দক্ষিণতকৈ উত্তৰ-পূবত অধিক জনপ্ৰিয় তামিলনাডুৰ মুখ্যমন্ত্ৰী চি জোচেফ বিজয়ঃ মোদী-ৰাহুলৰ পিছতেই প্ৰধানমন্ত্ৰী পদৰ পচন্দ ‘থালাপতি’
নিকুঞ্জ নাথ / গুৱাহাটী
ভাৰতীয় ৰাজনীতিত এতিয়া এক নতুন বতাহ বলিছে। যিগৰাকী ব্যক্তিয়ে এদিন ৰূপালী পৰ্দাত নিজৰ দুৰ্দান্ত একচন আৰু জীৱন্ত অভিনয়েৰে কোটি কোটি দৰ্শকৰ হৃদয় জয় কৰিছিল, তেওঁ এতিয়া বাস্তৱ জীৱনতো ৰাজনৈতিক নায়ক হিচাপে আত্মপ্ৰকাশ কৰিছে। তামিলনাডুৰ মুখ্যমন্ত্ৰী চি জোচেফ বিজয়- ভাৰতীয় ছবিজগতত যিগৰাকী ব্যক্তি 'থালাপতি' নামেৰে পৰিচিত, তেওঁৰ ৰাজনৈতিক উত্থান বৰ্তমান সমগ্ৰ দেশৰ বাবে এক চৰ্চাৰ বিষয় হৈ পৰিছে।
আটাইতকৈ আচৰিত কথাটো হ'ল, এজন প্ৰতিষ্ঠিত দক্ষিণ ভাৰতীয় নেতা হিচাপে তেওঁৰ জনপ্ৰিয়তা নিজৰ গৃহভূমিতকৈ দেশৰ উত্তৰ-পূৰ্বাঞ্চলতহে অধিক বৃদ্ধি পাইছে।
১৯৭৪ চনৰ ২২ জুনত চেন্নাইত জন্মগ্ৰহণ কৰা চি জোচেফ বিজয়ৰ সম্পূৰ্ণ নাম হ'ল যোচেফ বিজয় চন্দ্ৰশেখৰ। তেওঁৰ পিতৃ এছ এ চন্দ্ৰশেখৰ এগৰাকী বিখ্যাত তামিল চলচ্চিত্ৰ পৰিচালক আৰু মাতৃ শোভা চন্দ্ৰশেখৰ এগৰাকী প্ৰতিষ্ঠিত নেপথ্য গায়িকা। এটা সাংস্কৃতিক পৰিৱেশত ডাঙৰ-দীঘল হোৱা বিজয়ৰ শৈশৱৰ এটা ঘটনাই তেওঁৰ জীৱনত গভীৰ প্ৰভাৱ পেলাইছিল। মাত্ৰ দুবছৰ বয়সতে তেওঁ নিজৰ একমাত্ৰ ভগ্নী বিদ্যাক হেৰুৱাইছিল, যিটো ঘটনাই চঞ্চল স্বভাৱৰ বিজয়ক বহু পৰিমাণে শান্ত আৰু অন্তৰ্মুখী কৰি তুলিছিল।
চি জোচেফ বিজয়
শিক্ষাজীৱনৰ আৰম্ভণি চেন্নাইৰ ফাটিমা মেট্ৰিকুলেচন আৰু বালালোক মেট্ৰিকুলেচন স্কুলত কৰাৰ পাছত বিজয়ে প্ৰখ্যাত লয়লা কলেজত ভিজুৱেল কমিউনিকেচন বিভাগত নামভৰ্তি কৰিছিল। কিন্তু অভিনয়ৰ প্ৰতি থকা তীব্ৰ হেঁপাহৰ বাবে তেওঁ স্নাতক ডিগ্ৰী সম্পূৰ্ণ নকৰাকৈয়ে ছবিজগতত খোজ পেলায়।
১৯৮৪ চনত পিতৃৰ পৰিচালনাত শিশু শিল্পী হিচাপে অভিনয় আৰম্ভ কৰা বিজয়ে ১৯৯২ চনত 'নালাইয়া তীৰ্পু' ছবিত প্ৰথমবাৰৰ বাবে মুখ্য চৰিত্ৰত অভিনয় কৰে। তাৰ পাছত তেওঁক আৰু পিছলৈ উভতি চাবলগীয়া হোৱা নাই। 'গিল্লী', 'পোক্কিৰি', 'থুপ্পাক্কি', 'মাৰ্চেল', 'মাষ্টাৰ' আৰু 'লিঅ'' আদিৰ দৰে ছবিয়ে তেওঁক কেৱল তামিলনাডুতে নহয়, সমগ্ৰ ভাৰততে জনপ্ৰিয় কৰি তোলে। দৰ্শকৰ প্ৰতি থকা দায়বদ্ধতা আৰু সামাজিক বাৰ্তাবাহী ছবিৰ জৰিয়তে তেওঁ জনসাধাৰণৰ মাজত 'থালাপতি' অৰ্থাৎ সেনাপতি হিচাপে পৰিচিত হয়। ছবিজগতত তেওঁৰ এই বিশাল জনপ্ৰিয়তাই পৰৱৰ্তী সময়ত তেওঁৰ ৰাজনৈতিক যাত্ৰাৰ আধাৰশিলা স্থাপন কৰিলে।
২০২৪ চনত 'তামিলাগা ভেট্ৰি কাজাগাম' (TVK) নামৰ ৰাজনৈতিক দল গঠন কৰি আনুষ্ঠানিকভাৱে ৰাজনীতিত প্ৰৱেশ কৰা বিজয়ে, ২০২৬ চনত দলটোক ক্ষমতালৈ আনি তামিলনাডুৰ মুখ্যমন্ত্ৰীৰ আসন অলংকৃত কৰে। কিন্তু আটাইতকৈ আকৰ্ষণীয় দিশটো হ'ল, অভিনেতাৰ পৰা ৰাজনীতিবিদলৈ ৰূপান্তৰিত হোৱা বিজয়ৰ ৰাজনৈতিক ভেটি তামিলনাডুত গঢ় লৈ উঠিলেও, দেশৰ পৰৱৰ্তী প্ৰধানমন্ত্ৰী হিচাপে তেওঁৰ প্ৰতি সৰ্বাধিক সমৰ্থন দক্ষিণ ভাৰতৰ পৰা নহয়, বৰং উত্তৰ-পূৰ্বাঞ্চলৰ পৰাহে আহিছে।
‘ইণ্ডিয়া টুডে-চিভোটাৰ’ৰ ২০২৬ চনৰ আগষ্ট মাহৰ ‘মুড অৱ দ্য নেচন’ (Mood of the Nation - MOTN) সমীক্ষাৰ ফলাফল অনুসৰি, উত্তৰ-পূৰ্বাঞ্চলৰ ১৮.৫ শতাংশ লোকে বিজয়ক ভাৰতৰ পৰৱৰ্তী প্ৰধানমন্ত্ৰী পদৰ বাবে আটাইতকৈ উপযুক্ত ব্যক্তি হিচাপে মত প্ৰকাশ কৰিছে। এই সমৰ্থন দক্ষিণ ভাৰতত তেওঁ লাভ কৰা ১৪.৩ শতাংশৰ তুলনাত লক্ষণীয়ভাৱে বেছি।
তামিলনাডুৰ মুখ্যমন্ত্ৰী চি জোচেফ বিজয়
নিৰ্বাচনী ৰাজনীতিত নৰেন্দ্ৰ মোদী বা ৰাহুল গান্ধীৰ দৰে সমগ্ৰ দেশজুৰি বিজয়ৰ কোনো শক্তিশালী দলীয় সংগঠন নাই। তথাপি তেওঁ লাভ কৰা এই বিপুল সমৰ্থনে ৰাজনৈতিক মহলক আচৰিত কৰি তুলিছে।
সমগ্ৰ দেশৰ প্ৰেক্ষাপটত, বিজয় বৰ্তমান প্ৰধানমন্ত্ৰী পদৰ বাবে তৃতীয় সৰ্বাধিক পচন্দৰ নেতা হিচাপে পৰিগণিত হৈছে। ৰাষ্ট্ৰীয় পৰ্যায়ত শীৰ্ষ নেতাসকলৰ সমৰ্থনৰ হাৰ নৰেন্দ্ৰ মোদী: ৪৮.৭%, ৰাহুল গান্ধী: ২৭.১% আৰু চি জোচেফ বিজয় ৯.২%৷ আটাইতকৈ গুৰুত্বপূৰ্ণ কথাটো হ'ল, বিজয়ে মমতা বেনাৰ্জী, অখিলেশ যাদৱ আৰু অৰবিন্দ কেজৰিৱালৰ দৰে বহুদিনীয়া প্ৰতিষ্ঠিত আঞ্চলিক নেতাসকলকো জনপ্ৰিয়তাৰ দৌৰত বহু পিছ পেলাইছে।
সমীক্ষাটোৰ আঞ্চলিক পৰিসংখ্যাসমূহ বিশ্লেষণ কৰিলে বিজয়ৰ জনপ্ৰিয়তাৰ এখন স্পষ্ট ছবি পোৱা যায়৷ উত্তৰ-পূৰ্বাঞ্চলত প্ৰধানমন্ত্ৰী হিচাপে বিজয়লৈ সমৰ্থনৰ হাৰ ১৮.৫% (ৰাষ্ট্ৰীয় গড় ৯.২% ৰ দুগুণতকৈও অধিক)৷ আনহাতে, দক্ষিণ ভাৰতত প্ৰধানমন্ত্ৰী হিচাপে বিজয়লৈ সমৰ্থনৰ হাৰ ১৪.৩%, পূব ভাৰতত, ৯.৬%, পশ্চিম ভাৰতত ৮.৫% আৰু উত্তৰ ভাৰতত ৪.৬% (আটাইতকৈ দুৰ্বল অঞ্চল)৷ ইয়াৰ অৰ্থ হ'ল, তামিলনাডুৰ এই নৱাগত ৰাজনীতিবিদগৰাকী উত্তৰ ভাৰততকৈ উত্তৰ-পূৰ্বাঞ্চলত প্ৰায় চাৰিগুণ অধিক জনপ্ৰিয়।
একচন আৰু জীৱন্ত অভিনয়েৰে কোটি কোটি দৰ্শকৰ হৃদয় জয় কৰিছিল বিজয়ে
উত্তৰ-পূৰ্বাঞ্চলৰ এই ফলাফল বিশেষভাৱে গুৰুত্বপূৰ্ণ হোৱাৰ মূল কাৰণটো হ’ল— এই অঞ্চলত বিজয়ৰ দল ‘টিভিকে’ (TVK)-ৰ কোনো উল্লেখযোগ্য সাংগঠনিক ভেটি বা কাৰ্যালয় নাই। গতিকে এই সমৰ্থনক কেৱল দলীয় প্ৰচাৰ বা স্থানীয় মিত্ৰজোঁটৰ ফল বুলি ক’ব নোৱাৰি। ইয়াৰ পৰিৱৰ্তে, ই প্ৰমাণ কৰে যে ভোটাৰসকলে এতিয়া পুৰণি ৰাষ্ট্ৰীয় বিকল্পসমূহৰ বাহিৰত নতুন আৰু আকৰ্ষণীয় নেতৃত্বৰ সন্ধান কৰিছে। এগৰাকী নৱাগত নেতাৰ ব্যক্তিগত গ্ৰহণযোগ্যতা আৰু ছৱিজগতৰ জৰিয়তে লাভ কৰা সৰ্বভাৰতীয় পৰিচয়েই ইয়াত মুখ্য ভূমিকা পালন কৰিছে। মুখ্যমন্ত্ৰী হোৱাৰ পাছৰে পৰা দলৰ নেতাসকলেও তেওঁক ২০২৯ চনৰ লোকসভা নিৰ্বাচনৰ সম্ভাৱ্য প্ৰধানমন্ত্ৰী পদৰ প্ৰাৰ্থী হিচাপে প্ৰক্ষেপ কৰিবলৈ আৰম্ভ কৰিছে আৰু এই সমীক্ষাই তেওঁলোকৰ উচ্চাকাংক্ষাক এক বাস্তৱিক আধাৰ প্ৰদান কৰিছে।
বৰ্তমানৰ বিৰোধী নেতাসকলৰ মাজত কোনে বিৰোধী মিত্ৰজোঁটক নেতৃত্ব দিয়াটো উচিত- এই প্ৰশ্নৰ উত্তৰতো বিজয়ে নিজৰ শক্তিমত্তা প্ৰদৰ্শন কৰিছে: ৰাহুল গান্ধী: ২৯%, চি. জোচেফ বিজয়: ১২.২%৷ বিজয় এই তালিকাত দ্বিতীয় স্থানত থকাৰ লগতে অন্যান্য জ্যেষ্ঠ বিৰোধী নেতাসকলতকৈ স্পষ্টভাৱে আগবাঢ়ি আছে।
মুখ্যমন্ত্ৰী ৰূপে শপতগ্ৰহণৰ মুহূৰ্তত চি জোচেফ বিজয়
২০২৬ চনৰ আগষ্ট মাহৰ এই ‘মুড অৱ দ্য নেচন’ সমীক্ষাটো প্ৰখ্যাত সংস্থা ‘CVoter’-এ সম্পন্ন কৰিছিল। ১ জুলাইৰ পৰা ২৫ আগষ্টৰ ভিতৰত ২৫,১৮৪ গৰাকী লোকৰ প্ৰত্যক্ষ মতামত লোৱাৰ লগতে, বিগত ছয় মাহত নিয়মীয়া অনুসৰণৰ পৰা সংগ্ৰহ কৰা আন ৯১,৭৯৫ গৰাকী লোকৰ সাক্ষাৎকাৰৰ তথ্যকো এই চূড়ান্ত ফলাফলত সন্নিৱিষ্ট কৰা হৈছে।
দক্ষিণৰ ভৌগোলিক সীমা অতিক্ৰম কৰি উত্তৰ-পূৰ্বাঞ্চলৰ ভূমিত তামিলনাডুৰ মুখ্যমন্ত্ৰী বিজয়ৰ এই অভাৱনীয় উত্থানে দেশৰ সাম্প্ৰতিক ৰাজনীতিত এক নতুন ধাৰাৰ সূচনা কৰিছে। কোনো সাংগঠনিক ভেটি নথকাকৈয়ে এগৰাকী আঞ্চলিক নেতাই লাভ কৰা এই বিপুল সঁহাৰিয়ে প্ৰমাণ কৰে যে ভাৰতৰ জনসাধাৰণে এতিয়া পৰম্পৰাগত ৰাজনৈতিক সমীকৰণৰ বাহিৰলৈ গৈ নতুন আৰু শক্তিশালী বিকল্প বিচাৰিছে। এই পৰিস্থিতিয়ে অনাগত ২০২৯ চনৰ লোকসভা নিৰ্বাচনৰ ৰাষ্ট্ৰীয় ৰাজনীতিত চি জোচেফ বিজয়ক যে এক অন্যতম কেন্দ্ৰীয় চৰ্চাৰ বিষয় কৰি তুলিব, সেয়া নিশ্চিত।
.webp)
.webp)
