পপ সংগীতৰ জগতৰ অপ্ৰতিদ্বন্দী সম্ৰাট মাইকেল জেকচনৰ মৃত্যুৰ ১৭ বছৰ পাৰ হৈ গ’ল। ২০০৯ চনৰ ২৫ জুনত লছ এঞ্জেলছত অৱস্থিত নিজ গৃহত হৃদৰোগত আক্ৰান্ত হৈ তেওঁ মৃত্যুবৰণ কৰিছিল। সেই সময়ত তেওঁৰ বয়স আছিল মাত্ৰ ৫০ বছৰ। মাইকেল জেকচনৰ আকস্মিক বিদায়ৰ খবৰে তেতিয়া সমগ্ৰ বিশ্বৰ কোটি কোটি অনুৰাগী আৰু সংগীত জগতক জোকাৰি গৈছিল। আজি ইমান বছৰৰ পিছতো সমগ্ৰ বিশ্বতে তেওঁৰ যাদু অক্ষুণ্ণ আছে। এই বছৰ তেওঁৰ মৃত্যু বাৰ্ষিকীত অনুৰাগীসকলৰ উৎসাহ আৰু অধিক বৃদ্ধি পাইছে, কাৰণ এক দীঘলীয়া অপেক্ষাৰ অন্ত পেলাই তেওঁৰ জীৱনৰ কাহিনী ডাঙৰ পৰ্দালৈ আহিছে।
এই বছৰৰ এপ্ৰিল মাহত মাইকেল জেকচনৰ জীৱনৰ আধাৰত নিৰ্মিত বহু চৰ্চিত বায়’পিক ছবি 'মাইকেল' সমগ্ৰ বিশ্বৰ ছবিগৃহসমূহত মুক্তি দিয়া হৈছিল। এই ছবিখনৰ জৰিয়তে এই মহান শিল্পীগৰাকী ৰূপালী পৰ্দাত পুনৰ এবাৰ জীৱন্ত হৈ উঠিছে। ছবিখনে দৰ্শক আৰু সমালোচকসকলৰ পৰা বিপুল সমাদৰ লাভ কৰিছে।
শিশু অৱস্থাত মাইকেল জেকচন
বক্স অফিচত বায়’পিক 'মাইকেল'ৰ ঐতিহাসিক উপাৰ্জন
চলচ্চিত্ৰ নিৰ্মাতা এণ্টনি ফুকাৰ পৰিচালনাত নিৰ্মিত এই ছবিখনে বক্স অফিচত নতুন ৰেকৰ্ড গঢ়িছে। এই ছবিখন লায়ন্সগেট আৰু ইউনিভাৰ্চেল পিকচাৰ্ছে যৌথভাৱে প্ৰযোজনা কৰিছে। 'মাইকেল' ছবিখনৰ বাজেট আছিল প্ৰায় ১৫৫ মিলিয়ন ডলাৰৰ পৰা ২০০ মিলিয়ন ডলাৰৰ ভিতৰত। মুক্তিৰ পিছৰে পৰা এই ছবিখনে উপাৰ্জনৰ ক্ষেত্ৰত কেইবাটাও ডাঙৰ ৰেকৰ্ড ভংগ কৰিছে।
এতিয়ালৈকে এই ছবিখনে সমগ্ৰ বিশ্বতে ৯৬০ মিলিয়ন ডলাৰতকৈও অধিক ব্যৱসায় কৰিছে। এই চমকপ্ৰদ উপাৰ্জনৰ সৈতে এই ছবিখন ইতিহাসৰ আটাইতকৈ সফল আৰু সৰ্বাধিক উপাৰ্জনকাৰী মিউজিকেল বায়’পিক হৈ পৰিছে।
তেওঁৰ গান 'হিল দ্য ৱৰ্ল্ড' আৰু 'ইউ আৰ নট এলোন' আজিও মানুহৰ মুখে মুখে বাগৰে। গানৰ লগতে তেওঁৰ চিগনেচাৰ 'মুনৱাক' ডান্স ষ্টেপ আজিও এটা সাংস্কৃতিক প্ৰতীক হিচাপে গণ্য কৰা হয়। নতুন বায়’পিক ছবিখনত এই বিখ্যাত গান আৰু মিউজিক ভিডিঅ’সমূহ নিৰ্মাণৰ আঁৰৰ কাহিনীবোৰো অতি সুন্দৰভাৱে দেখুওৱা হৈছে।
ৰহস্য আৰু বিতৰ্কৰে আবৃত ব্যক্তিগত জীৱন
মাইকেল জেকচনৰ ব্যৱসায়িক জীৱন যিমান উজ্জ্বল আছিল, তেওঁৰ ব্যক্তিগত জীৱন সিমানৰে ৰহস্যৰে ভৰা আছিল। তেওঁ ১৯৯৪ চনত লিছা মেৰী প্ৰেছলীৰ সৈতে বিবাহপাশত আৱদ্ধ হৈছিল, কিন্তু এই সম্পৰ্ক মাত্ৰ দুবছৰহে টিকিছিল। ইয়াৰ পিছত তেওঁ নাৰ্চ ডেব্ৰা ৰোৱেক বিয়া কৰায়, যাৰ ঔৰসত তেওঁৰ দুটা সন্তান প্ৰিন্স আৰু পেৰিছৰ জন্ম হয়। তেওঁৰ তৃতীয়টো সন্তান প্ৰিন্স মাইকেল দ্বিতীয় চাৰ’গেচিৰ জৰিয়তে পৃথিৱীলৈ আহিছিল।
ছবিখনৰ প'ষ্টাৰ
মাইকেলৰ সন্তানসকলক লৈ সংবাদ মাধ্যমত সদায় বিভিন্ন ধৰণৰ উৰাবাতৰি ওলাইছিল। বহু লোকৰ মতে তেওঁৰ ডাঙৰ পুত্ৰ প্ৰিন্সৰ মুখাৱয়ব মাইকেলৰ সৈতে নিমিলিছিল। এই কাৰণতে মানুহে তেওঁক চৰ্মৰোগ বিশেষজ্ঞ আৰ্নল্ড ক্লেইনৰ পুত্ৰ বুলি ভাবিবলৈ লৈছিল। এনে বহু বিতৰ্কই মাইকেল জেকচনৰ জীৱনৰ শেষ সময়লৈকে পিঠিত ছাঁৰ দৰে খেদি ফুৰিছিল।
মৃত্যুৰ ৰহস্য আৰু আদালতৰ ৰায়
মাইকেল জেকচনৰ আকস্মিক মৃত্যুও এটা ডাঙৰ ৰহস্য হৈ পৰিছিল, যাৰ পিছত এই গোচৰ আদালত পৰ্যন্ত পাইছিলগৈ। তেওঁৰ ব্যক্তিগত চিকিৎসক কনৰেড মাৰেক এই গোচৰৰ মুখ্য অভিযুক্ত কৰা হৈছিল। আদালতৰ শুনানিৰ সময়ত প্ৰমাণিত হৈছিল যে ডাঃ মাৰেই মাইকেলক টোপনিৰ ঔষধ হিচাপে 'প্ৰপ’ফ’ল' নামৰ এক নিস্তেজক ঔষধৰ গধুৰ মাত্ৰা দিছিল। এই গধুৰ মাত্ৰাৰ বাবেই মাইকেল জেকচন হৃদৰোগত আক্ৰান্ত হয় আৰু তেওঁৰ প্ৰাণ হেৰুৱায়।
.webp)
