গুৱাহাটী
দীঘলীয়া বিতৰ্ক আৰু উত্তপ্ত পৰিস্থিতিৰ মাজতে চাহ শ্ৰমিকক মাটিৰ পট্টা দিয়াৰ বাবে বিধানসভাত উত্থাপন কৰা সংশোধনী আইন গৃহীত হোৱাৰ লগে লগে শাসকীয় দলৰ বিধায়কসকলে শ্ল'গান দি চৰকাৰখনৰ গুণানুকীৰ্তন কৰে।
বিধানসভাৰ শীতকালীন অধিৱেশনৰ শুকুৰবাৰে চতুৰ্থ দিনা সদনত মন্ত্রী কেশৱ মহন্তই 'দ্য় আসাম ফিক্সেছন অৱ চিলিং অৱ লেণ্ড হ'ল্ডিংছ (সংশোধনী) আইন ২০২৫' উত্থাপন কৰে । উত্থাপন কৰাৰ পিছতে সংশোধনী আইনখনক লৈ যথেষ্ট বিতৰ্ক হোৱাৰ পাছত হুলস্থূলীয়া পৰিৱেশৰ মাজতে অধ্যক্ষই আইনখন গৃহীত কৰে । লক্ষণীয় বিষয় যে বিধানসভা নিৰ্বাচনৰ পূৰ্বে চাহ শ্ৰমিকৰ বাবে চৰকাৰখনে এক ডাঙৰ উপহাৰ আগবঢ়াইছে। ইফালে, চাহ বাগিচাৰ লোকক মাটিৰ পট্টা প্ৰদানৰ বাবে সদনত উত্থাপন কৰা আইনখনক লৈ সদনত ভাষণ ৰাখে মুখ্যমন্ত্রী হিমন্ত বিশ্ব শৰ্মাই।
মুখ্যমন্ত্রীয়ে কয়, "আজি এটা ঐতিহাসিক মুহূৰ্ত। এখন ঐতিহাসিক আইন প্ৰণয়নৰ দিন। চাহ শ্ৰমিকসকলক আমাৰ জাতীয় জীৱনত অভূতপূৰ্ব অৱদান তথা বৰঙনি আছে; কিন্তু সময়ৰ সৈতে চাহ বাগিচাৰ শ্ৰমিকসকল আগুৱাই যাব পৰা নাই। ২০১৬ চনত অসমত বিজেপিৰ চৰকাৰ আহোতে প্ৰধানমন্ত্রী নৰেন্দ্ৰ মোদীয়ে চাহ শ্ৰমিকৰ জীৱনলৈ অৰ্থবহ পৰিৱৰ্তন অনাৰ বাবে কাম কৰিবলৈ আমাক কৈছিল। ২০১৬ চনত প্ৰথম চাহ শ্ৰমিকক বেংক একাউণ্টৰ অধিকাৰী কৰা হৈছিল। সাত লাখ বেংক একাউণ্ট কৰা হৈছিল। নগদ ধন দিয়াৰ ব্যৱস্থা কৰা হৈছিল। আমি অনুভৱ কৰিছিলো চাহ বাগিচাত কৰিবলগীয়া বহুত কাম আছে।"
সদনত মুখ্যমন্ত্রীয়ে কয়, "আমি সদনত চাহ শ্ৰমিকৰ স্বাৰ্থৰ কথা ক'ব লওতে বিধেয়কখন পাৰিত হোৱাত বাধা দিব বিচাৰিছে। উচ্ছেদ চলিব । অখিলে বাধা দিব নোৱাৰে । আমি চিলিং এক্টত সংশোধন আনিছো। সুৰক্ষাৰ কথা আনিছো। চাহ বাগচাৰ লাইনৰ মাটি চৰকাৰীকৰণ হ'ব। থকাসকলে সেই মাটি পাব। বগিচাৰ ভিতৰতে এখন কমিটী বনোৱা হ'ব। যিসকল লোক যিখিনি মাটিত আছিল সেই মাটিখিনিৰ পট্টা পাব। পট্টা পোৱাৰ পাছত ২০ বছৰলৈ বিক্ৰী কৰিব নোৱাৰিব। বেংকৰ পৰা ঋণ ল'ব পাৰিব। ২০ বছৰ পিছত বিক্ৰী কৰিব হ'লে সংশ্লিষ্ট চাহ বাগিচাৰ শ্ৰমিককহে বিক্ৰী কৰিব পাৰিব। লাইনৰ মাটি চাহ শ্ৰমিকৰ হাততে থাকিব। আমি চিৰদিনৰ বাবে চাহ বাগিচাৰ মাটি চাহ শ্ৰমিকৰ বাবে সংৰক্ষিত কৰিব বিচাৰিছো। এই আইনখনক সকলোৱে স্বীকৃতি দিব লাগে।"
"আজিৰ সদনে এক নতুন ইতিহাস ৰচনা কৰিবলৈ গৈছে। চাহ শ্ৰমিকৰ ৩ লাখ পৰিয়ালে মাটিৰ অধিকাৰ পাব। পুনৰ আমাৰ চৰকাৰ হ'লে ৩ লাখ পৰিয়ালক ঘৰ বনাবলৈ সহায় কৰিম। দুমাহৰ ভিতৰত চাহ শ্ৰমিকৰ ঘৰ নিৰ্মাণ কৰাৰ আঁচনিখন আৰম্ভ কৰিম। প্ৰতিখন জিলাৰ চাহ বাগিচাৰ মাটিৰ ছাৰ্ভে কৰিবলৈ জিলা আয়ুক্তক নিৰ্দেশ দিয়া হৈছে।"এইদৰে কয় মুখ্যমন্ত্ৰীয়ে।
