ফিফা বিশ্বকাপ ২০২৬ ৰ বিজয়ীসকলক প্ৰথমবাৰৰ বাবে চেম্পিয়নশ্বিপ ৰিং প্ৰদান কৰিব ফিফাই
নতুন দিল্লী
ফিফাই ২০২৬ চনৰ ফিফা বিশ্বকাপৰ বিজয়ীসকলক বিশেষভাৱে নিৰ্মিত চেম্পিয়নশ্বিপ ৰিং (আঙঠি) প্ৰদান কৰিব। প্ৰতিযোগিতাখনৰ ইতিহাসত আইকনিক ট্ৰফী আৰু সোণৰ পদকৰ সমান্তৰালভাৱে প্ৰথমবাৰৰ বাবে এই সন্মান সংযোজন কৰা হৈছে।
ফিফাৰ ৱেবছাইট অনুসৰি, আমেৰিকান ক্ৰীড়া জগতৰ এক দীৰ্ঘদিনীয়া পৰম্পৰাৰ পৰা অনুপ্ৰাণিত হৈ এই আঙঠিবোৰ প্ৰস্তুত কৰা হৈছে। অহা ১৯ জুলাই, দেওবাৰে নিউয়ৰ্ক নিউ জাৰ্চি ষ্টেডিয়ামত স্পেইন আৰু আৰ্জেণ্টিনাৰ মাজত অনুষ্ঠিত হ’বলগীয়া বিশ্বকাপৰ ফাইনেল খেলখনৰ অন্তত চেম্পিয়নসকলক এই আঙঠিবোৰ প্ৰদান কৰা হ’ব।
২০২৬ চনৰ এই প্ৰতিযোগিতাখনক স্মৰণীয় কৰি ৰাখিবলৈ মুঠ ২,০২৬ টা সুকীয়া নম্বৰযুক্ত চেম্পিয়নশ্বিপ ৰিং তৈয়াৰ কৰা হ’ব। ইয়াৰে ৩০ টা আঙঠি বিজয়ী দলৰ খেলুৱৈ আৰু প্ৰশিক্ষকসকলৰ বাবে সংৰক্ষিত থাকিব, আনহাতে বাকী ১,৯৯৬ টা আঙঠি অনুৰাগীসকলৰ বাবে আনুষ্ঠানিকভাৱে লাইচেন্সপ্ৰাপ্ত স্মৰণিকা হিচাপে বিশ্বজুৰি বিক্ৰী কৰা হ’ব।
প্ৰতিটো আঙঠিৰ এফালে ফিফা বিশ্বকাপৰ ট্ৰফীটো খোদিত থাকিব আৰু আনটো ফাল বিজয়ী দেশখনক প্ৰতিনিধিত্ব কৰাকৈ বিশেষভাৱে ডিজাইন কৰা হ’ব। প্ৰতিটো আঙঠিতে একক নম্বৰ থাকিব, গ্ৰহণকাৰীৰ আঙুলিৰ জোখ অনুসৰি তৈয়াৰ কৰা হ’ব আৰু ইয়াৰ সৈতে এটা প্ৰামাণিকতাৰ প্ৰমাণপত্ৰও প্ৰদান কৰা হ’ব।
খেলৰ পৰৱৰ্তী উদযাপনৰ সময়ত, বিজয়ী দলৰ অধিনায়ক আৰু মুখ্য প্ৰশিক্ষকগৰাকীয়ে অস্থায়ী চেম্পিয়নশ্বিপ ৰিং লাভ কৰিব। চেম্পিয়নসকলৰ বাবে নিৰ্দিষ্ট কৰা চূড়ান্ত ৩০ টা আঙঠি পিছত তেওঁলোকৰ ব্যক্তিগত জোখ অনুসৰি বিশেষভাৱে তৈয়াৰ কৰি আনুষ্ঠানিকভাৱে প্ৰদান কৰা হ’ব।
ছেমি-ফাইনেলত ইংলেণ্ডৰ বিৰুদ্ধে ২-১ গ’লৰ এক নাটকীয় প্ৰত্যাৱৰ্তনমূলক বিজয় সাব্যস্ত কৰি আৰ্জেণ্টিনাই ফাইনেলত নিজৰ স্থান নিশ্চিত কৰিছিল। খেলৰ প্ৰথমাৰ্ধত পিছ পৰি থকাৰ পিছত, এঞ্জো ফাৰ্নাণ্ডেজে গ’ল দি স্ক’ৰ সমতা লৈ আনে আৰু তাৰ পিছত লাউটাৰো মাৰ্টিনেজে ইনজুৰী টাইমত বিজয়ী গ’লটো দি ডিফেণ্ডিং চেম্পিয়ন আৰ্জেণ্টিনাক আন এখন বিশ্বকাপৰ ফাইনেললৈ লৈ যায়। এই পৰাজয়ে ১৯৬৬ চনৰ পিছত প্ৰথমবাৰৰ বাবে বিশ্বকাপৰ ফাইনেলত প্ৰৱেশ কৰাৰ ইংলেণ্ডৰ আশাত চেঁচা পানী পেলালে।
ইফালে, ফ্ৰান্সক ২-০ গ’লত পৰাস্ত কৰি ২০১০ চনত ট্ৰফী জয় কৰাৰ পিছত স্পেইনে প্ৰথমবাৰৰ বাবে বিশ্বকাপৰ ফাইনেলত প্ৰৱেশ কৰিছে। লুগা ডিগনেৰ পৰা বল কাঢ়ি লৈ লেমিন য়ামালে এটা পেনাল্টী আদায় কৰাত গুৰুত্বপূৰ্ণ ভূমিকা পালন কৰে, যাৰ ফলত খেলৰ ২২ নম্বৰ মিনিটত মিকেল অয়াৰজাবালে গ’ল দি দলক অগ্ৰগতি দিয়ে।
দানী অলমোৰ সুন্দৰ পাছৰ সহায়ত পেড্ৰ’ পৰোৱে অৰ্ধবিৰতিৰ পিছত স্পেইনৰ হৈ দ্বিতীয়টো গ’ল কৰে। য়ামালৰ এটা গ’ল অফচাইডৰ বাবে বাতিল কৰা হয়, আনহাতে খেলৰ শেষৰ ফালে কিলিয়ান এমবাপে আৰু অৰেৰ্লিয়ান ছুৱামেনীৰ গ’ল কৰাৰ প্ৰচেষ্টাই স্পেইনৰ ৰক্ষণভাগক ভেদ কৰিব নোৱাৰিলে। স্পেইনৰ ৰক্ষণভাগে এই প্ৰতিযোগিতাৰ সাতখন খেলৰ ভিতৰত ষষ্ঠবাৰৰ বাবে বিপক্ষক এটাও গ’ল কৰিবলৈ নিদিয়াৰ ৰেকৰ্ড গঢ়িলে। এই বিজয়েৰে স্পেইনে ফিফা বিশ্বকাপৰ ফাইনেলত দ্বিতীয়বাৰৰ বাবে নিজৰ স্থান সুৰক্ষিত কৰিলে।
.webp "'শ্বক দ্য হক'")
