আমিৰ ইকবাল / নতুন দিল্লী
উত্তৰ প্ৰদেশৰ সম্বল চহৰৰ এটা পথত খেলি থকা এদল শিশুৱে এটা দামী স্মাৰ্টফোন পথত পৰি থকা অৱস্থাত প্ৰত্যক্ষ কৰে। সিহঁতে ফোনটো বুটলি লয় আৰু সেয়া নিজৰ লগত ৰখাৰ পৰিৱৰ্তে আৰক্ষীক চমজাই দিয়ে আৰু সকলোৰে হৃদয় জয় কৰে।
শিশুকেইটিৰ মাজৰ এটি শিশুৱে কয় যে যেতিয়া তেওঁলোকে পথৰ কাষত ফোনটো পৰি থকা অৱস্থাত পাইছিল, সেয়া এটা একেবাৰে নতুন আইফোন ১৭ প্ৰ' মেক্স (iPhone 17 Pro Max) আছিল।
শিশুকেইটিয়ে লগে লগে বুজিব পাৰিছিল যে এইটো অতি কমেও ১.৫ লাখ টকা মূল্যৰ এটা দামী ফোন।
শিশুৰ কথা বাদেই, আনকি ডাঙৰ মানুহেও এনে এটা দামী ফোন নিজৰ লগত ৰখাৰ প্ৰলোভনৰ পৰা আঁতৰি থকাটো টান হৈ পৰিলহেঁতেন।
শিশুকেইটিয়ে নিজৰ মাজত আলোচনা কৰে আৰু কয় যে এই ফোনটো নিশ্চয় কাৰোবাৰ হয়, গতিকে ইয়াক ইয়াৰ প্ৰকৃত গৰাকীক ঘূৰাই দিয়া উচিত। তেওঁলোকে পোনে পোনে স্থানীয় আৰক্ষী থানালৈ গৈ ফোনটো আৰক্ষীক গতাই দিয়ে।
আৰক্ষীয়ে অতি সোনকালেই ফোনটোৰ গৰাকী, সেই একেটা অঞ্চলৰে বাসিন্দা নাজিম আলীক বিচাৰি উলিয়ায়, যিয়ে ফোনটো কিনাৰ ঠিক পিছতেই অসাৱধানৱশতঃ হেৰুৱাই পেলাইছিল।
সম্ভল থানাত আৰক্ষীৰ সৈতে শিশুসকল
আৰক্ষীয়ে নাজিম আলীক ফোনটো উভতাই দিয়ে।
নিজৰ ফোনটো ঘূৰাই পাই নাজিম আলী বৰ আনন্দিত হয়। তেওঁ আৰক্ষীৰ লগতে শিশুকেইটিকো ধন্যবাদ জ্ঞাপন কৰে আৰু তেওঁলোকৰ সততাক আন্তৰিকতাৰে শলাগ লয়।
এই ঘটনাৰ পিছত সততা আৰু চৰিত্ৰৰ দৃঢ়তা প্ৰদৰ্শন কৰা শিশুসকলৰ এনে সুন্দৰ আচৰণক লৈ চাৰিওফালে চৰ্চা চলিছে।
স্থানীয় লোকসকলেও শিশুসকলক এনে নৈতিক মূল্যবোধেৰে ডাঙৰ-দীঘল কৰাৰ বাবে তেওঁলোকৰ পিতৃ-মাতৃক প্ৰশংসা কৰিছে।
