গুৱাহাটী
অসমৰ মুখ্যমন্ত্ৰী হিমন্ত বিশ্ব শৰ্মাই শুক্ৰবাৰে ঘোষণা কৰে যে চৰকাৰী বিদ্যালয়ৰ পৰা উত্তীৰ্ণ ছাত্ৰ-ছাত্ৰীৰ বাবে অভিযান্ত্ৰিক মহাবিদ্যালয় আৰু চিকিৎসা মহাবিদ্যালয়ত পাঁচ শতাংশ আসন সংৰক্ষণ কৰিবলৈ পদক্ষেপ লোৱা হৈছে। শুক্ৰবাৰে তিনিচুকীয়াত অনুষ্ঠিত কেবিনেট বৈঠকৰ পিছত শ্ৰৰ্মাই এই ঘোষণা কৰে।
সংবাদ মাধ্যমক সম্বোধন কৰি মুখ্যমন্ত্ৰী শৰ্মাই কয় যে সপ্তম শ্ৰেণীৰ পৰা দ্বাদশ শ্ৰেণীলৈকে চৰকাৰী বিদ্যালয়ত অধ্যয়ন কৰি উত্তীৰ্ণ হোৱা ছাত্ৰ-ছাত্ৰীৰ বাবে এই সংৰক্ষণ উপলব্ধ হ’ব।
"অসমৰ অভিযান্ত্ৰিক মহাবিদ্যালয়সমূহত পাঁচ শতাংশ আসন একেখন চৰকাৰী বিদ্যালয়ৰ পৰা সপ্তম শ্ৰেণীৰ পৰা দ্বাদশ শ্ৰেণীলৈকে অধ্যয়ন কৰা ছাত্ৰ-ছাত্ৰীৰ বাবে সংৰক্ষিত হ'ব। ইয়াৰ অৰ্থ হ'ল ছাত্ৰজনে সপ্তম শ্ৰেণীৰ পৰা চৰকাৰী বিদ্যালয়ত অধ্যয়ন কৰি একেখন বিদ্যালয়ৰ পৰা উচ্চতৰ মাধ্যমিক পৰীক্ষা উত্তীৰ্ণ হ'ব লাগিব। তেওঁলোকৰ বাবে অভিযান্ত্ৰিক আৰু চিকিৎসা মহাবিদ্যালয়ত পাঁচ শতাংশ আসন সংৰক্ষিত কৰা হ’ব।" - মুখ্যমন্ত্ৰী শৰ্মাই কয়।
ইফালে, অসম কেবিনেটৰ পৰৱৰ্তী বৈঠক জানুৱাৰী মাহত লখিমপুৰত অনুষ্ঠিত হ’ব বুলি ঘোষণা কৰা হয়। মুখ্যমন্ত্ৰী শৰ্মাই এই ঘোষণা কৰে যে পৰৱৰ্তী কেবিনেট বৈঠক, যিখন ২০২৪ বৰ্ষৰ প্ৰথমখন কেবিনেট বৈঠক হ’ব, জানুৱাৰী মাহত উত্তৰ লখিমপুৰত অনুষ্ঠিত হ’ব। তাৰ পিছৰ কেবিনেট বৈঠক নলবাৰীত অনুষ্ঠিত হ’ব।
"জানুৱাৰী মাহৰ ৰাজ্যিক কেবিনেট বৈঠক উত্তৰ লখিমপুৰত অনুষ্ঠিত হ'ব। ফেব্ৰুৱাৰী মাহৰ কেবিনেট বৈঠক নলবাৰীত অনুষ্ঠিত হ'ব। লোকসভা নিৰ্বাচন আৰু যিহেতু বানপানীৰ দৰে পৰিস্থিতি হ’ব পাৰে আমি মাৰ্চ আৰু এপ্ৰিল মাহত জিলা সদৰত কেবিনেট বৈঠক অনুষ্ঠিত নকৰো।" - অসমৰ মুখ্যমন্ত্ৰীগৰাকীয়ে কয়।
অসমৰ মুখ্যমন্ত্ৰীয়ে লগতে ঘোষণা কৰে যে চৰকাৰে ৰাজ্যত ₹৪৩৮ কোটিৰ তিনিটা বিনিয়োগৰ প্ৰস্তাৱ গৃহীত কৰিছে।
"আজি কেবিনেটে ৰাজ্যত ₹৪৩৮ কোটিৰ বিনিয়োগৰ বাবে তিনিটা প্ৰস্তাৱ গৃহীত কৰে। প্ৰথম প্ৰস্তাৱটো হ'ল টাটাই কাজিৰঙাত এখন তাজ হোটেল নিৰ্মাণ কৰিব, গুৱাহাটীত আন এখন ৰেডিচন হোটেল আহিব, আৰু ভাগ্যশ্ৰী উদ্যোগ নামৰ কোম্পানী এটাই বঙাইগাঁৱত বাঁহৰ দুৰ্ঘটনা বাধা নিৰ্মাণ কৰিব। ৰাষ্ট্ৰীয় ঘাইপথত যেতিয়া পি ডব্লিউ ডিয়ে দুৰ্ঘটনা বাধা নিৰ্মাণ কৰে তেতিয়া সেইবোৰ তীখাৰে তৈয়াৰ কৰা হয়। এই কোম্পানীয়ে কয় যে যদি সঠিকভাবে নিৰ্মাণ কৰা হয় তেন্তে বাঁহৰ দুৰ্ঘটনা বাধা তীখাৰ দুৰ্ঘটনা বাধাতকৈ শক্তিশালী হ'ব। এই তিনিটা উদ্যোগে আমাক ₹৪৩৮ কোটিৰ বিনিয়োগৰ প্ৰস্তাৱ দিছে।" - তেওঁ কয়।
এইবোৰৰ উপৰিও মুখ্যমন্ত্ৰী শৰ্মাই নতুন কৰ্পৰেট সামাজিক দায়বদ্ধতা (চি এছ আৰ) কৰ্তৃপক্ষ গঠনৰ কথাও ঘোষণা কৰে যাতে চৰকাৰে ৰাজ্যত চি এছ আৰ পুঁজিৰ বিনিয়োগ বৃদ্ধি কৰিব পাৰে। তেওঁ কয় যে অইল ইণ্ডিয়া লিমিটেড আৰু নুমলীগড় শোধনাগাৰ লিমিটেডে ইতিমধ্যে কৰা চি এছ আৰ বিনিয়োগৰ বাহিৰে ৰাজ্যখনত অধিক চি এছ আৰ বিনিয়োগ আনিবলৈ এই কাম কৰা হৈছে। চিইঅ’ হিচাপে এজন আইএএছ বিষয়াক লৈ চি এছ আৰ কৰ্তৃপক্ষ গঠন কৰা হ’ব।
