আৱাজ-দ্য ভইচ
প্ৰতিটো বছৰ আৰম্ভ হয় নতুন সংকল্প আৰু কিছু লক্ষ্যৰে। ২০২৫ ৰ আৰম্ভণিতে ভাৰতীয় ক্ৰিকেটৰ পৰা বহু আশা কৰা হৈছিল। কিন্তু জানুৱাৰী মাহত আৰম্ভ হোৱা এই যাত্ৰা ডিচেম্বৰ মাহত সম্পূৰ্ণ হৈ বেলেগ গন্তব্যস্থানত উপনীত হৈছে। বছৰটোৰ ফালে ঘূৰি চাই অনুমান কৰিব পাৰি যে, "কি কি পৰিকল্পনা কৰা হৈছিল আৰু প্ৰকৃততে কি হৈছে?" এই প্ৰশ্নটো সুধিবলৈ একেবাৰেই স্বাভাৱিক। ২০২৫ বৰ্ষই ভাৰতীয় ক্ৰিকেটক কিছুমান ক্ষেত্ৰত সফলতাৰ শিখৰত উপনীত কৰাইছিল, কিন্তু আন কিছুমান ক্ষেত্ৰত পিছলিবলগীয়াও হৈছিল আৰু বৰ্তমানৰ 'ষ্টাৰ কালচাৰ'ৰ সম্পূৰ্ণ অৱসান ঘটাইছিল।
পুৰুষৰ হোৱাইট-বল সফলতা
২০২৫ চনৰ ফেব্ৰুৱাৰী মাহত ৰোহিত শৰ্মাৰ নেতৃত্বত ভাৰতে দুবাইত অনুষ্ঠিত চেম্পিয়নছ ট্ৰফীত ঐতিহাসিক বিজয় অৰ্জন কৰিছিল। এই টুৰ্ণামেণ্টৰ মূলত পাকিস্তানত অনুষ্ঠিত হোৱাৰ কথা আছিল যদিও ভাৰতৰ আপত্তিৰ বাবে ইয়াক ডুবাইত অনুষ্ঠিত কৰা হয়। ভাৰতীয় দলটো সমগ্ৰ টুৰ্ণামেণ্টত অপৰাজিত হৈ ট্ৰফীটো লাভ কৰিবলৈ সক্ষম হয়। নিউজিলেণ্ডৰ বিৰুদ্ধে ফাইনেলত ৰোহিতে চাপত ৭৬ ৰাণৰ এক নিৰ্ণায়ক বেটিং প্ৰদৰ্শনেৰে কৰি 'অজেয় অধিনায়ক' হিচাপে নিজৰ যোগ্যতা প্ৰমাণ কৰিছিল।
তিনিবাৰকৈ চেম্পিয়নছ ট্ৰফী অৰ্জন কৰি ভাৰতে অভিলেখ সৃষ্টি কৰে
কিন্তু ভাগ্যৰ ৰহস্যময় গতিবিধি আছে। ২০২৭ চনৰ বিশ্বকাপৰ কথা মনত ৰাখি বিশ্ব জয় কৰাৰ পাছতেই ৰোহিত শৰ্মাক অধিনায়কৰ পদৰ পৰা অপসাৰণ কৰা হয়। কেৱল তেওঁৰ নেতৃত্বৰ ওপৰত প্ৰশ্ন উত্থাপন কৰা হোৱা নাছিল, ৰোহিত আৰু বিৰাট কহলী দুয়োৰে স্থানৰ ওপৰতো প্ৰশ্ন উত্থাপন হৈছিল। অৱশ্যে, দুয়োগৰাকী কিংবদন্তিয়ে তেওঁলোকৰ সমালোচকসকলক তেওঁলোকৰ বেটেৰে নীৰৱ কৰি ৰাখিছিল। ইয়াৰ পিছত, সূৰ্যকুমাৰ যাদৱৰ নেতৃত্বত ভাৰতে এছিয়া কাপতও অনস্বীকাৰ্য আধিপত্য বিস্তাৰ কৰে।
দুই কিংবদন্তিৰ বিদায়
২০২৫ চনটো ৰোহিত শৰ্মা আৰু বিৰাট কোহলীৰ টেষ্ট অৱসৰৰ বাবে স্মৰণীয় হৈ থাকিব। জুলাই মাহত ইংলেণ্ড ভ্ৰমণৰ বাবে দল নিৰ্বাচনৰ পূৰ্বেই দুজনে তেওঁলোকৰ টেষ্ট কেৰিয়াৰ সমাপ্ত কৰাৰ শোকাৱহ সিদ্ধান্ত লয়। অষ্ট্ৰেলিয়া আৰু নিউজিলেণ্ডৰ বিৰুদ্ধে ঘৰুৱা শৃংখলাত তেওঁলোকৰ ফৰ্ম হেৰুওৱাটোৱে সম্ভৱতঃ এই অৱসৰৰ ক্ষেত্ৰত বৰঙণি আগবঢ়াইছিল। তথাপিও, অনুৰাগীসকলৰ বাবে এই দুই খেলুৱৈৰ অবিহনে টেষ্ট ক্রিকেটৰ কল্পনা কৰাটো কঠিন আছিল।
ICCৰ অধ্যক্ষ জয় শ্বাহে ভাৰতৰ অধিনায়ক ৰোহিত শৰ্মাক চেম্পিয়নছ ট্ৰফী প্ৰদান কৰাৰ মুহূৰ্তত
টেষ্ট ক্ৰিকেটত বদনাম
এবাৰ বিশ্ব টেষ্ট চেম্পিয়নশ্বিপৰ ফাইনেলত প্ৰৱেশ কৰা ভাৰতীয় দলটো এতিয়া পাকিস্তানৰ পিছত ষষ্ঠ স্থানলৈ অৱনমিত হৈছে। বিগত দুটা দশকত ভাৰতে দক্ষিণ আফ্ৰিকাৰ বিৰুদ্ধে ঘৰুৱা শৃংখলাত পৰাজয় বৰণ কৰা নাছিল, কিন্তু এইবছৰ তেওঁলোকে 0-2 ৰ ব্যৱধানত অপমানজনকভাৱে পৰাস্ত হয়। নিউজিলেণ্ড আৰু দক্ষিণ আফ্ৰিকাই ভাৰততে ভাৰতক পৰাস্ত কৰাৰ সূত্ৰ বিচাৰি পোৱাটো নিশ্চিতভাৱে টেষ্ট ক্ৰিকেটৰ বাবে চিন্তাৰ কাৰণ। মহম্মদ ছিৰাজৰ যুঁজাৰু মনোভাৱৰ বাবে ইংলেণ্ডত শৃংখলাখন ২-২ ৰ ব্যৱধানত সমাপ্ত হয়। অন্যথা, ভাৰতে তাতো পৰাজয়ৰ সন্মুখীন হ'লহেঁতেন।
প্ৰথমবাৰৰ বাবে বিশ্বকাপৰ খিতাপ দখল কৰে ভাৰতীয় মহিলা ক্ৰিকেট দলে
মহিলাৰ বিশ্ব বিজয়
২০২৫ বৰ্ষটো ভাৰতীয় মহিলা ক্ৰিকেটৰ বাবে এক মাইলৰ খুঁটি হিচাপে পৰিগণিত হ'ব। বিজয়ৰ দুৱাৰমুখৰ পৰা প্ৰায়ে খালী হাতে ঘূৰি অহা মহিলা দলটোৱে এইবাৰ প্ৰথমবাৰৰ বাবে বিশ্বকাপৰ খিতাপ দখল কৰি ইতিহাস ৰচনা কৰে। এই যাত্ৰা সহজ নাছিল। যেতিয়া অপেনাৰ প্ৰতিকা ৰাৱাল আঘাতপ্ৰাপ্ত হয়, চফালী ভৰ্মাই এক অপ্ৰত্যাশিত সুযোগ লাভ কৰে আৰু ফাইনেলত এক বিস্ফোৰক ইনিংছৰ জৰিয়তে সোণৰ পদক অৰ্জন কৰে। অভিজ্ঞতাৰ সত্ত্বেও, জেমিমা ৰড্ৰিগছে এখন খেলৰ পৰা বাদ পৰাৰ পিছত শক্তিশালী অষ্ট্ৰেলিয়াৰ বিৰুদ্ধে বাঘিনীৰ দৰে যুঁজিছিল। এই সকলোবোৰ কাকতালীয় ঘটনা নহয়, বৰং কঠোৰ পৰিশ্ৰমৰ ফল। ২০২৫ চনত মহিলা দলটোৰ এই উত্থান সোণালী আখৰেৰে লিখা হ'ব। এতিয়া দলটোৱে প্ৰতিদ্বন্দ্বীৰ বিপৰীতে নিজৰ লগতে প্ৰত্যাহ্বানৰ সন্মূখীন হ'ব, কাৰণ এতিয়াৰ পৰা তেওঁলোকে 'বিশ্ব চেম্পিয়ন' হিচাপে খেলপথাৰত অৱতীৰ্ণ হ'ব।
মুঠতে ২০২৫ বৰ্ষই ভাৰতীয় ক্ৰিকেটক বহুত দিলে আৰু কিছু গুৰুত্বপূৰ্ণ কথাও শিকাই থৈ গ'ল। হোৱাইট বল ক্ৰিকেটত ভাৰতৰ আধিপত্য অক্ষুণ্ণ থকাৰ বিপৰীতে টেষ্ট ক্ৰিকেটৰ পতনক গুৰুত্ব সহকাৰে লোৱাৰ প্ৰয়োজন আছে। মহিলাৰ ক্ৰিকেটে এক নতুন দিগন্ত লাভ কৰাৰ বিপৰীতে পুৰুষৰ ক্ৰিকেটৰ ক্ষেত্ৰতো এক নতুন যুগৰ সূচনা হৈছে। দলটোৱে এতিয়া নতুন বছৰত ইংলেণ্ডত অনুষ্ঠিত হ'বলগীয়া টি-২০ বিশ্বকাপত নিজৰ আধিপত্য প্ৰমাণ কৰাৰ বৃহৎ প্ৰত্যাহ্বানৰ সন্মুখীন হ'ব।
