VIDEO
এই বিতৰ্কৰ এক শেহতীয়া উদাহৰণ কলকাতাত পৰিলক্ষিত হৈছে। বিজেপিৰ নৱনিৰ্বাচিত বিধায়ক তথা অভিনেতা ৰুদ্ৰনীল ঘোষে টলিউডৰ কাৰিকৰী বিদ্যাবিদসকলৰ সৈতে এক গুৰুত্বপূৰ্ণ বৈঠকত মিলিত হয়। কলকাতাৰ কাৰিকৰী ষ্টুডিঅ’ৰ বহু বিশিষ্ট ব্যক্তিয়ে এই বৈঠকত অংশগ্ৰহণ কৰে।
চলচ্চিত্ৰ পৰিচালক পৰমব্ৰত চেটাৰ্জী, শ্ৰীজিৎ মুখাৰ্জী, ইন্দ্ৰদীপ দাসগুপ্তৰ দৰে বিশিষ্ট ব্যক্তিৰ উপস্থিতিত কাৰিকৰী বিদ্যাবিদসকলে তেওঁলোকৰ সমস্যাবোৰ শ্বেয়াৰ কৰিছে। কামৰ বাবে বাংলাদেশলৈ যাওঁতে তেওঁলোকৰ লগত ভাল ব্যৱহাৰ কৰা নহয় বুলি অভিযোগ উত্থাপন কৰিছে কলকাতাস্থিত কাৰিকৰী বিদ্যাবিদসকলে।
তেওঁলোকে কয় যে, তাত তেওঁলোকে অপমানৰ সন্মুখীন হ’বলগীয়া হয়। ইয়াৰ বিপৰীতে বাংলাদেশী শিল্পীসকলে কলকাতালৈ আহি সম্পূৰ্ণ স্বাধীন আৰু সন্মানসহকাৰে কাম কৰিব পাৰে। এই পৰিস্থিতিক লৈ কাৰিকৰী বিদ্যাবিদসকলে গভীৰ ক্ষোভ প্ৰকাশ কৰি ইয়াক সম্পূৰ্ণ অযুক্তিকৰ বুলি অভিহিত কৰিছে।
বিধায়ক ৰুদ্ৰনীল ঘোষেও কাৰিকৰী বিদ্যাবিদসকলৰ অভিযোগক লৈ উদ্বেগ প্ৰকাশ কৰিছে। তেওঁ কয় যে, এজন ভাৰতীয় নাগৰিক হিচাপে আমাৰ জনসাধাৰণৰ এনে অপমান গভীৰ দুখজনক। কেন্দ্রীয় চৰকাৰক বিষয়টো অৱগত কৰিব বুলি তেওঁ আশ্বাস প্ৰদান কৰে৷
বিজেপিৰ নৱনিৰ্বাচিত বিধায়ক তথা অভিনেতা ৰুদ্ৰনীল ঘোষ
অৱশ্যে, ভাৰতত কাম কৰা বাংলাদেশী শিল্পীৰ চূড়ান্ত সিদ্ধান্ত চৰকাৰী পর্যায়তহে লোৱা হ’ব বুলিও তেওঁ স্পষ্ট কৰি দিয়ে৷ বাংলাদেশৰ সৈতে ভাৰতৰ সম্পৰ্ক, পাকিস্তানৰ সৈতে থকাৰ দৰে নহয়। আমাৰ সম্পৰ্ক সদায় অতি আন্তৰিক হৈ আহিছে। বাংলাদেশৰ এক বৃহৎ অংশই ভাৰতক গভীৰভাৱে ভাল পায়। মুষ্টিমেয় উগ্ৰ শক্তিৰ বাবে সমগ্ৰ দেশখনক জবাবদিহি কৰিব নোৱাৰি। তথাপিও কাৰিকৰী বিদ্যাবিদসকলৰ সৈতে জড়িত যিকোনো ঘটনাৰ গুৰুত্বসহকাৰে তদন্ত কৰা হ’ব।
পশ্চিম বংগৰ ৰাজনৈতিক পৰিৱৰ্তনৰ পিছত টলিউডৰ চলচ্চিত্ৰ সংগঠনসমূহৰ ভিতৰত যথেষ্ট উত্তেজনা দেখা গৈছে। শেহতীয়াকৈ ফেডাৰেচন অৱ চিনে টেকনিচিয়ানছ ৱৰ্কাৰছ অৱ ইষ্টাৰ্ণ ইণ্ডিয়াই বাংলা চলচ্চিত্ৰ পৰিচালক ৰাহুল মুখাৰ্জীৰ ওপৰত তিনি মাহৰ বাবে নিষেধাজ্ঞা আৰোপ কৰিছে।
ৰাহুল মুখাৰ্জীৰ বিৰুদ্ধে অভিযোগ উত্থাপন হৈছে যে, ফেডাৰেচনৰ অনুমতি অবিহনে বাংলাদেশী ৱেব চিৰিজ "লোহু"ৰ শ্বুটিং কৰিছে। যোৱা বছৰ ধাৰাবাহিকখনৰ প্ৰডাকচন কেইদিনমানৰ বাবে বন্ধ কৰিবলগীয়া হৈছিল। ফেডাৰেচনে কয় যে, বিদেশী প্ৰডাকচনত কাম কৰা স্থানীয় কাৰিকৰী বিদ্যাবিদসকলক দিয়া অধিক মাচুলৰ সন্দৰ্ভত পৰিচালকে নিয়মসমূহক আওকাণ কৰিছে। ইয়াৰ পিছতো ৰাহুল মুখাৰ্জীয়ে বাংলাদেশী কাৰিকৰী বিদ্যাবিদসকলৰ সৈতে কাম কৰি আছিল, যাৰ ফলত এই কঠোৰ ব্যৱস্থা গ্ৰহণ কৰা হৈছে।
টলিউডত এনে উত্তেজনা প্ৰায়ে ফেডাৰেচনৰ কঠোৰ নিয়মৰ বাবেই উদ্ভৱ হয়। ফেডাৰেচনৰ নিয়ম অনুসৰি যিকোনো বিদেশী বা সীমান্ত অতিক্ৰম কৰা প্ৰকল্পৰ বাবে স্থানীয় কাৰিকৰী বিদ্যাবিদসকলৰ বাবে নিৰ্দিষ্ট কোটা নিৰ্ধাৰণ কৰা প্ৰয়িজনীয়। তদুপৰি বিদেশী কামৰ বাবে পাৰিতোষিক আৰু ৱৰ্ক পাৰ্মিটৰ নিয়ম অত্যন্ত কঠোৰ হয়। যিকোনো পৰিচালকে এই নিয়মবোৰ আওকাণ কৰি বাংলাদেশী চলচ্চিত্ৰ নিৰ্মাতাৰ সৈতে সহযোগিতা কৰিবলৈ চেষ্টা কৰিলে বিৰোধিতাৰ সন্মুখীন হ’বলগীয়া হয়।
টলিউডত সৰ্বাধিক পাৰিতোষিক পোৱা বাংলাদেশী অভিনেত্ৰী
এই বিতৰ্কৰ আন এটা দিশ হৈছে ৰাজনৈতিক। ২০১৯ চনৰ লোকসভা নিৰ্বাচনৰ সময়ত বাংলাদেশী অভিনেতা ফাৰ্দুছ আহমেদে তৃণমূল কংগ্ৰেছৰ হৈ প্ৰচাৰ চলোৱা দেখা গৈছিল। ভাৰতৰ স্থানীয় নিৰ্বাচনত এজন বিদেশী শিল্পীৰ এই অংশগ্ৰহণৰ বিৰুদ্ধে বিৰোধী দলসমূহে তীব্ৰ প্ৰতিবাদ সাব্যস্ত কৰে। ইয়াৰ পিছতে ভাৰতীয় গৃহ মন্ত্ৰালয়ে কঠোৰ ব্যৱস্থা গ্ৰহণ কৰি তেওঁৰ ভিছা বাতিল কৰি তেওঁক ব্লেকলিষ্ট কৰে। এই ঘটনাই চলচ্চিত্ৰ সহযোগিতাত ৰাজনৈতিক হস্তক্ষেপৰ বিপদ স্পষ্ট কৰি তুলিছিল।
শেহতীয়াকৈ বাংলাদেশৰ অভ্যুত্থান আৰু ৰাজনৈতিক অস্থিৰতাই পৰিস্থিতি আৰু অধিক জটিল কৰি তুলিছে। তাত সংখ্যালঘু লোকৰ ওপৰত হোৱা আক্ৰমণে ভাৰতৰ জনসাধাৰণৰ আৱেগ-অনুভূতিতো প্ৰভাৱ পেলাইছে। ইয়াৰ প্ৰত্যক্ষ উদাহৰণ ক্ৰীড়াক্ষেত্ৰত দেখা গ’ল যেতিয়া আই পি এল দল কলকাতা নাইট ৰাইডাৰ্ছৰ পৰা এজন বাংলাদেশী খেলুৱৈক বহিষ্কাৰ কৰা হৈছিল।
টলিউডৰ এই সমস্যা কেৱল বাহিৰৰ অভিনেতাসকলৰ মাজতে সীমাবদ্ধ নহয়। ইয়াৰ উপৰিও সমগ্ৰ বাংলা চলচ্চিত্ৰ উদ্যোগৰ ভিতৰত থকা ব্যৱস্থাগত অভাৱসমূহো উন্মোচন কৰিছে। শেহতীয়াকৈ শ্বুটিং চেটৰ নিৰাপত্তাজনিত সমস্যা, ফেডাৰেচনৰ কথিত একনায়কত্ববাদ, পৰিচালকৰ সৃষ্টিশীল স্বাধীনতাৰ বাবে কাম কেইবাবাৰো স্থবিৰ হৈ পৰিছে।
কাৰিকৰী আৰু পৰিচালকৰ মাজৰ এই সংঘাতেই এতিয়া আন্তঃৰাষ্ট্ৰীয় সহযোগিতাত বাধাৰ সৃষ্টি কৰিছে। দুয়োখন দেশৰ চলচ্চিত্ৰ নিৰ্মাতা আৰু শিল্পীসকলে এতিয়া সংশ্লিষ্ট চৰকাৰী বিভাগ আৰু মনোৰঞ্জন উদ্যোগৰ সংস্থাসমূহৰ চূড়ান্ত নীতিগত সিদ্ধান্তৰ বাবে অপেক্ষা কৰি আছে।
