অহা সপ্তাহত ইছলামাবাদত আমেৰিকা আৰু ইৰানৰ মাজত আলোচনা পুনৰ আৰম্ভ হোৱাৰ সম্ভাৱনা: প্ৰতিবেদন
ৱাশ্বিংটন ডিচি (আমেৰিকা)
আমেৰিকা যুক্তৰাষ্ট্ৰ আৰু ইৰানৰ মাজত চলি থকা সংঘাত সমাপ্ত কৰাৰ লক্ষ্যৰে অহা সপ্তাহৰ ভিতৰতে পাকিস্তানৰ ইছলামাবাদত পুনৰ আলোচনা আৰম্ভ হোৱাৰ সম্ভাৱনা আছে। ‘দ্য ৱাল ষ্ট্ৰীট জাৰ্নেল’ৰ এক প্ৰতিবেদন অনুসৰি, মধ্যস্থতাকাৰীৰ জৰিয়তে দুয়োপক্ষই বৰ্তমান এপিঠীয়া আৰু ১৪ টা দফা সম্বলিত এখন বুজাবুজিৰ চুক্তিৰ (MoU) খচৰা প্ৰস্তুত কৰি আছে। এই চুক্তিখনে এমহলীয়া এক আলোচনা প্ৰক্ৰিয়াৰ বাবে প্ৰয়োজনীয় পৰিকাঠামো তৈয়াৰ কৰিব বুলি আশা কৰা হৈছে।
এই প্ৰস্তাৱিত খচৰাত ইৰানৰ পাৰমাণৱিক কাৰ্যসূচী নিয়ন্ত্ৰণ কৰা, হৰমুজ প্ৰণালীত সামৰিক উত্তেজনা হ্ৰাস কৰা আৰু ইৰানৰ ওচৰত থকা উচ্চ মাত্ৰাত সমৃদ্ধ ইউৰেনিয়ামৰ ভাণ্ডাৰ আন দেশলৈ স্থানান্তৰ কৰাৰ দৰে গুৰুত্বপূৰ্ণ বিষয়সমূহ অন্তৰ্ভুক্ত কৰা হৈছে। অৱশ্যে, ইৰানৰ ওপৰত থকা অৰ্থনৈতিক নিষেধাজ্ঞা কিমান পৰিমাণে আঁতৰোৱা হ’ব, সেই লৈ এতিয়াও দুই পক্ষৰ মাজত একমত হ’ব পৰা নাই। এই গুৰুত্বপূৰ্ণ মতভেদৰ বাবে আলোচনা প্ৰক্ৰিয়া কিছু পলম হোৱাৰ সম্ভাৱনা আছে যদিও দুয়োপক্ষ সন্মত হ’লে এমহীয়া আলোচনাৰ সময়সীমা অধিক বৃদ্ধি কৰিব পৰা যাব।
ইফালে, শুকুৰবাৰে ডোনাল্ড ট্ৰাম্পে সাংবাদিকৰ আগত প্ৰকাশ কৰে যে তেওঁৰ প্ৰশাসনে ইৰানৰ পৰা এক চূড়ান্ত সঁহাৰিৰ বাবে অপেক্ষা কৰি আছে। ট্ৰাম্পে জনোৱা মতে, আমেৰিকাই আগবঢ়োৱা প্ৰস্তাৱটোত ইৰানে পাৰমাণৱিক অস্ত্ৰ ত্যাগ কৰাৰ লগতে পাৰমাণৱিক সমলসমূহ হস্তান্তৰ কৰাৰ কথা স্পষ্টকৈ উল্লেখ কৰা হৈছে। যদিও ইৰানে পূৰ্বে এই কথাত মৌখিক সন্মতি দিছে, তথাপিও ট্ৰাম্পে ইৰানৰ নেতৃত্বৰ ওপৰত সম্পূৰ্ণ বিশ্বাস ৰাখিবলৈ টান পাইছে। তেওঁৰ মতে, ইৰানৰ নেতাসকলে সন্মতি দিও পিছদিনাই সেই কথা পাহৰি যোৱাৰ ইতিহাস আছে।
একে সময়তে আমেৰিকাৰ বিদেশ সচিব মাৰ্কো ৰুবিঅ’ই ইটালী ভ্ৰমণৰ কালছোৱাত মন্তব্য কৰে যে ইৰানৰ আভ্যন্তৰীণ ব্যৱস্থা বৰ্তমান অতিশয় বিশৃংখল আৰু বিভাজিত হৈ আছে। এই কাৰ্যক্ষমহীনতাই আলোচনা প্ৰক্ৰিয়াত হেঙাৰ হিচাপে কাম কৰিব পাৰে বুলি তেওঁ সন্দেহ প্ৰকাশ কৰিছে। ৰুবিঅ’ই আশা কৰে যে ইৰানৰ পৰা অহা সঁহাৰিটো এক গম্ভীৰ আলোচনাৰ আৰম্ভণি হ’ব। বৰ্তমান সময়লৈকে ৱাশ্বিংটনে আনুষ্ঠানিকভাৱে কোনো সঁহাৰি পোৱা নাই বুলিও তেওঁ স্পষ্ট কৰি দিয়ে।
উল্লেখ্য যে, যোৱা ২৮ ফেব্ৰুৱাৰীত আমেৰিকা আৰু ইজৰাইলে ইৰানৰ ওপৰত কৰা আক্ৰমণৰ পিছৰে পৰা মধ্যপ্ৰাচ্যত তীব্ৰ উত্তেজনা বিৰাজ কৰিছে। ইয়াৰ পৰিণতিত ইৰানেও প্ৰত্যাক্ৰমণ চলাইছিল আৰু গোলকীয় শক্তি পৰিবহণৰ গুৰুত্বপূৰ্ণ পথ হৰমুজ প্ৰণালীত বাধাৰ সৃষ্টি কৰিছিল। যোৱা ৮ এপ্ৰিলৰ পৰা পাকিস্তানৰ মধ্যস্থতাত এক যুদ্ধবিৰতি চলি আছে যদিও ১১ এপ্ৰিলৰ আলোচনা বিফল হৈছিল। যোৱা ১৩ এপ্ৰিলৰ পৰা আমেৰিকাই এই জলপথত ইৰানৰ জাহাজ চলাচলৰ ওপৰত নৌসেনাৰ অৱৰোধ বাহাল ৰাখিছে।
