অম্বুবাচী মেলাত প্ৰাণৰ শিল্পী জুবিন গাৰ্গৰ গুণানুকীৰ্তনঃ সাধু-সন্ন্যাসীৰ মুখতো শুনা গ’ল "ইয়া আলী"
আৱাজ - দ্য ভইচ ব্যুৰ’ / গুৱাহাটী
গুৱাহাটীৰ নীলাচল পাহাৰৰ বুকুত অৱস্থিত শক্তিপীঠ কামাখ্যা ধামত এতিয়া অম্বুবাচী মেলাৰ গাম্ভীৰ্যপূৰ্ণ তথা উখল-মাখল পৰিৱেশ। দেশৰ চুকে-কোণে থকা লাখ লাখ ভক্ত, সাধু-সন্ন্যাসী আৰু তীৰ্থযাত্ৰীৰ সমাগমেৰে মুখৰিত হৈ পৰিছে সমগ্ৰ চৌপাশ। কিন্তু এই গভীৰ আধ্যাত্মিক পৰিৱেশৰ মাজতো আচৰিতভাৱে অনুৰণিত হৈছে অসমৰ প্ৰাণৰ শিল্পী, সকলোৰে মৰমৰ জুবিন গাৰ্গৰ নাম।
২০২৬ চনৰ এই বৰ্ষৰ অম্বুবাচী মেলালৈ অহা দেশৰ ভিন্ন প্ৰান্তৰ সাধু-বাবাসকলৰ মুখত অসমৰ এইগৰাকী জনপ্ৰিয় শিল্পীৰ অপৰিসীম প্ৰশংসা শুনা গৈছে, যিয়ে প্ৰমাণ কৰিছে যে শিল্পীগৰাকীৰ প্ৰভাৱ কেৱল ভৌগোলিক সীমাৱদ্ধতাতেই আবদ্ধ নহয়, মানুহৰ আত্মাৰ সৈতেও গভীৰভাৱে সংযুক্ত।
শক্তিপীঠ কামাখ্যা ধাম
অম্বুবাচীলৈ অহা এই সাধু-সন্ন্যাসীসকলে জুবিন গাৰ্গক কেৱল এজন কণ্ঠশিল্পী হিচাপেই নহয়, বৰং এজন "অসাধাৰণ ভাল মানুহ" আৰু প্ৰকৃত অৰ্থত প্ৰাণৰ শিল্পী হিচাপে অভিহিত কৰিছে। কামাখ্যা ধাম দৰ্শন কৰিবলৈ অহা বহু সাধুৱে আৱেগিক হৈ মন্তব্য কৰিছে যে জুবিন গাৰ্গ প্ৰতিগৰাকী মানুহৰ হৃদয়ত চিৰদিনৰ বাবে বিৰাজমান হৈ থকা এজন মহান শিল্পী। এই সন্দৰ্ভত এগৰাকী সাধুৱে আৱেগিক হৈ কয়, ‘‘জুবিনৰ দৰে এজন ভাল মানুহে এই পৃথিৱীত হয়তো আৰু কেতিয়াও জন্মলাভ নকৰিব। জুবিন সদায় জুবিনেই আছিল, তেওঁৰ কোনো তুলনা নাই। তেওঁ যেন ভগৱানৰেই এটা প্ৰতিৰূপ আছিল, আৰু এতিয়া তেওঁ সেই পৰমপিতা ঈশ্বৰৰ ওচৰতেই আশ্ৰয় লৈছে।’’
কামাখ্যা ধামৰ চৌহদত আন এগৰাকী বাবাই শিল্পীগৰাকীৰ গুণানুকীৰ্তন কৰি সমাজলৈ এক গভীৰ বাৰ্তা প্ৰেৰণ কৰে। তেওঁৰ মতে, যদি কোনোবাই সঁচাকৈয়ে এজন প্ৰকৃত শিল্পী হ’ব বিচাৰে, তেন্তে তেওঁ জুবিন গাৰ্গৰ আদৰ্শ অনুকৰণ কৰা উচিত। বাবাগৰাকীয়ে কয়, ‘‘জুবিন গাৰ্গ প্ৰতিখন হৃদয়ৰ স্পন্দন, নৱপ্ৰজন্মৰ প্ৰেৰণা আৰু সমগ্ৰ অসমৰ প্ৰাণ স্বৰূপ। এজন শিল্পী হ’বলৈ হ’লে অন্তৰত কি কি মানৱীয় গুণৰ প্ৰয়োজন, সেয়া জুবিন গাৰ্গৰ জীৱনৰ পৰাই শিকা উচিত। তেওঁ জীৱনত যিমান উপাৰ্জন কৰিছিল, সেয়া কেতিয়াও নিজৰ স্বাৰ্থত সাঁচি ৰখা নাছিল; বৰং দুখীয়া-নিছলা মানুহৰ মাজত বিলাই দিছিল। দয়ালু আৰু নিঃস্বাৰ্থ মনৰ এই গুণটোৱেই তেওঁক ভগৱানৰ অংশ হিচাপে প্ৰতিষ্ঠা কৰিছে। জুবিন গাৰ্গ সকলোৰে হৃদয়ত আছিল আৰু চিৰকাললৈ থাকিব।’’ এইদৰে স্মৃতিচাৰণ কৰাৰ সময়তে বাবাগৰাকীয়ে জুবিন গাৰ্গৰ বিশ্ববিখ্যাত তথা জনপ্ৰিয় গীত ‘ইয়া আলী’ গুণগুণাই গাই উপস্থিত সকলোকে আপ্লুত কৰে।
শক্তিপীঠ কামাখ্যা ধাম
সাধুসকলৰ এনে স্বতঃস্ফূৰ্ত মন্তব্যই এই কথা পুনৰবাৰ প্ৰমাণ কৰিছে যে জুবিন গাৰ্গৰ জনপ্ৰিয়তা আৰু গ্ৰহণযোগ্যতা কেৱল অসমৰ সাধাৰণ ৰাইজৰ মাজতেই সীমাবদ্ধ নহয়, বাহিৰৰ পৰা অহা ধৰ্মীয় পৰ্যটক তথা সন্ন্যাসীসকলৰ মাজতো সমানেই বিয়পি পৰিছে। ইয়াৰ সমান্তৰালকৈ, অম্বুবাচী মেলাৰ সময়ছোৱাত গুৱাহাটীৰ ভূতনাথ শিৱ মন্দিৰ প্ৰাংগণত 'ভূতনাথ সেনা সমিতি ট্ৰাষ্ট' আৰু 'বীৰ লাচিত সেনা'ৰ উদ্যোগত প্ৰাণৰ শিল্পীগৰাকীৰ প্ৰতি এক বিশেষ আৰু মৰ্মস্পৰ্শী শ্ৰদ্ধাঞ্জলি অনুষ্ঠানৰো আয়োজন কৰা হয়। আনহাতে, প্ৰশাসনীয় আৰু পৰিচালনাগত কাৰণত অম্বুবাচী মেলাৰ প্ৰতি লক্ষ্য ৰাখি যোৱা ২২ জুনৰ পৰা ২৬ জুনৰ পুৱালৈকে জুবিন গাৰ্গৰ স্মৃতিত নিৰ্মিত স্মাৰক 'জুবিনক্ষেত্ৰ' দৰ্শনাৰ্থীৰ বাবে সম্পূৰ্ণৰূপে বন্ধ ৰখাৰ সিদ্ধান্ত গ্ৰহণ কৰা হৈছে।
সামগ্ৰিকভাৱে, ২০২৬ চনৰ অম্বুবাচী মেলাৰ এই বিশেষ ঘটনাক্ৰম আৰু সাধু-সন্ন্যাসীসকলৰ প্ৰতিক্ৰিয়াই অসমৰ সামাজিক তথা সাংস্কৃতিক জগতত জুবিন গাৰ্গৰ অপৰিসীম আৰু চিৰস্থায়ী প্ৰভাৱকে প্ৰতিফলিত কৰিছে। এজন শিল্পীয়ে নিজৰ কৰ্ম আৰু মানৱীয়তাৰে কেনেদৰে মানুহৰ মনত ঈশ্বৰতুল্য আসন লাভ কৰিব পাৰে, জুবিন গাৰ্গ তাৰ এক বিৰল আৰু অম্লান নিদৰ্শন হৈ ৰ’ব। তেওঁৰ সৃষ্টি আৰু মানৱ দৰদী সত্তাই যুগ যুগ ধৰি প্ৰতিগৰাকী অসমীয়াৰ লগতে অগণন গুণমুগ্ধৰ হৃদয়ত এক সুউচ্চ স্থান অধিকাৰ কৰি থাকিব।
.webp "অম্বুবাচী মেলাত প্ৰাণৰ শিল্পী জুবিন গাৰ্গৰ গুণানুকীৰ্তনঃ সাধু-সন্ন্যাসীৰ মুখতো শুনা গ’ল")
.webp)
