰতা, কঠোৰ পৰিশ্ৰম আৰু নেৰানেপেৰা প্ৰচেষ্টাৰে যে ডাঙৰ সফলতা অৰ্জন কৰিব পাৰি, সেয়া আবৰাৰে নিজৰ কামেৰে প্ৰমাণ কৰি দেখুৱাইছে।
