চিন্থা পৰমেশ আৰু তেওঁৰ পিতৃ-মাতৃক গাঁও পঞ্চায়ত আৰু গাঁওবুঢ়াই সম্বৰ্ধনা জনোৱাৰ মুহূৰ্ত
আৱাজ দ্য ভইচ / নতুন দিল্লী
তেলেংগনাৰ নগৰকুৰুনুল জিলাৰ বালমুৰ মণ্ডলৰ কন্দানাগুলা গাঁৱৰ চিন্থা পৰমেশ (Chintha Paramesh) নামৰ যুৱকজনে নিজৰ জীৱনৰ সকলো সংগ্ৰাম পিছলৈ এৰি এক ডাঙৰ সফলতা অৰ্জন কৰিছে। এটা সময়ত বাৰ্ষিক ১৫০০ টকাকৈ শিশু শ্ৰমিক হিচাপে কাম কৰা পৰমেশে শেহতীয়াকৈ উছমানিয়া বিশ্ববিদ্যালয় (OU)ৰ পৰা এ পি এইচ ডি ডিগ্ৰী লাভ কৰিছে। ১৪ বছৰ বয়সত অধ্যয়ন আৰম্ভ কৰা পৰমেশে ৩৫ বছৰ বয়সত তেওঁৰ থিছিছ সম্পূৰ্ণ কৰি এই ডিগ্ৰী লাভ কৰিবলৈ সক্ষম হৈছে।
৪ জুলাইৰ দিনা তেওঁৰ গাঁৱত এক উৎসৱমুখৰ পৰিৱেশে বিৰাজ কৰিছিল। গাঁৱৰ লোকসকল আৰু জিলা প্ৰশাসনে পৰমেশক উষ্ম আদৰণি জনায়। তেওঁক প্ৰথমতে গাঁও পঞ্চায়তে আৰু তাৰ পিছত নগৰকুৰুনুলৰ জিলা উপায়ুক্ত বদাৱত সন্তোষে তেওঁৰ কাৰ্যালয়ত সম্বৰ্ধনা জনায়। শুকুৰবাৰে মুখ্যমন্ত্ৰীৰ শুভেচ্ছাৰ পিছদিনাই পৰমেশে স্থানীয় সংবাদ মাধ্যমত ব্যাপক চৰ্চা লাভ কৰে।
পৰমেশৰ পিতৃ-মাতৃ ক্ৰান্তি মাচান্না আৰু ক্ৰান্তি তিৰুপত্তম্মাই আনৰ খেতিত কাম কৰিছিল আৰু তেওঁলোকৰ নিজৰ মাটি নাছিল। পৰিয়ালৰ আৰ্থিক অৱস্থা দুৰ্বল হোৱাৰ বাবে শৈশৱত পৰমেশক সৰু ভাই-ভনীসকলৰ যত্ন ল'বলৈ বিদ্যালয়লৈ পঠোৱা নহ'ল। পিছত তেওঁ চাকৰি পালে, কিন্তু পঢ়াৰ প্ৰতি তেওঁৰ আগ্ৰহ কেতিয়াও হ্ৰাস হোৱা নাছিল।
চিন্থা পৰমেশক নগৰকুৰুনুল জিলা উপায়ুক্তই সম্বৰ্ধনা জনাইছে
পৰমেশে কয়, "মোৰ পঢ়াৰ প্ৰতি ভালপোৱা আছিল। সেইবাবে মই স্কুলৰ ইউনিফৰ্ম চিলাইছিলো, যদিও মই স্কুললৈ যোৱা নাই।" পঢ়াৰ এই আগ্ৰহে তেওঁৰ জীৱন সলনি কৰি পেলালে। এম ভি ফাউণ্ডেশ্যনৰ এজন স্বেচ্ছাসেৱকে তেওঁৰ অৱস্থা বুজি পাই তেওঁক এখন ব্ৰিজ পাঠ্যক্ৰমত নামভৰ্তি কৰাই দিয়ে। তাৰপিছত তেওঁ সপ্তম শ্ৰেণীৰ পৰীক্ষাত উত্তীৰ্ণ হয় আৰু বালমূৰৰ জোডপিএইচএছ স্কুলত পঢ়া আৰম্ভ কৰে।
কঠোৰ পৰিশ্ৰম আৰু অধ্যৱসায়ৰ মাজেৰে তেওঁ উচ্চ শিক্ষাৰ পথ বাছি লয় আৰু অৱশেষত পিএইচডি ডিগ্ৰী লাভ কৰে। আজি পৰমেশে সেইসকল শিশুৰ বাবে প্ৰেৰণা হৈ পৰিছে যিসকলে কোনো কাৰণত বিদ্যালয় এৰি দিয়ে। তেওঁ কয়, "মই কোনো শিশুক মোৰ দৰে সংগ্ৰাম কৰিব নিদিওঁ। তেওঁলোকে পঢ়া-শুনা অব্যাহত ৰাখক আৰু তেওঁলোকৰ সপোন পূৰণ কৰক।"
পৰমেশৰ এই কাহিনীয়ে প্ৰমাণ কৰে যে ইচ্ছাশক্তি থাকিলে কোনো বাধা-বিঘিন হেঙাৰ হ'ব নোৱাৰে।
