নতুন দিল্লী
আমেৰিকাৰ ৰাষ্ট্ৰপতি ড'নাল্ড ট্ৰাম্পৰ সম্প্ৰতি প্ৰকাশ পোৱা মন্তব্য আৰু নীতিৰ বিৰুদ্ধে ইৰানে এক তীব্ৰ আৰু তীখা আক্ৰমণাত্মক প্ৰতিক্ৰিয়া ব্যক্ত কৰিছে। ইৰানৰ চৰকাৰী সংবাদ মাধ্যম আৰু শীর্ষ নেতাসকলে ট্ৰাম্পক তীব্ৰ কটাক্ষ কৰি মন্তব্য কৰিছে যে তেওঁৰ নীতি আৰু ৰাজনৈতিক ভবিষ্যৎ "অতি সোনকালে ইতিহাসৰ জাবৰৰ বাল্টিলৈ" নিক্ষেপ হ'ব।
ইৰান আৰু আমেৰিকাৰ মাজত দীৰ্ঘদিন ধৰি চলি অহা উত্তেজনা পুনৰ বৃদ্ধি পাইছে। ইৰানৰ ওপৰত আৰোপ কৰা কঠোৰ অৰ্থনৈতিক প্ৰতিবন্ধকতা আৰু মধ্যপ্ৰাচ্যত আমেৰিকান সামৰিক উপস্থিতিক লৈ ড'নাল্ড ট্ৰাম্পে আগবঢ়োৱা আক্ৰমণাত্মক বক্তব্যৰ প্ৰত্যুত্তৰত ইৰানে এই বিশেষ শব্দ প্ৰয়োগ কৰি তেওঁক উপহাস কৰে।
ইৰানৰ বিদেশ মন্ত্ৰালয় আৰু চৰকাৰী মুখপাত্ৰসকলে দাবী কৰে যে ট্ৰাম্পৰ "সৰ্বোচ্চ চাপ" নীতি ইৰানক দোৱাব পৰা নাই, বৰঞ্চ আমেৰিকাৰ কূটনৈতিক ব্যৰ্থতাহে উদঙাই দিছে। ইৰানী সংবাদ মাধ্যমে প্ৰকাশ কৰা অনুসৰি, সমগ্ৰ বিশ্বতে নিজৰ বিশ্বস্ততা হেৰুওৱা এনে সুবিধাবাদী নেতাসকল অতি সোনকালে ৰাজনৈতিক দৃশ্যপটৰ পৰা নাইকিয়া হৈ জাবৰৰ বাল্টিত স্থান পাব।
'নাল্ড ট্ৰাম্পে তেওঁৰ কাৰ্যকালত ২০১৫ চনৰ ঐতিহাসিক ইৰান পাৰমাণৱিক চুক্তিৰ পৰা আমেৰিকাক একতৰফীয়ভাৱে আঁতৰাই আনিছিল।আমেৰিকাই ইৰানৰ তেল ৰপ্তানি আৰু বেংক ব্যৱস্থাৰ ওপৰত নিষেধাজ্ঞা আৰোপ কৰি দেশখনৰ অৰ্থনীতি পঙ্গু কৰাৰ চেষ্টা চলাইছিল।
২০২০ চনত ট্ৰাম্পৰ নিৰ্দেশত ইৰানৰ শীৰ্ষ সামৰিক কমাণ্ডাৰ জেনেৰেল কাছিম সোলেইমানীক হত্যা কৰাৰ পিছৰে পৰা দুয়োখন দেশৰ সম্পৰ্ক চৰম অৱনতি ঘটিছিল।
ইৰানৰ এই নতুন কটাক্ষই স্পষ্ট কৰি দিয়ে যে আমেৰিকাৰ ৰাজনীতি আৰু ট্ৰাম্পৰ প্ৰতি ইৰানৰ মনোভাব এতিয়াও অত্যন্ত সংঘাতপূৰ্ণ। মধ্যপ্ৰাচ্যত বৰ্ধিত উত্তেজনা আৰু আমেৰিকাৰ আগন্তুক ৰাজনৈতিক ধুমুহাৰ মাজতে ইৰানৰ এই আক্ৰমণাত্মক বাৰ্তাই আন্তঃৰাষ্ট্ৰীয় পৰ্যায়ত এক ডাঙৰ চৰ্চাৰ সৃষ্টি কৰিছে।
