বাংলাদেশত সংখ্যালঘুৰ ওপৰত হোৱা হিংসা মানৱতাৰ বিৰুদ্ধে এক অপৰাধঃ মুছলিম ৰাষ্ট্রীয় মঞ্চ
নতুন দিল্লী
মুছলিম ৰাষ্ট্রীয় মঞ্চ (MRM)-ই বাংলাদেশত সংখ্যালঘু সম্প্রদায়ৰ ওপৰত, বিশেষকৈ হিন্দুসকলৰ ওপৰত অব্যাহত থকা হিংসা আৰু গণহত্যাক লৈ গভীৰ উদ্বেগ আৰু দুখ প্রকাশ কৰিছে। মুছলিম ৰাষ্ট্রীয় মঞ্চই স্পষ্টভাৱে উল্লেখ কৰে যে এনে ঘটনা কেৱল এখন দেশ বা এটা সম্প্ৰদায়ৰ মাজতে সীমাবদ্ধ নহয়, বৰং এনেবোৰ ঘটনাক সমগ্ৰ মানৱতাৰ বিৰুদ্ধে প্ৰত্যক্ষ অপৰাধ বুলি গণ্য কৰা হয়, যিটো কোনো যুক্তি বা পৰিস্থিতিতে ন্যায়সংগত নহয়।
এই মঞ্চই অনুভৱ কৰে যে বাংলাদেশত সংখ্যালঘু লোকৰ ওপৰত সংঘটিত হৈ থকা অত্যাচাৰক লৈ যদি ভাৰতৰ সংখ্যালঘুসকলে মৌনতা অৱলম্বন কৰে, তেন্তে সেয়া কেৱল দুৰ্ভাগ্যজনকেই নহয়, বৰঞ্চ ই এক এনেকুৱা বিষয়, যাক গভীৰভাৱে আত্মবিশ্লেষণৰো প্ৰয়োজন। এতিয়া নীৰৱতাৰ সময় নহয়, বৰং সত্যৰ পক্ষত সাহসেৰে থিয় হোৱাৰ সময়। এই মঞ্চই এটা কথা স্পষ্টকৈ কৈছে যে হিংসাৰ বিৰুদ্ধে মাত মতাটো বৰ্তমান সময়ত আটাইতকৈ জৰুৰী, যাতে মানৱতা, সমতা আৰু ন্যায়ৰ মূল্যবোধ ৰক্ষা কৰিব পৰা যায় আৰু ভৱিষ্যত প্ৰজন্মক ঘৃণাৰ উত্তৰাধিকাৰ হিচাপে এৰি থৈ যাব পৰা নাযায়।
MRMৰ ৰাষ্ট্ৰীয় আহ্বায়ক শ্বাহিদ ছায়েদে কয় যে বাংলাদেশৰ পোহৰলৈ অহা দৃশ্যসমূহ অতি ভয়ানক আৰু উদ্বেগজনক। ৰাজপথত হিংসাত্মক জনতাৰ ভিৰ, সংখ্যালঘুক লক্ষ্য কৰি লোৱা, ঘৰ আৰু ধৰ্মীয় স্থানত আক্ৰমণ কৰাটোৱে প্ৰতীয়মান কৰে যে তাত আইনক ভয় কৰাটো দ্ৰুতগতিত হ্ৰাস পাইছে। তেওঁ কয় যে কোনো সভ্য সমাজে মানুহৰ হিংসাক মানি ল'ব নোৱাৰে। এজন নিৰ্দোষী যুৱকক হত্যা কৰাটো কেৱল এজন ব্যক্তিক হত্যা কৰা নহয়, বৰঞ্চ ই আইনৰ শাসন, সংবিধান আৰু মানৱতাৰ ওপৰত প্ৰত্যক্ষ আক্ৰমণ। শ্বাহিদ ছায়েদে জোৰ দি কয় যে সংখ্যালঘুসকলৰ সুৰক্ষা প্ৰতিখন ৰাষ্ট্ৰৰ নৈতিক দায়িত্ব আৰু এই বিষয়ত আপোচ কৰিলে সমাজ অশান্তিৰ দিশে ধাবিত হয়।
MRMৰ ৰাষ্ট্ৰীয় আহ্বায়ক তথা মহিলা শাখাৰ মুৰব্বী ড০ শালিনী আলীয়ে কয় যে বাংলাদেশৰ সংখ্যালঘু মহিলা আৰু শিশুসকলে নিজকে আটাইতকৈ অসুৰক্ষিত অনুভৱ কৰিছে। ভয়ৰ পৰিৱেশত জীয়াই থকাটো যিকোনো মানুহৰ বাবে অপমানজনক। তেওঁ কয় যে ধৰ্ম বা পৰিচয়ৰ নামত ঘৃণা বিয়পোৱাটোৱে সমাজক ভিতৰৰ পৰা নিঃশেষ কৰি পেলায়। ড০ শালিনী আলীয়ে আন্তঃৰাষ্ট্ৰীয় সম্প্ৰদায়ক আহ্বান জনাই কয় যে বাংলাদেশৰ সংখ্যালঘুসকলৰ বিৰুদ্ধে চলা হিংসাক কেৱল এক আভ্যন্তৰীণ বিষয় বুলি নলৈ মানৱ অধিকাৰ উলংঘন বুলি গণ্য কৰি ইয়াক গুৰুত্বসহকাৰে ল'ব লাগে।
এক কাৰ্যসূচীত মুছলিম ৰাষ্ট্রীয় মঞ্চৰ বিষয়ববীয়াসকল
MRMৰ ৰাষ্ট্ৰীয় আহ্বায়ক তথা ৰাষ্ট্ৰীয় সংখ্যালঘু শিক্ষা প্ৰতিষ্ঠান আয়োগৰ কাৰ্যকৰী অধ্যক্ষ শ্বাহিদ আখতাৰে কয় যে কোনো এটা জাতিৰ আচল পৰীক্ষা নিহিত হৈ থাকে জাতিটোৱে সংখ্যালঘুসকলৰ প্ৰতি কেনে আচৰণ কৰে, তাত। তেওঁ কয় যে বাংলাদেশত যি ঘটি আছে সেয়া শিক্ষা, সহাৱস্থান আৰু গণতান্ত্ৰিক মূল্যবোধৰ বাবে অতিশয় বিপজ্জনক সংকেত। যদি সময়মতে কঠোৰ পদক্ষেপ গ্ৰহণ কৰা নহয়, এই হিংসাই ভৱিষ্যৎ প্ৰজন্মৰ ওপৰত আৰু অধিক গভীৰ প্ৰভাৱ পেলাব।
মুছলিম ৰাষ্ট্ৰীয় মঞ্চই আৰু কয় যে বাংলাদেশত ক্ৰমবৰ্ধমান ৰাজনৈতিক অস্থিৰতাৰ পৰিৱেশটোও শেহতীয়া পৰিঘটনাৰ আঁৰৰ এটা ডাঙৰ কাৰক। যুৱ ছাত্ৰ নেতা শ্বৰীফ উছমান হাদিৰ মৃত্যুৰ পিছত যিধৰণে হিংসাত্মক ঘটনা বৃদ্ধি পাইছে, তাৰ ফলত পৰিস্থিতি অধিক অৱনতি ঘটিছে। ঢাকা আৰু চট্টগ্ৰামৰ দৰে চহৰত সংবাদ মাধ্যমৰ ওপৰত হোৱা আক্ৰমণ, ভাৰতীয় প্ৰতিষ্ঠানসমূহক টাৰ্গেট কৰা আৰু সংখ্যালঘুসকলৰ ওপৰত হোৱা আক্ৰমণৰ ঘটনাবোৰে জনসাধাৰণৰ ক্ষোভ এতিয়া অন্ধ হিংসাত পৰিণত কৰিছে। এই হিংসাৰ সহজ ভুক্তভোগী হ'ল সংখ্যালঘু সম্প্ৰদায়, যিসকলে ইতিমধ্যে নিৰাপত্তাহীনতাত জীৱন নিৰ্বাহ কৰি আহিছিল।
মঞ্চই লগতে কয় যে অন্তৱৰ্তীকালীন চৰকাৰৰ দ্বাৰা সেনা মোতায়েন কৰা আৰু শান্তিৰ বাবে আবেদন কৰাটো প্ৰয়োজনীয় পদক্ষেপ, কিন্তু কেৱল আবেদন কৰিলে পৰিস্থিতিৰ উন্নতি নহয়। ভূমিৰ ওপৰত সংখ্যালঘুসকলৰ নিৰাপত্তা সুনিশ্চিত কৰা, দোষীসকলৰ বিৰুদ্ধে কঠোৰ ব্যৱস্থা গ্ৰহণ কৰা আৰু ঘৃণা বিয়পোৱাসকলক নিয়ন্ত্ৰণ কৰাটো আটাইতকৈ জৰুৰী। আগন্তুক নিৰ্বাচনৰ প্ৰতি লক্ষ্য ৰাখি, যদি হিংসা আৰু ভাৰত বিৰোধী আৱেগক ৰাজনৈতিক হাথিয়াৰ হিচাপে ব্যৱহাৰ কৰা হয়, তেন্তে সৰ্বশ্ৰেষ্ঠ ক্ষতি সাধাৰণ নাগৰিক আৰু সংখ্যালঘু সম্প্ৰদায়ৰ লোকসকলে ভুগিব লাগিব।
মুছলিম ৰাষ্ট্রীয় মঞ্চই প্রতিবেশী দেশ হিচাপে বাংলাদেশৰ সংখ্যালঘুসকলৰ সুৰক্ষাৰ বিষয়টো এক দৃঢ়তাৰে উত্থাপন কৰিবলৈ ভাৰত চৰকাৰক আহবান জনাইছে। এয়া কেৱল এক কূটনৈতিক বিষয় নহয়, বৰং মানৱীয় দায়বদ্ধতাৰ প্ৰশ্নও। এই মঞ্চই কয় যে দক্ষিণ এছিয়াত স্থায়ী শান্তি আৰু স্থিৰতা তেতিয়াহে সম্ভৱ হ’ব, যেতিয়া প্ৰতিখন দেশে নিশ্চিত কৰিব পাৰে যে নিজৰ সীমাৰ ভিতৰত বসবাস কৰা সংখ্যালঘুসকলক ভয় আৰু বৈষম্যহীনভাৱে জীয়াই থাকিব পাৰে।
