গুৱাহাটী
নেৰানেপেৰা ধাৰাসাৰ বৰষুণে সোমবাৰে পুৱাৰে পৰা গুৱাহাটীৰ বিস্তীৰ্ণ অঞ্চল জলমগ্ন কৰি তোলাত স্বাভাৱিক জনজীৱন ব্যাহত হৈ পৰিছে। একে সময়তে ৰাজ্যজুৰি বান পৰিস্থিতিও অধিক অৱনতি ঘটিছে। অসম ৰাজ্যিক দুৰ্যোগ ব্যৱস্থাপনা প্ৰাধিকৰণ (ASDMA)ৰ তথ্য অনুসৰি, বৰ্তমান ১২খন জিলাৰ ১,৭০,৩২৭ জন লোক বানৰ কবলত পৰিছে।
গুৱাহাটীত হোৱা নগৰীয়া বানৰ ফলত জুৰোড তিনিআলি, সোনকুছি, বেহাৰবাৰী, পাঞ্জাবাৰী, হাতীগাঁও, সিজুবাৰী, ঘোৰামৰা, ৰুক্মিণীগাঁও, বৰমটৰীয়া, বেলতলা তিনিআলি, অনিল নগৰ, নবীন নগৰ, তৰুণ নগৰ, চান্দমাৰী, মালিগাঁও, লখৰা-ওদালবাক্ৰা পথ আৰু জটীয়া-কাহিলীপাৰাকে ধৰি একাধিক অঞ্চলত পথ আৰু আৱাসিক এলেকা পানীত বুৰ গৈছে।
জলাবদ্ধতাৰ সমস্যা দূৰ কৰিবলৈ অনিল নগৰ, ৰুক্মিণীগাঁও, ৰাজগড় ৰোড আৰু লাচিত নগৰত ডিৱাটাৰিং পাম্প (Dewatering Pump) স্থাপন কৰি সঞ্চিত বৰষুণৰ পানী নিষ্কাশনৰ কাম আৰম্ভ কৰিছে প্ৰশাসনে।
ইফালে, ৰাজ্যজুৰি বান পৰিস্থিতি অধিক জটিল হৈ পৰিছে। বিশ্বনাথ, কাছাৰ, চৰাইদেউ, ধেমাজি, ডিব্ৰুগড়, গোলাঘাট, যোৰহাট, কাৰ্বি আংলং, লখিমপুৰ, শিৱসাগৰ, তিনিচুকীয়া আৰু ওদালগুৰি এই ১২খন জিলাৰ ৩০টা ৰাজহ চক্ৰৰ অন্তৰ্গত ৫৮০খন গাঁও বানপানীত ক্ষতিগ্ৰস্ত হৈছে।
অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ তথ্য অনুসৰি, বানপানীত ১০,৩৬২.৯ হেক্টৰ কৃষিভূমি এতিয়াও প্লাৱিত হৈ আছে। অৱশ্যে, সোমবাৰে পুৱা প্ৰকাশ কৰা শেহতীয়া বুলেটিন অনুসৰি, নতুনকৈ কোনো বান-সংক্ৰান্ত মৃত্যুৰ ঘটনা পঞ্জীয়ন হোৱা নাই।
ক্ষতিগ্ৰস্ত জিলাসমূহত উদ্ধাৰ অভিযান অধিক জোৰদাৰ কৰা হৈছে। ৰাষ্ট্ৰীয় দুৰ্যোগ সঁহাৰি বাহিনী (NDRF)ৰ ১২ সংখ্যক বেটেলিয়নৰ ৬টা দল, য'ত ১৮৬ জন জোৱান আৰু ২৪খন নাও আছে, সেই দলসমূহক শিৱসাগৰ আৰু চৰাইদেউ জিলাত নিয়োজিত কৰা হৈছে।
আনহাতে, ১ সংখ্যক বেটেলিয়নৰ ২টা ৰাষ্ট্ৰীয় দুৰ্যোগ সঁহাৰি বাহিনীৰ দল, য'ত ৬০ জন জোৱান আৰু ১০খন নাও আছে, তেওঁলোকে যোৰহাট জিলাত উদ্ধাৰ অভিযান চলাই আছে। ইয়াৰ উপৰিও ৰাজ্যিক দুৰ্যোগ সঁহাৰি বাহিনী (SDRF)ৰ একাধিক দলকো চৰাইদেউ, শিৱসাগৰ, যোৰহাট আৰু গোলাঘাট জিলাত উদ্ধাৰ আৰু সাহায্য কাৰ্যত নিয়োজিত কৰা হৈছে।
কেন্দ্ৰীয় জল আয়োগ (CWC)ৰ তথ্য অনুসৰি, সোমবাৰে পুৱা ব্ৰহ্মপুত্ৰ (নিমাতীঘাট), বুঢ়ীদিহিং (খোৱাং), ডিখৌ (শিৱসাগৰ), দিচাং (নাংলামুৰাঘাট) আৰু ধনশিৰি (নুমলীগড়)—এই পাঁচখন মুখ্য নদী বিপদসীমাৰ ওপৰেৰে বৈ আছে। আগন্তুক দিনসমূহতো বৰষুণ অব্যাহত থাকিলে বান পৰিস্থিতি আৰু অধিক জটিল হোৱাৰ আশংকা প্ৰকাশ কৰিছে বিশেষজ্ঞসকলে।
অসম ৰাজ্যিক দুৰ্যোগ ব্যৱস্থাপনা প্ৰাধিকৰণে জনাইছে যে, ৰাজ্যজুৰি বান পৰিস্থিতিৰ ওপৰত কটকটীয়াভাৱে নজৰ ৰখা হৈছে। ক্ষতিগ্ৰস্ত অঞ্চলসমূহত উদ্ধাৰ, সাহায্য আৰু পুনৰ সংস্থাপন কাৰ্য অব্যাহত থকাৰ লগতে প্ৰশাসনে পৰিস্থিতি অনুসৰি প্ৰয়োজনীয় ব্যৱস্থা গ্ৰহণ কৰি আছে।
