ডানিছ আলী / বান্দিপোৰা
কাশ্মীৰৰ বান্দিপোৰাৰ এগৰাকী ১৯ বছৰীয়া শিল্পীয়ে নিজৰ প্ৰতিভা আৰু দৃঢ় সংকল্পৰ জৰিয়তে সমাজত এক বিশেষ স্থান দখল কৰিবলৈ সক্ষম হৈছে। তেওঁৰ নাম হৈছে ছীৰাট তাৰিক।
মাত্ৰ ১৯ বছৰ বয়সতে ছীৰাটে মাত্ৰ দুদিনৰ ভিতৰত ১০৬ খন আৰ্টৱৰ্কছ নিৰ্মাণ কৰি ইণ্ডিয়া বুক অফ ৰেকৰ্ডছত স্থান লাভ কৰে। এই অবিশ্বাস্য কৃতিত্বই তেওঁক কাশ্মীৰৰ এটা সৰু শ্ৰেণীকোঠাৰ পৰা ৰাষ্ট্ৰীয় পৰ্যায়লৈ লৈ যায়। কিন্তু ছীৰাট কেৱল এগৰাকী অভিলেখসৃষ্টিকাৰী নহয়। তেওঁ আজি কাশ্মীৰীসকলৰ সৃজনীশীলতা, শক্তি আৰু সুস্থিৰতাৰ এক বিশ্বজনীন প্ৰতীক হিচাপে পৰিগণিত হৈছে।
ছীৰাট তাৰিক তেওঁৰ শিল্পকৰ্মৰ সৈতে
ছীৰাটে খুৱ কম বসয়তে চিত্ৰ অংকন কৰিবলৈ আৰম্ভ কৰিছিল। স্কুলৰ বন্ধৰ সময়ত তেওঁ ফুল আৰু মানুহৰ মুখৰ ছবি আঁকিছিল।
তেওঁৰ বাবে চিত্ৰাংকন আছিল উচ্চস্বৰে ক'ব নোৱাৰা অনুভূতি প্ৰকাশ কৰাৰ এক উপায়। ক'ভিড-১৯ৰ লকডাউনৰ সময়ত যেতিয়া তেওঁ বহুত অতিৰিক্ত সময় লাভ কৰিছিল, তেতিয়া সেই সময়খিনি তেওঁ নিজৰ শিল্পকলাৰ ওপৰত মনোযোগ দিবলৈ ব্যৱহাৰ কৰিছিল।
তেওঁ কেলিগ্ৰাফী, তৈল অংকন আৰু জলৰঙৰ দৰে নতুন শৈলীৰ চেষ্টা কৰিছিল। তেওঁৰ গৃহিনী মাতৃয়ে তেওঁলোকৰ ঘৰৰ এটা কোণত এটা সৰু ষ্টুডিঅ' তৈয়াৰ কৰিছিল। ছীৰেটে কয় যে তেওঁৰ মাতৃয়ে তেওঁক যথেষ্ট সমৰ্থন কৰিছিল যদিও আন কোনোৱেই এই ক্ষেত্ৰত সহায় কৰা নাছিল। মাতৃয়ে ছীৰাটক নিজৰ সপোন অনুসৰণ কৰাৰ সুযোগ দিছিল।
উল্লেখ্য যে, ২০২৩ চনত ছীৰাটে এক অভিলেখ স্থাপন কৰাৰ বাবে ব্যাপক চৰ্চা লাভ কৰে। তেওঁ কাশ্মীৰৰ পৰা এনে সন্মান লাভ কৰা প্ৰথমগৰাকী মহিলা। ই শিল্পী হিচাপে তেওঁৰ উত্থানৰ আৰম্ভণি চিহ্নিত কৰে। এতিয়া ১৯ বছৰীয়া ছীৰাটৰ শিল্পই অতি কম বয়সতে আন্তঃৰাষ্ট্ৰীয় পৰ্য্যায় পাইছে। তেওঁ পৰম্পৰাগত কাশ্মীৰী বিষয়বস্তুক আধুনিক বিমূর্ত শৈলীৰ সৈতে মিশ্ৰিত কৰে। তেওঁৰ কৰ্মৰাজি পেৰিছ, ডুবাই, ইস্তানবুল আৰু কুৱালালামপুৰ আদি চহৰত প্ৰদৰ্শন কৰা হৈছে। ২০২৭ চনত পেৰিছত তেওঁৰ 'Whispers of the Valley' নামৰ প্ৰদৰ্শনীটোৱে যথেষ্ট প্ৰশংসা লাভ কৰে।
ছীৰাট তাৰিক তেওঁৰ শিল্পকৰ্মৰ সৈতে
ফৰাচী কলা সমালোচক পিয়েৰ লৰেনে তেওঁৰ শিল্পক 'নিঃশব্দতা আৰু ৰং, বেদনা আৰু শান্তিৰ মাজত চলন্ত সেতু' বুলি বৰ্ণনা কৰে।তেওঁ কয়, "এয়া কেৱল ব্ৰাছৰ কৌশল শিকোৱাৰ কথা নহয়। ই ছোৱালীসকলক তেওঁলোকৰ কাহিনী আৰু তেওঁলোকৰ কলা গুৰুত্বপূৰ্ণ বুলি বিশ্বাস কৰিবলৈ আত্মবিশ্বাস প্ৰদান কৰা এক বিষয়।"
২০২৪ চনত তেওঁ কলা আৰু যুৱ সৱলীকৰণত তেওঁৰ অৱদানৰ বাবে ৰাষ্ট্ৰীয় যুৱ আইকন বঁটা লাভ কৰে। চলিত বছৰৰ আৰম্ভণিতে তেওঁক ছিউলত ইউনেস্ক'ৰ সৃষ্টিশীল চহৰ মঞ্চ (UNESCO Creative Cities Forum)ত বক্তৃতা দিবলৈ আমন্ত্ৰণ জনোৱা হৈছিল। ইয়াত তেওঁ "Art as Resistance and Renewal" শীৰ্ষক বিষয়ৰ ওপৰত বক্তৃতা দিছিল আৰু সকলোৱে তেওঁৰ বক্তৃতা শুনি ঠিয় হৈ প্ৰশংসা কৰিছিল।
তেওঁৰ সৃষ্টিসমূহ এতিয়া লণ্ডন, দোহা, দিল্লী আৰু টকিঅ'ৰ ব্যক্তিগত সংগ্ৰহসমূহত আছে আৰু প্ৰখ্যাত নিলাম ঘৰ ক্ৰিষ্টিজ আৰু ছ'থবিজেও তেওঁৰ সৃষ্টিসমূহ সংৰক্ষণৰ কথা বিবেচনা কৰি আছে। উল্লেখ্য যে, বিশ্বৰ শিল্পকলাৰ নিলাম বজাৰত ছ'থবিজ আৰু ক্ৰিষ্টিজ হৈছে দুটা প্ৰধান নাম।
এই আন্তঃৰাষ্ট্ৰীয় নিলাম ঘৰৰ এক দীৰ্ঘ ইতিহাস আছে। ১৭০০ শতিকাত প্ৰতিষ্ঠিত নিলাম ঘৰ দুটা বহু মূল্যবান শিল্পকলা, পুৰাতত্ব, অলংকাৰ আৰু অন্যান্য সংগ্ৰহযোগ্য সামগ্ৰীৰ বিক্ৰীৰ বাবে জনাজাত। আন্তঃৰাষ্ট্ৰীয় খ্যাতি লাভ কৰাৰ পিছতো ছীৰাটে এতিয়াও নিজৰ গৃহ চহৰতে বাস কৰে। "ইয়াত থকা পৰ্বতসমূহ কেৱল প্ৰাকৃতিক দৃশ্য নহয়, ই মোৰ স্মৃতি, মোৰ পৰিচয় আৰু মোৰ প্ৰেৰণাৰ অংশ", তেওঁ কয়।
Covid-19 লকডাউনৰ সময়ত কৰা শিল্পকৰ্মৰ সৈতে ছীৰাট তাৰিক
বান্দিপোৰাৰ উপকণ্ঠত তেওঁৰ এটা আৰ্ট ষ্টুডিঅ' আছে। তেওঁ তাত চিত্ৰ অংকন কৰে, যুৱ শিল্পীসকলক পৰামৰ্শ দিয়ে, আৰু স্থানীয় প্ৰতিভাৰ বাবে এটা স্থায়ী কলা স্থান খোলাৰ লগতে নতুন ধাৰণা সমূহৰ ওপৰত কাম কৰে।
ছীৰাটে তেওঁৰ প্ৰথমখন কলা স্মৃতিগ্ৰন্থ 'বিয়ণ্ড দ্য ব্ৰাছ' লিখিছে। ইয়াত তেওঁৰ কেইখনমান শ্ৰেষ্ঠ চিত্ৰকলা, ব্যক্তিগত ৰচনা, আৰু সংঘাতৰ বাবে পৰিচিত এই অঞ্চলটোত এগৰাকী শিল্পী হিচাপে ডাঙৰ-দীঘল হোৱাৰ যাত্ৰা অন্তৰ্ভুক্ত কৰিছে। স্থানীয় কৰ্তৃপক্ষ আৰু শুভাকাংক্ষীসকলৰ সহায়ত ছীৰাটে এতিয়া বান্দিপোৰাত তেওঁৰ সপোনৰ প্ৰকল্প তথা কাশ্মীৰৰ প্ৰথম সমসাময়িক কলা সংগ্ৰহালয়ৰ কাম কৰি আছে। তেওঁ কয়, "এয়া মোৰ বিষয়ে নহয়। ই প্ৰতিজন শিল্পীৰ বাবে হ'ব যিসকলে নিজকে অদৃশ্য বুলি অনুভৱ কৰিছে।
শিল্পৰ প্ৰতি এক নিস্তব্ধ প্ৰেমৰ ৰূপত আৰম্ভ হোৱা এই যাত্ৰা এতিয়া পৰিচয় আৰু শক্তিৰ উৎস হৈ পৰিছে। ছীৰাট তাৰিকৰ যাত্ৰা কেৱল চিত্ৰকলাৰ বাবে নহয়, নীৰৱতাৰ মাজত আশাৰ সন্ধান আৰু প্ৰেমৰ জৰিয়তে শক্তি গঢ়ি তোলাৰ বাবেও এক প্ৰেৰণা। তেওঁ কয়, "কলাই মোক এটা পৰিচয় দিলে। গতিকে এতিয়া মই অন্যসকলৰ বাবে এক স্থান বিচাৰি উলিয়াব বিচাৰিছো।"
