গুৱাহাটী
কেন্দ্ৰীয় বন্দৰ, জাহাজ আৰু জলপথ দপ্তৰৰ মন্ত্ৰী সৰ্বানন্দ সোণোৱালে দেশৰ ছাত্ৰ-ছাত্ৰীসকলৰ নতুন ধাৰণা আৰু উদ্ভাৱনীমূলক চিন্তাধাৰাৰ সঠিক ব্যৱহাৰ কৰিবলৈ সমাজক আহ্বান জনাইছে। জ্ঞান শক্তিৰে সমৃদ্ধ যুৱ শক্তি কেনেকৈ বিকশিত ভাৰতৰ দৃষ্টিভংগী বাস্তৱায়িত কৰাৰ মূল চাবিকাঠি সেই বিষয়ে সোণোৱালে মন্তব্য কৰে। বজালীৰ পাঠশালাৰ শ্ৰীৰাম একাডেমীৰ ২০সংখ্যক প্ৰতিষ্ঠা দিৱস উপলক্ষে কেন্দ্ৰীয় মন্ত্ৰীগৰাকীয়ে ছাত্ৰ-ছাত্ৰীসকলক সম্বোধন কৰাৰ লগতে তেওঁলোকৰ সৈতে মত বিনিময় কৰে।
সৰ্বানন্দ সোণোৱালে মুখ্য অতিথি হিচাপে উপস্থিত থাকি অনুষ্ঠানটোৰ শোভাবৰ্ধন কৰে। ছাত্ৰ-ছাত্ৰী, শিক্ষক, অভিভাৱক, প্ৰাক্তন ছাত্ৰ-ছাত্ৰী আৰু বিশিষ্ট ব্যক্তিসকল উপস্থিত থকা এই অনুষ্ঠানটোৱ শিক্ষা প্ৰতিষ্ঠানখনৰ বৰ্ণিল যাত্ৰাৰ এক স্মৰণীয় মাইলৰ খুঁটি হিচাপে পৰিগণিত হৈছে।
এই উপলক্ষে কেন্দ্ৰীয় মন্ত্ৰী সোণোৱালে কয়, “ছাত্ৰ-ছাত্ৰীসকলে কেৱল পাঠ্যপুথিৰ মাজতে আৱদ্ধ হৈ থাকিব নালাগে; নতুন ধাৰণা আৰু উদ্ভাৱনীমূলক চিন্তাধাৰাৰ বিকাশৰ বাবে চেষ্টা কৰিব লাগে।” তেওঁ ভাৰত চৰকাৰৰ পৰিৱৰ্তনশীল পদক্ষেপসমূহৰ বিষয়ত আলোকপাত কৰি কয় “নতুন প্ৰজন্মক সবলীকৰণৰ বাবে ডিজিটেল ইণ্ডিয়া, মেক ইন ইণ্ডিয়া, আৰু স্কিল ইণ্ডিয়াৰ দৰে কাৰ্যসূচী আৰম্ভ কৰা হৈছে, তেওঁলোকক নেতৃত্ব আৰু উদ্ভাৱনৰ সঁজুলিৰে সজ্জিত কৰা হৈছে।”
তেওঁ পুনৰ কয়, “জ্ঞান এক শক্তি আৰু ছাত্ৰ-ছাত্ৰীসকলে ইয়াক আহৰণ কৰিব লাগিব আৰু ইয়াক বৃহত্তৰ সমাজৰ মংগলৰ বাবে ফলপ্ৰসূভাৱে প্ৰয়োগ কৰিব লাগিব।”
সোণোৱালে মূল্যবোধভিত্তিক শিক্ষাৰ তাৎপৰ্যৰ বিষয়ত আলোকপাত কৰি কয়, “নৈতিক মূল্যবোধৰ ভাবনা শিপাই থকা শিক্ষাক অগ্ৰাধিকাৰ দিব লাগিব। মই অভিভাৱকসকলক নিজৰ সন্তানক দায়িত্বশীল নাগৰিক হিচাপে ডাঙৰ-দীঘল কৰিবলৈ আহ্বান জনাইছো আৰু লগতে যোগ আৰু সামগ্ৰিক স্বাস্থ্য পদ্ধতিক দৈনন্দিন জীৱনত একত্ৰিত কৰাৰ গুৰুত্বৰ বিষয়তো জোৰ দিছো। যোগ কেৱল শাৰীৰিক ব্যায়াম নহয়; ই এনে এক জীৱনশৈলী, যিয়ে মানসিক স্পষ্টতা আৰু শাৰীৰিক শক্তি আনে। ই মানুহৰ মনোনিৱেশৰ ক্ষমতা বৃদ্ধি কৰাৰ লগতে সুস্থ হৈ থকাত সহায় কৰে।"
অনুষ্ঠানত ছাত্ৰ-ছাত্ৰীসকলে নৃত্য, সংগীত, নাটককে ধৰি মনোমোহা সাংস্কৃতিক কাৰ্যসূচী পৰিবেশন কৰি তেওঁলোকৰ প্ৰতিভা উদ্ভাসিত কৰে আৰু দৰ্শকক মোহিত কৰে। উক্ত অনুষ্ঠানত ভৱানীপুৰ সমষ্টিৰ বিধায়ক ফণীধৰ তালুকদাৰ, ভট্টদেৱ বিশ্ববিদ্যালয়ৰ সন্মানীয় উপাচাৰ্য ধনপতি ডেকা, শ্ৰী ৰাম একাডেমীৰ অধ্যক্ষ ড° কাকলি দাস আৰু অন্যান্য উল্লেখযোগ্য বিশিষ্ট ব্যক্তিসকল উপস্থিত থাকে।
