আৱাজ-দ্য ভইছ'ৰ সৈতে হোৱা এক সাক্ষাৎকাৰত চুমন চেহনাজে কয়, "মই পুৱা প্ৰায় ৩.৩০ ত উঠিছিলোঁ আৰু আন্ধাৰ হৈ থাকোতেই দৌৰিছিলোঁ। মানুহে যাতে দেখা নাপাই সেইকাৰণে মই আন্ধাৰ হৈ থাকোতেই দৌৰিছিলোঁ। আৰক্ষী বিভাগৰ শাৰীৰিক পৰীক্ষাৰ বাবে প্ৰস্তুতি চলোৱাৰ আগতেও মই দৌৰিছিলোঁ। যিহেতু মই অলপ শকত আছিলোঁ। যেতিয়া অসম আৰক্ষীৰ লিখিত পৰীক্ষাৰ ফলাফল ঘোষণা কৰিছিল তেতিয়া ইয়াত বানপানী হৈ আছিল। দৌৰিবৰ বাবে শুকান ঠাই পোৱা নাছিলোঁ। মুখ্যমন্ত্ৰী হিমন্ত বিশ্ব শৰ্মাই উদ্বোধন কৰি যোৱা গোপাল থানৰ মিনি ষ্টেডিয়ামত দৌৰিছিলোঁ। সেই সময়খিনিত কেৱল সেইখন মিনি ষ্টেডিয়ামতহে পানী উঠা নাছিল।"

নৱ নিযুক্ত আৰক্ষী উপ-পৰিদৰ্শক চুমন চেহনাজে মুখ্যমন্ত্ৰী হিমন্ত বিশ্ব শৰ্মাক ধন্যবাদ জ্ঞাপন কৰি কয়, "মোৰ বহুত ভাল লাগিছে। এটকাও নিদিয়াকৈয়ে মই চাকৰি পাইছোঁ। কেৱল মইয়ে নহয়, সকলো নিযুক্তি নিকা আৰু স্বচ্ছ হৈছে। মই যিহেতু নিম্ন মধ্যবিত্ত পৰিয়ালৰ ছোৱালী, গতিকে মই টকা দি চাকৰি ল'ব পৰা পৰ্য্যায় নাই। মোৰ দৰেই অসমৰ বহু নিবনুৱা যুৱক-যুৱতীয়ে মেধাৰ ভিত্তিত চাকৰি লাভ কৰিবলৈ সক্ষম হৈছে। গতিকে মুখ্যমন্ত্ৰী হিমন্ত বিশ্ব শৰ্মাক মই ধন্যবাদ জ্ঞাপন কৰিছোঁ। আমি যেনেকৈ চাকৰি লাভ কৰিছোঁ, ঠিক তেনেকৈয়ে নিকা আৰু স্বচ্ছতাৰে কাম কৰি যাম।"