মক্কা আৰু মদিনাৰ পবিত্ৰ মছজিদ দুটা-মছজিদ আল-হাৰাম আৰু মছজিদ নবৱীত জ্যেষ্ঠ ইমামসকল
গুলাম কাদিৰ
পবিত্ৰ ৰমজান মাহৰ ওচৰ চাপি অহাৰ লগে লগে সমগ্ৰ বিশ্বৰ মুছলমানসকলে এই পবিত্ৰ মাহক আদৰিবলৈ আৰু পালন কৰিবলৈ সাজু হৈছে। ইয়াৰ মাজতে, উমৰা আৰু ৰমজানৰ সময়ত হজযাত্ৰীসকলৰ সুবিধা আৰু ইবাদতৰ ব্যৱস্থা চূড়ান্ত কৰাৰ বাবে মক্কা আৰু মদিনাৰ পবিত্ৰ মছজিদ দুটা-মছজিদ আল-হাৰাম আৰু মছজিদ নবৱীত জ্যেষ্ঠ ইমামসকলৰ এক উচ্চ পৰ্যায়ৰ বৈঠক অনুষ্ঠিত কৰা হৈছে। এই গুৰুত্বপূৰ্ণ বৈঠকৰ অধ্যক্ষতা কৰিছে শ্বেইখ অধ্যাপক ডঃ আব্দুল ৰহমান আল ছুদাইছে, যি দুই পবিত্ৰ মছজিদৰ ধৰ্মীয় পৰিক্ৰমাৰ অধ্যক্ষও।
এই বৈঠকৰ মূল উদ্দেশ্য আছিল ১৪৪৭ হিজৰী ৰমজানৰ সময়ছোৱাত মছজিদসমূহত হ'বলগীয়া সকলো উপাসনা আৰু সেৱাসমূহক চূড়ান্ত ৰূপ দিয়া, হজযাত্ৰীসকলৰ অভিজ্ঞতা উন্নত কৰা আৰু বিশ্বজুৰি মুছলমানসকলৰ মাজত ধৰ্মীয় বাৰ্তা আৰু নিৰ্দেশনা প্ৰদানৰ কৌশল প্ৰস্তুত কৰা।
বৈঠকত নামাজ, খুতবা, তাৰাৱীহ, ৰোজা, ছেহৰী আৰু ইফতাৰ আদি কাৰ্যসূচী সম্পৰ্কে বিস্তৃতভাৱে আলোচনা কৰা হয়। ইয়াৰ উপৰিও কোৰাণ পাঠ, বক্তৃতা কৰ্মশালা আৰু ইমামসকলৰ বাবে বিশেষ প্ৰশিক্ষণ কাৰ্যসূচীও চূড়ান্ত কৰা হৈছে।
শ্বেইখ আল-ছুদাইছে বৈঠকত কয় যে, হজযাত্ৰীসকলৰ অভিজ্ঞতা সমৃদ্ধ কৰাৰ লগতে তেওঁলোকৰ আধ্যাত্মিক বিকাশ আৰু ধৰ্মীয় জ্ঞানক শক্তিশালী কৰাৰ বাবে এই প্ৰচেষ্টা গ্ৰহণ কৰা হৈছে। বৈঠকত ধৰ্মীয় প্ৰশ্নৰ উত্তৰ দিয়াৰ বাবে কাৰ্যসূচীসমূহ অধিক শক্তিশালী কৰাৰ লগতে আৰু বিশ্বাসযোগ্য বহুভাষিক বিষয়বস্তুৰ উপলব্ধতাৰ ওপৰত গুৰুত্ব দিয়া হয়।
ৰমজান মাহত সকলো সেৱাক অতি তৎক্ষণাত আৰু উৎকৃষ্টতাৰে উপলব্ধ কৰাৰ বাবে পৰিচালনা আৰু কাৰিকৰী প্ৰস্তুতিৰ প্ৰতিটো দিশত সযতনে গুৰুত্ব দিয়া হৈছে। মক্কা অঞ্চলৰ উপ-ৰাজ্যপাল, মহামহিম ৰাজকুমাৰ ছৌদ বিন মিছাল বিন আব্দুলাজিজক শ্বেইখ আল-ছুদাইছ আৰু গ্ৰেণ্ড মছজিদৰ ইমামসকলৰ দলে এই পৰিকল্পনা আৰু প্ৰস্তুতিৰ বিষয়ে অৱগত কৰে।
১৪৪৭ হিজৰী ৰমজানত মক্কাৰ গ্ৰেণ্ড মছজিদত তাৰাৱীহ নামাজৰ নেতৃত্ব দিব পৰা ইমামসকলৰ তালিকা ২০২৬ চনৰ ১৩ জানুৱাৰীত আনুষ্ঠানিকভাৱে প্ৰকাশ কৰা হয়। এইবাৰ তাৰাৱীহৰ নামাজৰ নেতৃত্ব দিয়া সাতজন প্ৰধান ইমাম হ’ল- শ্বেইখ আব্দুল ৰহমান আল-ছুদাইছ, শ্বেইখ মাহেৰ আল-মুহাইকলি, শ্বেইখ আব্দুল্লা জুহানী, শ্বেইখ বান্দৰ বলিলা, শ্বেইখ ইয়াছিৰ দাউছাৰী, শ্বেইখ বদৰ আল-তুৰ্কী, আৰু শ্বেইখ ৱালিদ আল-শ্বামছান।
এই সকলো ইমাম কোৰাণ পাঠ, প্ৰচাৰ, ধৰ্মীয় জ্ঞানৰে দক্ষ আৰু অভিজ্ঞ। আৱেগিক আৰু শক্তিশালী কোৰাণ আবৃত্তিৰ বাবে শ্বেইখ আল ছুদাইছ বিশ্বজুৰি বিখ্যাত হোৱাৰ বিপৰীতে শ্বেইখ মাহেৰ আল মুহাইকলি সুষম আৰু স্পষ্ট আবৃত্তি শৈলীৰ বাবে পৰিচিত।
আনহাতে, শ্বেইখ আব্দুল্লা জুহানী তেওঁৰ সুৰীয়া কণ্ঠ আৰু উম আল-কুৰা বিশ্ববিদ্যালয়ৰ অধ্যাপক হিচাপে আগবঢ়োৱা অৱদানৰ বাবে বিখ্যাত। শ্বেইখ বান্দৰ বলিলা, শ্বেইখ ইয়াছিৰ দাউছাৰী আৰু শ্বেখ বদৰ আল তুৰ্কীৰ ধৰ্মীয় শিক্ষা আৰু প্ৰচাৰৰ বিস্তৃত অভিজ্ঞতা আছে। তদুপৰি, শ্বেখ ৱালিদ আল শ্বামছান গ্ৰেণ্ড মছজিদত এজন সন্মানীয় ইমাম হিচাপে পৰিচিত আৰু তেওঁৰ কোৰাণ পাঠ অত্যন্ত আৱেগিক।
নামাজ পঢ়াৰ এক দৃশ্য
জোন দৰ্শনৰ দ্বাৰা ৰমজানৰ আৰম্ভণি নিৰ্ণয় কৰা হ’ব। উম আল-কুৰা কেলেণ্ডাৰ অনুসৰি, নতুন চন্দ্ৰ ১৭ ফেব্ৰুৱাৰী ২০২৬ তাৰিখে দেখা পোৱা যোৱাৰ সম্ভাৱনা আছে। যদি ১৭ ফেব্ৰুৱাৰীত চন্দ্ৰ দেখা যায় তেন্তে ১৮ ফেব্ৰুৱাৰী বুধবাৰৰ পৰা ৰমজান আৰম্ভ হ’ব। যদি নতুন চন্দ্ৰ দেখা পোৱা নাযায়, তেন্তে ১৮ ফেব্ৰুৱাৰীত ১৪৪৭ হিজৰীত শ্বাবান বুলি গণ্য কৰা হ’ব, আৰু ১৯ ফেব্ৰুৱাৰীত বৃহস্পতিবাৰৰ পৰা ৰমজান আৰম্ভ হ’ব।
ৰমজানৰ পবিত্ৰ মাহত ঈছাৰ পিছত তাৰাৱীহ নামাজ আদায় কৰা হয়। এইটো অত্যাৱশ্যকীয় নহয়, কিন্তু বিশেষ ৰাতিৰ নামাজ হিচাপে ইয়াৰ তাহাজ্জুদৰ দৰেই তাৎপৰ্য আছে। হজৰত মহম্মদ (চঃ)-এ জুম্মাৰ নামাজৰ পূৰ্বে ইয়াক প্ৰতিষ্ঠা কৰিছিল। সমগ্ৰ বিশ্বৰ মছজিদসমূহৰ দৰে মক্কা আৰু মদিনাৰ পবিত্ৰ মছজিদসমূহতো তাৰাৱীহৰ নামাজ আদায় কৰা হয় আৰু পোনপটীয়াকৈ সম্প্ৰচাৰ কৰা হয়।
মক্কা আৰু মদীনাত ৰমজানৰ সমগ্ৰ মাহত লাখ লাখ মুছলমান লোকে উমৰাহ কৰিবলৈ আহে, সেয়েহে তাৰাৱীহৰ নামাজ পঢ়োৱা ইমামসকলৰ নিৰ্বাচনৰ ওপৰত বিশেষ গুৰুত্ব দিয়া হয়। নিৰ্বাচিত ইমামসকলক বিশেষ প্ৰশিক্ষণ দিয়া হয়, য'ত কোৰাণ পাঠ, খুতবা আৰু বক্তৃতা কৰ্মশালা আদি অন্তৰ্ভুক্ত থাকে। ই নিশ্চিত কৰে যে, ইমামসকলে তেওঁলোকৰ পাঠ আৰু খুতবাৰ যোগেদি হজযাত্ৰী আৰু বিশ্বজুৰি মুছলমানসকলক আধ্যাত্মিক পথ প্ৰদৰ্শন কৰিব পাৰে।
এই বৰ্ষৰ প্ৰস্তুতিত কেৱল ধৰ্মীয় দিশৰ ওপৰত গুৰুত্ব দিয়া হোৱা নাই, বৰঞ্চ হজযাত্ৰীসকলৰ সুবিধা, সেৱাৰ গুণগত মান আৰু বহুভাষিক সামগ্ৰীৰ উপলব্ধতাৰ ওপৰতো বিশেষ গুৰুত্ব দিয়া হৈছে। শ্বেইখ আল-ছুদাইছে কয় যে, ৰমজানৰ এই প্ৰস্তুতি হজযাত্ৰীসকলৰ অভিজ্ঞতা উন্নত কৰিবলৈ, তেওঁলোকৰ আধ্যাত্মিক বৃদ্ধি আৰু ধৰ্মীয় শিক্ষা শক্তিশালী কৰিবলৈ কৰা হৈছে।
মক্কা আৰু মদীনাত ৰমজানৰ সময়ত সকলো সেৱাৰ নিৰীক্ষণৰ বাবে কাৰিকৰী আৰু পৰিচালনা সম্পৰ্কীয় সকলো দিশ বিবেচনা কৰা হৈছে। এই পবিত্ৰ মাহত তৰাৱীহ আৰু নামাজৰ নেতৃত্ব দিয়া ইমামসকলৰ সেৱা বিশ্বব্যাপী সম্প্ৰচাৰ কৰা হ'ব, যাতে বিশ্বৰ মুছলমানসকলেও ইয়াৰ দ্বাৰা উপকৃত হ'ব পাৰে।
মক্কা আৰু মদিনাৰ পবিত্ৰ মছজিদসমূহত ১৪৪৭ হিজৰী ৰমজানৰ প্ৰস্তুতি সম্পূৰ্ণ হৈছে। ইমামসকলৰ নিযুক্তি, প্ৰশিক্ষণ আৰু সেৱাসমূহৰ বিস্তৃত পৰিকল্পনাই নিশ্চিত কৰিছে যে, ৰমজানৰ এই মাহটো হজযাত্ৰী আৰু বিশ্বৰ মুছলমানসকলৰ বাবে আধ্যাত্মিক আৰু ধৰ্মীয়ভাৱে অতিশয় সমৃদ্ধ আৰু স্মৰণীয় হৈ থাকিব। পবিত্ৰ মাহৰ আৰম্ভণিৰ লগে লগে মক্কা-মদিনাৰ মছজিদসমূহে সম্পূৰ্ণ প্ৰস্তুতিৰে মুছলমানসকলক আদৰণি জনাব আৰু তেওঁলোকক এক অনন্য আধ্যাত্মিক অভিজ্ঞতা প্ৰদান কৰিব।
