ভাৰত ভ্ৰমণৰ সময়ত প্ৰধানমন্ত্ৰী মোদীৰ সৈতে আমেৰিকাৰ উপ-ৰাষ্ট্ৰপতি জে ডি ভান্স, তেওঁৰ পত্নী উষা ভান্স আৰু তেওঁলোকৰ সন্তান
আৱাজ দ্য ভইচ অসম ব্যুৰ'
আমেৰিকাৰ উপ-ৰাষ্ট্ৰপতি জে ডি ভান্সৰ পত্নী তথা দেশখনৰ দ্বিতীয় লেডী উষা ভান্সে কয় যে তেওঁলোকৰ তিনিজন সন্তান ক্ৰমে ইৱান, বিবেক আৰু মিৰাবেলে ডাঙৰ হৈ কেথলিক ধৰ্ম গ্ৰহণ কৰিব বিচাৰে নে নাই, সেয়া তেওঁলোকে নিজৰ স্বাধীনতা অনুসৰি নিৰ্ণয় কৰিব পাৰিব।
মেগান মেককেইন নামৰ এগৰাকী আমেৰিকান টেলিভিছন ব্যক্তিত্ব, স্তম্ভলেখক আৰু লেখিকাৰ সৈতে হোৱা এক সাক্ষাৎকাৰত উষা ভান্সে কয় যে তেওঁলোকৰ জ্যেষ্ঠ সন্তান ইৱানে বেপটিচ কেথলিক হোৱাৰ সিদ্ধান্ত লৈছে আৰু আনজন পুত্ৰ বিবেকে নিজৰ পচন্দ অনুসৰি তেওঁৰ ধৰ্ম বাচনি কৰিবলৈ সাজু হৈছে।
উল্লেখ্য যে, আমেৰিকাৰ উপ-ৰাষ্ট্ৰপতি জে ডি ভান্সে বিবাহৰ পিছত কেথলিক ধৰ্মলৈ ধৰ্মান্তৰিত হৈছে। এই বিষয়ে মন্তব্য কৰি দ্বিতীয় লেডী উষা ভান্সে কয় যে তেওঁলোকে গীৰ্জালৈ যোৱাটো পৰিয়ালৰ এটা নিয়মত পৰিণত হৈছে যদিও তেওঁলোকৰ সন্তানে জানে যে উষা ভ্যান্স কেথলিক নহয়, হিন্দু, আৰু তেওঁ কেতিয়াও ধৰ্মান্তৰিত হ'ব নিবিচাৰে।
"যি সময়ত মই জে ডিক লগ পাইছিলো, তেওঁ কেথলিক নাছিল, আৰু তেওঁ পিছত ধৰ্মান্তৰিত হৈছিল আৰু যেতিয়া তেওঁ ধৰ্মান্তৰিত হৈছিল, আমি সেই বিষয়ে বহুত কথা পাতিছিলো। আমাৰ প্ৰথম সন্তান জন্ম হোৱাৰ পিছত তেওঁ এই সিদ্ধান্ত লৈছিল।", উষাই কয়।
"মই কেথলিক নহয়, আৰু মই ধৰ্মান্তৰিত হ'বলৈ ইচ্ছা কৰা নাই বা তেনে কোনো কাম কৰা নাই। সেয়ে আমি সিদ্ধান্ত ল'লো যে আমাৰ সন্তানক কেথলিক স্কুললৈ পঠিয়াম, আৰু আমি তেওঁলোকক প্ৰত্যেককে এটা বিকল্প প্ৰদান কৰিলো। তেওঁলোকে নিজে সিদ্ধান্ত ল'ব পাৰে যে তেওঁলোকে কেথলিক বাপটিচ গ্ৰহণ কৰিব বিচাৰে নে নাই।", তেওঁ কয়।
তাজমহলৰ সন্মুখত সপৰিয়ালে উষা ভান্স
উষা ভান্সে কয় যে তেওঁলোকৰ সন্তানে বিভিন্ন গ্ৰন্থ অধ্যয়নৰ জৰিয়তে হিন্দু পৰম্পৰাৰ বিষয়ে প্ৰচুৰ জ্ঞান লাভ কৰিছে। তেওঁলোকে শেহতীয়াকৈ ভাৰত ভ্ৰমণ কৰিও হিন্দু ধৰ্মৰ বিষয়ে বহুত কথা জানিব পাৰিছে। হিন্দু পৰম্পৰা তেওঁলোকৰ জীৱনৰ এটা অংশ যদিও ভান্সসকলে ঘৰত হিন্দু উৎসৱ যেনে দীপাৱলী, হোলী আদি উদযাপন নকৰে। কিন্তু তেওঁলোকে উষাৰ পিতৃ-মাতৃ আৰু আইতাকৰ সৈতে বহু সময় কটায়।
"মোৰ আইতা এগৰাকী হিন্দু ভক্ত। তেওঁ প্ৰতিদিনে প্ৰাৰ্থনা কৰে, নিয়মীয়াকৈ মন্দিৰলৈ যায়, পূজা কৰে। আমি তেওঁৰ লগত বহুত সময় পাৰ কৰোঁ। আমি ঘৰত বেছি ছুটি নলওঁ, কিন্তু আমি পৰিয়ালৰ সৈতে সময় কটাওঁ", উষাই লগতে কয়। সাক্ষাৎকাৰটোত উষা ভান্সে জানিবলৈ দিয়ে যে তেওঁ অহা বছৰ ঘৰত এটা হোলী পাৰ্টি আয়োজন কৰিব বিচাৰে।
.webp "প্ৰতিনিধিত্বমূলক ফটো")
