ঐতিহাসিক বুৰ্জ খলিফাৰ ডেভেলপাৰ ইমাৰ প্ৰপাৰ্টিজৰ প্ৰতিষ্ঠাপক আৰু পৰিচালন সঞ্চালক মহম্মদ আলাব্বৰ
আবুধাবি
ইউ এ ইত বসবাস কৰা কোটি কোটি ভাৰতীয় প্ৰবাসীৰ বাবে এক গৌৰৱৰ মুহূৰ্ত হিচাপে বিবেচিত হৈছে মহম্মদ আলাব্বৰৰ মন্তব্য। তেওঁ সৰহসংখ্যক ভাৰতীয় উপস্থিতি থকা এখন চহৰ আবু ধাবিত অনুষ্ঠিত হোৱা 'মেক ইন দ্য এমিৰেটছ সন্মিলন'ত ভাষণ প্ৰদান কৰি কয় যে, ভাৰতীয় কৰ্মসংস্কৃতি হৈছে সফলতাৰ মূল শক্তি।
ঐতিহাসিক বুৰ্জ খলিফাৰ ডেভেলপাৰ ইমাৰ প্ৰপাৰ্টিজৰ প্ৰতিষ্ঠাপক আৰু পৰিচালন সঞ্চালক আলাব্বৰে কয় যে, তেওঁ ভাৰতীয়সকলক তেওঁলোকৰ কৰ্মসংস্কৃতিৰ বাবেই নিযুক্তি দিবলৈ ভাল পায়। তেওঁ কঠোৰ পৰিশ্ৰম, অনুশাসন আৰু ব্যৱসায়িক সংস্কৃতিৰ গুৰুত্বৰ বিষয়ে উল্লেখ কৰি এই মন্তব্য আগবঢ়ায়। যিয়ে কোম্পানীসমূহক বাৰে বাৰে সংকটৰ পৰা ৰক্ষা কৰিবলৈ সহায় কৰে।
সংযুক্ত আৰব এমিৰেটছৰ সংবাদ মাধ্যমৰ প্ৰতিবেদন অনুসৰি আলাব্বৰে কয় যে, কঠিন আৰু পৰিৱৰ্তনশীল সময়ছোৱাত বৃদ্ধি পাব বিচৰা কোম্পানীসমূহক নিজৰ কঠোৰ পৰিশ্ৰম অব্যাহত ৰখা, নিয়মীয়াকৈ তেওঁলোকৰ কাম পৰ্যবেক্ষণ কৰা আৰু পৰিস্থিতি সলনি হ'লে বিপদৰ প্ৰতি সজাগ হৈ থকা দলসমূহৰ প্ৰয়োজন।
আলাব্বৰে কয়, "মোৰ নিজৰ দৃষ্টিকোণৰ পৰা মই সদায় মানুহক কওঁ, মোৰ বুদ্ধিমত্তা হৈছে সাধাৰন, কিন্তু মোৰ কঠোৰ পৰিশ্ৰম সৰ্বোত্তম। কিয়নো মই কঠোৰ পৰিশ্ৰমত বিশ্বাস কৰোঁ।"
তেওঁ কয় যে, কঠোৰ পৰিশ্ৰম মানে কেৱল দীঘলীয়া সময়ৰ বাবেই কাম কৰা নহয়। ইয়াৰ অৰ্থ হ'ল প্ৰতিটো সুযোগ ভালদৰে অধ্যয়ন কৰা, কেতিয়া ৰিস্ক ল’ব লাগে সেইটো জনা, ব্যৱসায়ত সঠিক লোকক নিয়োগ কৰা আৰু কাম কেনেদৰে কৰা হয় সেয়া নিৰীক্ষণ কৰা।
তেওঁ কয়, "আপুনি আপোনাৰ নিজৰ কাম পৰীক্ষা কৰিব লাগিব। আপুনি প্ৰত্যেকটো সুযোগ অধ্যয়ন কৰিব লাগিব আৰু ক'ত ৰিস্ক ল'ব লাগিব আৰু মানুহক আনিব লাগিব সেই বিষয়ে জানিব লাগিব, তেওঁলোকৰ কাম নিৰীক্ষণ কৰিব লাগিব আৰু ঠেলি দি থাকিব লাগিব।"
তাৰ পিছত আলাব্বৰে এই ধাৰণাটো তেওঁৰ ব্যৱসায়ত ভাৰতীয় কৰ্মচাৰী নিয়োগ কৰাৰ সৈতে সংযোগ কৰিছিল। তেওঁ কয়, "যিমান কঠোৰ পৰিশ্ৰম কৰিব সিমানেই ভাগ্যৱান হ’ব। এটা কথা আছে নহয় যে, প্ৰতিভা থাকিলেও যদি কঠোৰ পৰিশ্ৰম কৰাত ব্যৰ্থ হয়, তেন্তে কঠোৰ পৰিশ্ৰমে প্ৰতিভাক পৰাস্ত কৰে, আৰু এই কাৰণেই মই ভাৰতীয়ক নিযুক্তি দি ভাল পাওঁ, কাৰণ তেওঁলোকে দোভাগ নিশা এক বজাতো ফোন ৰিচিভ কৰে।"
তেওঁৰ এই মন্তব্য ইউএইত বাস কৰা ৪.৩ ৰ পৰা ৪.৩৯ নিযুত প্ৰবাসী ভাৰতীয়ৰ বাবে এক বৃহৎ প্ৰশংসা হিচাপে গণ্য কৰা হৈছে, যিসকলে সৰ্ববৃহৎ প্ৰবাসী সম্প্ৰদায়ৰ গোট গঠন কৰিছে। দৰাচলতে সংযুক্ত আৰৱ এমিৰেটছৰ মুঠ জনসংখ্যাৰ ৩৫-৩৮% হৈছে ভাৰতীয়।
প্ৰতিনিধিত্বমুলক ফটো
বিশেষকৈ ডুবাই আৰু আবু ধাবিত সংযুক্ত আৰৱ এমিৰেটছ (ইউএই)ত ভাৰতীয়সকল হৈছে সৰ্বাধিক সংখ্যক বিদেশী শ্ৰমিক। নিৰ্মাণ, খুচুৰা, স্বাস্থ্যসেৱা আৰু বিত্তীয় সেৱাৰ দৰে ক্ষেত্ৰসমূহত ইহঁতৰ গুৰুত্বপূৰ্ণ ভূমিকা আছে। সংযুক্ত আৰৱ এমিৰেটছলৈ প্ৰব্ৰজন কৰা ভাৰতীয়সকলৰ অধিকাংশই কেৰালাৰ পৰা অহা পেছাদাৰী আৰু শ্ৰমিক। ইয়াৰ পিছত তামিলনাডু, অন্ধ্ৰ প্ৰদেশ, তেলেংগানা, উত্তৰ প্ৰদেশ, বিহাৰ আৰু পঞ্জাৱ আছে।
ভাৰতীয়সকলৰো সংযুক্ত আৰব এমিৰেটছৰ কিছুমান বৃহৎ ব্যৱসায় আছে। ইয়াৰ ভিতৰত আছে বিনোদ আদানী, যাৰ সম্পত্তিৰ পৰিমাণ ২০.৮ বিলিয়ন ডলাৰ, এম এ ইউছুফ আলী যাৰ সম্পত্তিৰ পৰিমাণ ৫.৮ বিলিয়ন ডলাৰ, ৰেণুকা জগতিয়াণী যাৰ সম্পত্তিৰ পৰিমাণ ৫.৬ বিলিয়ন ডলাৰ, জয় আলুককাছ যাৰ সম্পত্তিৰ পৰিমাণ ৫.২ বিলিয়ন ডলাৰ, ৰবি পিল্লাই যাৰ সম্পত্তিৰ পৰিমাণ ৪.২ বিলিয়ন ডলাৰ, ছানি ৱাৰ্কী যাৰ সম্পত্তিৰ পৰিমাণ ৪ বিলিয়ন ডলাৰ, পিএনচি মেননৰ সম্পত্তি ৩.৯ বিলিয়ন ডলাৰ আৰু কবিৰ মুলচান্দানিৰ সম্পত্তি ২.২ বিলিয়ন ডলাৰ।
শেহতীয়াকৈ, ইৰান আৰু আমেৰিকা যুক্তৰাষ্ট্ৰ-ইজৰাইলৰ সংঘৰ্ষৰ সময়ত প্ৰবাসী ভাৰতীয় শিশুৱে তেওঁলোকৰ গৃহীত দেশখনৰ বাবে এক আৱেগিক মুহূৰ্তৰ সৃষ্টি কৰিছে। তেওঁলোকে ভাৰতীয় বাদ্যযন্ত্ৰৰ সহায়ত ইউএইৰ ৰাষ্ট্ৰীয় সংগীত পৰিৱেশন কৰিছে।
এই প্ৰদৰ্শন সেই সময়ত হৈছিল যেতিয়া ইৰানে ইউএছ বেজ আৰু ইউএইৰ অন্যান্য স্থানসমূহ আক্ৰমণৰ লক্ষ্য কৰি লৈছিল। বিদ্যালয়ৰ ছাত্ৰ-ছাত্ৰীসকলে এই সংগীত পৰিৱেশন কৰিছিল আৰু ভিডিঅ'টো ছ'চিয়েল মিডিয়াত দ্ৰুতভাৱে ভাইৰেল হৈ পৰিছিল। এই সংগীত প্ৰদৰ্শনে ৰাজকুমাৰৰ পৰাও প্ৰশংসা লাভ কৰিছিল।
