তেহৰান (ইৰান)
ইৰানে প্ৰকাশ কৰা অনুসৰি তেওঁলোকে বাহৰেইনত থকা আমেৰিকা যুক্তৰাষ্ট্ৰৰ এটা সামৰিক ঘাটিক লক্ষ্য কৰি মিছাইল আক্ৰমণ চলাইছে। শনিবাৰে ভাৰতত থকা ইৰানৰ দূতাবাসে জনোৱা অনুসৰি, "বাহৰেইনত থকা আমেৰিকাৰ এটা সামৰিক ঘাটি ইৰানৰ মিছাইল আক্ৰমণৰ লক্ষ্য আছিল।" দূতাবাসে এই আক্ৰমণৰ পিছৰ এটা ভিডিঅ'ও প'ষ্ট কৰিছে, য'ত ধোঁৱাৰ কুণ্ডলী ওলাই থকা দেখা গৈছে।
ইয়াৰ পূৰ্বে ইৰানৰ ইছলামিক ৰিভল্যুচনেৰী গাৰ্ড কৰ্পছে (IRGC) নিজৰ ওপৰত হোৱা "জিয়নিষ্ট প্ৰশাসনৰ নিষ্ঠুৰ আগ্ৰাসন"ক গৰিহণা দি দাবী কৰিছিল যে তেওঁলোকৰ এই আক্ৰমণ "ইৰানৰ শত্ৰুৰ আগ্ৰাসনৰ এক প্ৰত্যুত্তৰ"।
ভাৰতত থকা ইৰানৰ দূতাবাসে কয়, "অত্যাচাৰী বিনাশকাৰী আল্লাৰ নামত। ইছলামিক ৰিপাব্লিক অৱ ইৰানৰ ওপৰত শত্ৰুভাৱাপন্ন আৰু অপৰাধী শত্ৰুৰ আগ্ৰাসনৰ প্ৰতিক্ৰিয়া স্বৰূপে, দখলীকৃত অঞ্চলসমূহলৈ ইছলামিক ৰিপাব্লিক অৱ ইৰানৰ দ্বাৰা ব্যাপক মিছাইল আৰু ড্ৰোন আক্ৰমণৰ প্ৰথমটো ঢৌ আৰম্ভ হৈছে।"
খালিজ টাইমছৰ মতে, ইয়াৰ পূৰ্বে সংযুক্ত আৰৱ আমিৰশ্বাহীয়েও (UAE) ইৰানৰ সেনাই নিক্ষেপ কৰা মিছাইল আকাশতে ভেটা দিছিল।
আঞ্চলিক উত্তেজনা নাটকীয়ভাৱে বৃদ্ধি পোৱাৰ মাজতে, ইৰানে সৃষ্টি কৰা তথাকথিত অস্তিত্বৰ সংকট মোকাবিলা কৰাৰ লক্ষ্যৰে ইজৰাইল আৰু আমেৰিকা যুক্তৰাষ্ট্ৰই এক যুটীয়া অভিযান আৰম্ভ কৰিছে।
কেইবা সপ্তাহ ধৰি চলা গুৰুত্বপূৰ্ণ পাৰমাণৱিক আলোচনা আৰু অঞ্চলটোত বৃদ্ধি পোৱা সামৰিক তৎপৰতাৰ পিছতেই এই ধাৰাবাহিক আক্ৰমণৰ ঘটনা ঘটিছে। এই আক্ৰমণৰ সম্পূৰ্ণ পৰিসৰ আৰু প্ৰভাৱৰ এতিয়াও মূল্যায়ন কৰা হৈ থকাৰ সময়তে, এই পদক্ষেপে দুয়োখন দেশৰ মাজত চলি থকা ব্যাপক সংঘাতৰ মাজত এক গুৰুত্বপূৰ্ণ প্ৰতিশোধমূলক কাৰ্যৰ ইংগিত বহন কৰিছে।
ইফালে, ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে আমেৰিকাৰ সমৰ্থনৰ বাবে আমেৰিকাৰ ৰাষ্ট্ৰপতি ট্ৰাম্পক ধন্যবাদ জ্ঞাপন কৰে আৰু ট্ৰাম্পৰ নেতৃত্বক "ঐতিহাসিক" বুলি আখ্যা দিয়ে।
বিবৃতিত কোৱা হৈছে, "মোৰ ভাই-ভনীসকল, ইজৰাইলৰ নাগৰিকসকল, মাত্ৰ এঘণ্টা আগতে, ইৰানৰ সন্ত্ৰাসবাদী প্ৰশাসনে সৃষ্টি কৰা অস্তিত্বৰ সংকট দূৰ কৰিবলৈ ইজৰাইল আৰু আমেৰিকা যুক্তৰাষ্ট্ৰই এক অভিযান আৰম্ভ কৰিছে।"
ইয়াৰ পিছত নেতানিয়াহুৱে ইৰানৰ জনসাধাৰণক ইছলামিক প্ৰশাসনৰ বিৰুদ্ধে থিয় দিবলৈ এক আৱেগিক আহ্বান জনায়। তেওঁ কয়, "ইৰানৰ সকলো শ্ৰেণীৰ জনসাধাৰণ - পাৰ্চী, কুৰ্দ, আহৱাজী বালুচ আৰু আহৱাজীসকলৰ বাবে অত্যাচাৰৰ পৰা মুক্ত হোৱাৰ লগতে এক শান্তিপ্ৰিয় ইৰান গঢ়ি তোলাৰ সময় আহি পৰিছে।"
এই ঘটনাক্ৰমৰ প্ৰতিক্ৰিয়া স্বৰূপে, 'ট্ৰুথ ছ’চিয়েল'ত সম্প্ৰচাৰিত এক ভাষণত ট্ৰাম্পে ইৰানৰ পাৰমাণৱিক আৰু সামৰিক আন্তঃগাঁথনিক লক্ষ্য কৰি এক সামৰিক অভিযান আৰম্ভ কৰাৰ কথা নিশ্চিত কৰে।
ইজৰাইল প্ৰতিৰক্ষা বাহিনীয়েও (IDF) ইয়াৰ পূৰ্বে এই আক্ৰমণৰ কথা ঘোষণা কৰিছিল, যাক "অপাৰেচন ৰোৰিং লায়ন" (Operation Roaring Lion) নাম দিয়া হৈছে। তেওঁলোকে জনাইছে যে ইয়াৰ উদ্দেশ্য হৈছে ইজৰাইলৰ প্ৰতি থকা ভাবুকি আঁতৰ কৰা।
আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰানৰ বাহিনীক অস্ত্ৰ সম্বৰণ কৰি আত্মসমৰ্পণ কৰিবলৈ সতৰ্ক কৰি দিছে আৰু ইয়াৰ বিনিময়ত ৰেহাই দিয়াৰ প্ৰস্তাৱ দিছে। অন্যথা "নিশ্চিত মৃত্যু"ৰ মুখামুখি হ'বলৈ সাজু থাকিবলৈ কৈছে। উল্লেখ্য যে, ইজৰাইল আৰু আমেৰিকাৰ যুটীয়া সামৰিক অভিযানে ইৰানৰ বিভিন্ন লক্ষ্যত আক্ৰমণ কৰাৰ লগে লগে মধ্যপ্ৰাচ্য এক পূৰ্ণ পৰ্যায়ৰ যুদ্ধৰ পৰিস্থিতিত নিমজ্জিত হৈ পৰিছে।
আনহাতে, ইছৰাইল-আমেৰিকাৰ যৌথ আক্ৰমণত ইৰানৰ এখন বিদ্যায়ত ৪০ গৰাকীতকৈও অধিক ছাত্ৰীৰ মৃত্যু হয় বুলি জানিব পৰা গৈছে৷
.webp "বাহৰেইনত আমেৰিকাৰ সামৰিক ঘাটিক লক্ষ্য কৰি ইৰানৰ মিছাইল আক্ৰমণ")
.webp "ৰমজানৰ আগমনত ব্যস্ত গ্ৰাহক-বিক্রেতা")
