তামিলনাডু
‘দিটৱা’ ঘূৰ্ণীবতাহ পূব উপকূলৰ দিশে গতি কৰাৰ লগে লগে তামিলনাডু আৰু পুডুচেৰীৰ কেইবাখনো জিলাত প্ৰবল বৰষুণৰ সম্ভাৱনা আছে। ঘূৰ্ণীবতাহ স্থলপথত প্ৰৱেশ কৰাৰ সম্ভাৱনা নাই যদিও আগন্তুক কেইঘণ্টামানৰ ভিতৰত ই মৃদুভাৱে তামিলনাডু-পুডুচেৰী উপকূলৰ সমান্তৰালভাৱে উত্তৰ দিশলৈ গতি কৰাৰ সম্ভাৱনা আছে।
ভাৰতীয় বতৰ বিজ্ঞান বিভাগ (IMD)-এ জনোৱা মতে, দক্ষিণ উপকূলীয় অন্ধ্ৰ প্ৰদেশ আৰু ৰায়লাচীমা জিলাৰ কিছুমান ঠাইত প্ৰচণ্ড বৰষুণ হোৱাৰ সম্ভাৱনা আছে। তামিলনাডু, পুডুচেৰী আৰু অন্ধ্ৰ প্ৰদেশত ইতিমধ্যে ৰেড এলাৰ্ট জাৰি কৰা হৈছে।
এই ঘূৰ্ণীবতাহৰ কেন্দ্ৰস্থল তামিলনাডুৰ উপকূলৰ পৰা প্ৰায় ৫০ কিলোমিটাৰ দূৰত্বত দক্ষিণ-পশ্চিম বংগোপসাগৰৰ উপকূল। অৱশ্যে বতাহৰ গতিবেগ পুৱা ৯০ কিলোমিটাৰৰ পৰা সন্ধিয়া ৫৫-৬৫ কিলোমিটাৰৰ ভিতৰত হ্ৰাস পাব বুলি কোৱা হৈছে।
পুডুচেৰী আৰু কাৰাইকালৰ উপৰি তামিলনাডুৰ কুডালোৰ, নগাপট্টিনাম, মায়িলদুথুৰাই, ভিল্লুপুৰাম আৰু চেংগালপট্টু জিলাৰ কিছু স্থানত অতিমাত্ৰা বৰষুণ হোৱাৰ সম্ভাৱনা আছে।
