গুৱাহাটী
অসমত বান পৰিস্থিতিৰ অধিক অৱনতি ঘটিছে। মঙলবাৰে প্ৰকাশিত এক চৰকাৰী বুলেটিন অনুসৰি, বানত মৃতৰ সংখ্যা ৩ জন হৈছে আৰু ক্ষতিগ্ৰস্ত লোকৰ সংখ্যা প্ৰায় চাৰিগুণ বৃদ্ধি পাই ৩৭ হাজাৰতকৈ অধিক হৈছে।
অসম ৰাজ্যিক দুৰ্যোগ ব্যৱস্থাপনা প্ৰাধিকৰণ (এএছডিএমএ)-এ জনোৱা মতে, বিগত ২৪ ঘণ্টাত শোণিতপুৰ জিলাৰ নদুৱাৰ ৰাজহ চক্ৰত বানজনিত আন এক মৃত্যুৰ ঘটনা সংঘটিত হৈছে।
বুলেটিন অনুসৰি, বানপানীয়ে শোণিতপুৰ, ডিব্ৰুগড়, লখিমপুৰ, ধেমাজি, যোৰহাট আৰু শিৱসাগৰ — এই ছয়খন জিলাৰ ১২টা ৰাজহ চক্ৰ আৰু ৯৯খন গাঁও প্লাৱিত কৰিছে।
মুঠ ৩৭,০৩২ জন লোক বানৰ ফলত ক্ষতিগ্ৰস্ত হৈছে। ইয়াৰ ভিতৰত লখিমপুৰ জিলা সৰ্বাধিক ক্ষতিগ্ৰস্ত, য'ত ৩৫,৬৯৬ জন লোক বানৰ কৱলত পৰিছে।
উল্লেখযোগ্য যে, সোমবাৰে এই ছয়খন জিলাত বানৰ ফলত ৯,৬০০ জনতকৈ অধিক লোক ক্ষতিগ্ৰস্ত হৈছিল।
এএছডিএমএ-এ জনোৱা মতে, ক্ষতিগ্ৰস্ত লোকসকলক ২০টা বিতৰণ কেন্দ্ৰৰ জৰিয়তে সাহায্য সামগ্ৰী যোগান ধৰা হৈছে।
ইফালে, ৰাজ্যিক দুৰ্যোগ সঁহাৰি বাহিনী (এছডিআৰএফ)-এ বিগত ২৪ ঘণ্টাত শোণিতপুৰ জিলাৰ পৰা ১৬ জন লোকক উদ্ধাৰ কৰিবলৈ সক্ষম হৈছে।
বুলেটিনত কোৱা হৈছে যে, বানপানীয়ে ১,১০৩.৯৪ হেক্টৰ কৃষিভূমি প্লাৱিত কৰিছে। লগতে দুটা পশু উটি যোৱাৰ বিপৰীতে হাঁহ-কুকুৰাকে ধৰি মুঠ ১৬,১৩৯টা পশু-পক্ষী বানৰ ফলত ক্ষতিগ্ৰস্ত হৈছে।
ইয়াৰ উপৰিও, বানাক্ৰান্ত কেইবাখনো জিলাত পথ-ঘাট আৰু অন্যান্য আন্তঃগাঁথনিৰ ক্ষয়-ক্ষতিৰ খবৰো পোৱা গৈছে।
