নতুন দিল্লী
ফেচবুকৰ পৰা ডিলিট হ’ল প্ৰায় ১ কোটি একাউণ্ট। ফেচবুক আৰু ইউটিউবৰ দৰে বৃহৎ প্লেটফৰ্মে কঠোৰ কণ্টেণ্ট নীতি বলবৎ কৰাৰ প্ৰচেষ্টা বৃদ্ধি কৰাৰ লগে লগে ডিজিটেল কণ্টেণ্ট ক্ৰিয়েটৰসকলে এতিয়া বাধাৰ সন্মুখীন হৈছে।
বিশেষকৈ ভিডিঅ’ কণ্টেণ্ট ক্ৰিয়েটৰৰ জৰিয়তে বিশ্বজুৰি লাখ-লাখ লোকে এই প্লেটফৰ্মসমূহৰ ওপৰত নিৰ্ভৰশীল হোৱাৰ লগে লগে মেটাৰ নতুন নীতিয়ে মূল কণ্টেণ্ট আপলোড কৰিব নোৱৰা ব্যৱহাৰকাৰীসকলক লক্ষ্য কৰি লৈছে, যিটো পদক্ষেপে বহু ক্ৰিয়েটৰৰ উপাৰ্জনত যথেষ্ট প্ৰভাৱ পেলাব পাৰে।
কণ্টেণ্ট কপি আৰু পেষ্ট কৰা একাউণ্টৰ বিৰুদ্ধে কঠোৰ ব্যৱস্থা গ্ৰহণৰ কথা ঘোষণা কৰিছে ‘মেটা’ই। মেটাৰ শেহতীয়া ঘোষণাই কণ্টেণ্ট চুৰিৰ বিৰুদ্ধে যুঁজ দিয়াৰ প্ৰতিশ্ৰুতিৰ ওপৰত গুৰুত্ব আৰোপ কৰিছে। যিসকল ব্যৱহাৰকাৰীয়ে অন্য ক্ৰিয়েটৰৰ পৰা লিখা, ফটো বা ভিডিঅ’সমূহ ধাৰাবাহিকভাৱে কপি কৰে, তেওঁলোকৰ একাউণ্টসমূহ বন্ধ আৰু মনেটাইজেশ্যন বন্ধ হোৱাৰ আশংকা থাকে।
এই পোষ্টসমূহৰ ৰিচ্ আৰু ডিচট্ৰিবিউশ্যনো যথেষ্ট হ্ৰাস পাব। এই ব্যৱস্থাসমূহৰ সৈতে সংগতি ৰাখি মেটাই ইতিমধ্যে প্ৰায় ১ কোটি প্ৰফাইল আঁতৰাই পেলাইছে যিবোৰ প্ৰতিষ্ঠিত কণ্টেণ্ট ক্ৰিয়েটৰৰ পোষ্ট কপি কৰা দেখা গৈছিল।
স্পেমৰ সৈতে জড়িত ৫ লাখ একাউণ্টো বন্ধ কৰি দিছে মেটাই। মৌলিক বিষয়বস্তুৰ অভাৱ সত্ত্বেও ধন উপাৰ্জন কৰা ভুৱা পোষ্ট চিনাক্তকৰণৰ বাবে কাম কৰি আছে কোম্পানীটোৱে।
ব্যৱহাৰকাৰীসকলক স্বতন্ত্ৰ কণ্টেণ্ট ‘ক্ৰিয়েট’ নকৰাকৈ লাভৱান হোৱাৰ পৰা বিৰত ৰাখিবলৈ মেটাই কপি-পেষ্টিঙত জড়িতসকলৰ মন্তব্যৰ দৃশ্যমানতাও হ্ৰাস কৰিছে। এই পদ্ধতিৰ লক্ষ্য হৈছে তেওঁলোকৰ মনেটাইজেশ্যনৰ সুযোগ ৰোধ কৰা। এই কাৰ্যসমূহে ইউটিউবৰ শেহতীয়া পদক্ষেপসমূহ প্ৰতিফলিত কৰে, যিয়ে নিজৰ প্লেটফৰ্মৰ পৰা পুনৰাবৃত্তিমূলক আৰু এআই-জেনেৰেটেড ভিডিঅ’ আঁতৰাবলৈ আৰম্ভ কৰিছে।
অৱশ্যে মেটাই ইউটিউবৰ দৰেই ৰেহাই দিছে। যিসকল ব্যৱহাৰকাৰীয়ে আন কাৰোবাৰ কামৰ সৈতে জড়িত হৈ প্ৰতিক্ৰিয়া ভিডিঅ’ বা কণ্টেণ্ট প্ৰস্তুত কৰে, তেওঁলোকে ইয়াৰ প্ৰতিক্ৰিয়াৰ সন্মুখীন নহ’ব। একেদৰে ট্ৰেণ্ডত অংশগ্ৰহণ কৰা বা বৰ্তমানৰ বিষয়বস্তুৰ ওপৰত নিজৰ মতামত প্ৰকাশ কৰাসকলকো ৰেহাই দিয়া হ’ব।
মেটাই সেইসকলৰ বিৰুদ্ধে ব্যৱস্থা গ্ৰহণ কৰিছে আৰু কৰিব, যিসকলে কন্টেন্ট চুৰি কৰে আৰু ইয়াক নিজৰ বুলি দাবী কৰে। মেটাই এই পদক্ষেপ এইকাৰণে গ্ৰহণ কৰিছে যাতে তেওঁলোকে আৰু কোনোধৰণৰ আৰ্থিক সুবিধা লাভ নকৰটো নিশ্চিত কৰে। কোম্পানীটোৱে ডুপ্লিকেট ভিডিঅ’সমূহক মূল বিষয়বস্তুৰ সৈতে সংযোগ কৰি, দৰ্শকক উৎসলৈ নিৰ্দেশিত কৰি মূল ক্ৰিয়েটৰসকলক সঠিক ‘ক্ৰেডিট’ দিবলৈ এটা ব্যৱস্থাও পৰীক্ষা কৰি আছে।
